Konferensııada pikir bildirgen mamandardyń málimdeýinshe, karantınnen keıin jekemenshik 4428 mektepke deıingi bilim berý mekemesi jumysyn toqtatýy múmkin. Bul 339 myńǵa jýyq bala balabaqshaǵa bara almaıdy degen sóz. Onsyz da balaqaılardy memlekettik balabaqshamen qamtý máselesi kúıip turǵanda bul jaǵdaıdy odan ári ýshyqtyrady. Buǵan osy jyldyń 12 mamyrynan bastap memlekettik tapsyrys tek naqty balalardyń sany úshin tólenetindigimen baılanysty. Al qazir balabaqshalarda kezekshi topta nebári 15 bala tárbıelenýi kerek degen talap bar. Al toptaǵy sanaýly balaǵa kórsetiletin qyzmeke qaramastan balabaqsha quryltaıshylary qyzmetkerlerge tolyq kólemdegi aqy tóleýge mindetti.
«Atameken» UKP Basqarma tóraǵasynyń orynbasary Oljas Ordabaev jekemenshik balabaqsha quryltaıshylary, úzdiksiz bilim berý qaýymdastyǵy, sondaı-aq, Biliminvest qaýymdastyǵy ókilderi qatysqan basqosýda:
– Sońǵy eki apta kóleminde jekemenshik balabaqshalar qarjy máselesine qatysty óz problemalaryn aıtyp shaǵymdar túsirýde. Bul máseleler ýaqyt óte sheshiledi degen úmit bárimizde bolǵan. Alaıda jekemenshik mektepke deıingi uıymdarǵa memlekettik tapsyrystar tek mekeme qyzmetin paıdalanǵan bala sanyna qaraı beriledi jáne qyzmetkerlerin qarjymen quryltaıshylar ózderi qamtýy kerek degen talap ta bar eken. Al shyǵyndy ata-analar óteı ala ma? Árıne, joq. Onyń ústine, kóptegen qazaqstandyqtar balabaqshaǵa balalaryn jiberýden bas tartýda. Buǵan qarjy máselesi men eldegi karantın sebep, – dedi.
Tótenshe jaǵdaı týyndaǵanǵa deıin memlekettik tapsyrys boıynsha jumys istegen jeke mektepke deıingi uıymdar jalaqy, kommýnaldyq qyzmetter, jaldaý jáne salyq tólemderinen qomaqty qaryzdar jınap, jumys isteýge májbúr bolǵan. О́ıtkeni «Pedagog mártebesi týraly» Zańynyń áleýmettik kepildemesi kásipkerdiń moınynda. Bul jeke balabaqshalardy jan basyna qarjylandyrý ádistemesiniń engizilýimen de baılanysty bolyp otyr.
Osyǵan oraı Úzdiksiz bilim berý qaýymdastyǵynyń Aqmola oblystyq fılıaly dırektorynyń orynbasary Sholpan Ýtegenova:
– Biz 2014 jyldan beri jan basyna shaqqanda 23 869 teńge kóleminde ár balaǵa qarjy alyp keldik. Jyl saıynǵy qymbatshylyq máselesi eskerilmedi. Tek 2017 jyly jańa ádisteme qabyldandy. Biraq ol áli kúnge iske asyrylmady. Endi ony da memleket toptaǵy bala sanyna qaraı berer bolsa, jekemenshik balabaqshalar jabyla bastaıdy. Onyń ústine, qyzmetkerlerdi materıaldyq qoldaý quryltaıshy moınyna júkteldi. Bul negizsiz. Biz ata-analar qaltasynan óteletin qarjyny 16 myń teńgeden asyrýǵa quqyǵymyz joq. Oǵan qosa, qazir ata-analar da balalaryn balabaqshaǵa berýden qorqady, – dedi.
Qosa ketý kerek, mektepke deıingi bilim berý salasynda jekemenshik balabaqshalardyń 60%-dan kóbi ata-ana tólemi esebinen memlekettik tapsyryssyz jumys isteıdi.
