Bilim jáne ǵylym mınıstrliginiń málimetinshe, IV toqsanda qazaqstandyq telearnalar arqyly 3 000-nan astam telesabaq kórsetildi. Qazirgi tańda taǵy 15 000 beınesabaq daıyndaý josparlanyp otyr, olar densaýlyq jaǵdaıyna baılanysty úıde oqıtyn oqýshylar úshin nemese aýa raıynyń qolaısyzdyǵyna baılanysty sabaq toqtatylǵan jaǵdaıda qosymsha materıal retinde paıdalanylady.
Osyǵan oraı uıymdastyrylǵan onlaın kezdesýde mınıstr:
«Juqtyrý qaýpine, barlyq qıyndyq men tıisti tájirıbeniń joqtyǵyna qaramastan, sizder osy jumyspen aınalysýǵa kelistińizder. Sol úshin sizderge alǵysymdy bildiremin. Syrt kózben qaraǵan adamǵa beınesabaqtardy túsirý ońaı bolyp kórinýi múmkin. 20 jyl tájirıbesi bar muǵalim úshin telesabaq túsirýde qandaı qıyndyq týyndaýy múmkin deıtinder de bar, biraq bul – múldem basqa jumys. Shyn máninde, kamera aldynda sóılegenge qaraǵanda, úırenshikti synypta 25 balanyń aldynda sabaq túsindirý áldeqaıda ońaıyraq», dedi.
Vedomstvo basshysy eger epıdemıologııalyq jaǵdaı jaqsarsa, 1 qyrkúıekte mektepter dástúrli oqytý formatyna oralady dep úmittenetinin, alaıda kez kelgen jaǵdaıǵa daıyn bolý qajet ekenin aıtty.
Shara barysynda Bilim jáne ǵylym mınıstri birqatar pedagogti qurmet gramotasymen, «Y.Altynsarın» jáne «Bilim berý salasynyń qurmetti qyzmetkeri» qurmet belgilerimen marapattady.
