Aımaqtar • 22 Mamyr, 2020

Túrkistanda karantın talaptaryn saqtamaǵan tamaqtaný oryndarynyń jumysy toqtatyldy

74 ret kórsetildi

Túrkistan oblysy aýmaǵynda qazirgi tańda koronavırýs ınfeksııasyn juqtyrǵan 267 jaǵdaı tirkelgen. Tótenshe jaǵdaı aıaqtalǵanymen qaýip seıilgen joq. Osy oraıda tıisti oryndar óńirdiń ár azamatyn karantın talaptaryn óz deńgeıinde saqtaýǵa shaqyrýda.

Oblystyń bas memlekettik sanıtarııalyq dárigeri N.Nyshanov Túrkistan qalasyndaǵy birqatar áleýmettik nysandy aralap, «Karantın is-sharalaryn ózgertý týraly» jarııalanǵan №17 qaýly talaptarynyń oryndalýyn baqylady.  Adam kóp shoǵyrlanatyn oryndardyń biri – ortalyq bazar aýmaǵyndaǵy sanıtarlyq ahýalmen tanysyp, kásipkerlermen suhbattasty. Sanıtarlyq talaptar eń aldymen turǵyndardyń qaýipsizdigin qamtamasyz etý úshin qajettigi eskertildi. Qazirgi tańda oblys aýmaǵynda 121 mobıldi top qaýly talaptarynyń oryndalýyna turaqty monıtorıng júrgizýde. Búginge deıin oblys aýmaǵynda 413 nysanda baqylaý júrgizilgen. Qaýlyǵa sáıkes, qoǵamdyq tamaqtaný oryndaryna tamaq jetkizý qaǵıdatymen ǵana jumys isteýge ruqsat berilgen. Alaıda, monıtorıng júrgizý barysynda Túrkistan qalasynyń bazar aýmaǵynda jyldam qyzmet kórsetetin  2 qoǵamdyq tamaqtaný orny jáne káýap  daıyndaý pavılony turǵyndardy qabyldap,  adamdardyń kóp shoǵyrlanýyna jol bergeni anyqtaldy. Osy kemshilikter boıynsha jeke kásipkerlerge karantın talaptary boıynsha túsindirildi. Nátıjesinde, joǵaryda atalǵan qoǵamdyq tamaqtaný oryndarynyń jumysyn toqtatý týraly sheshim qabyldandy. Oblys aýmaǵynda sanıtarlyq talaptardyń saqtalýyna baqylaý jalǵasýda.

Uqsas jańalyqtar