Baǵdarlama boıynsha ár otbasy úshin úsh iri transhpen 17 mln teńge kóleminde ótemaqy tóleý kózdelgen. Búgingi kúni 19 otbasy 8,5 mln teńge kóleminde birinshi transh aldy (jalpy somanyń 50%). Qalǵan 25% - dan 2 transh turǵyn úı qurylysynyń barysynda tólenedi. Sonymen qatar aýdan ákimdigi zaqymdalǵan turǵyn úılerdi esepteý jáne turǵyndarǵa ótemaqy alý úshin kerek qujattardy jınaý boıynsha kómek kórsetý jumystaryn jalǵastyrýda.
Osy arada aıta ketelik, «Azamattarǵa arnalǵan úkimet» memlekettik korporasııasynyń barlyq qajetti quraldarmen jabdyqtalǵan mobıldi HQO-lary aýdan boıynsha ornalasqan evakýasııalaý pýnktterin kezekpen aralap, joǵalǵan qujattardy qaıta qalpyna keltirýge kómek kórsetýde. Tótenshe jaǵdaı oryn alǵan mamyr aıynyń basynan bastap maqtaaraldyqtarǵa korporasııa óz esebinen aqysyz túrde 210 tehnıkalyq tólqujat, 245 menshik ıesi týraly málimet, 872 jyljymaıtyn múliktiń tehnıkalyq tólqujattaryn jáne quqyq belgileıtin qujattyń muraǵattyq kóshirmesin berip, 210 ólshep-syzý jumystaryn júrgizdi. 492 turǵyn jyljymaıtyn múlik derekqoryndaǵy qatelikterdi túzetip, 1 300 adam qajetti qujattaryn rásimdep, basqa da memlekettik qyzmetter alǵan. Qazirgi ýaqytta memlekettik korporasııanyń 25 qyzmetkeri jer kadastry jáne jyljymaıtyn múlik qujattaryn qalpyna keltirý úshin ótinish qabyldap, turǵyndarǵa keńes berýde.
