Bilim jáne ǵylym mınıstrligi túsirilimge qatysatyn muǵalimderdi iriktep, sabaq sapasyn qadaǵalasa, Bilim Media Group komandasy sabaqtardyń túsirilim, aýdıo jáne montaj jumystary men jalpy tehnıkalyq sapasyna jaýapty boldy. Jobaǵa jalpy 160 muǵalim, 40 ádisker jáne kompanııanyń 100-den asa qyzmetkeri qatysqan. Beınesabaqtardy daıyndaýǵa atsalysqan muǵalimderge qalamaqy, sonymen birge tótenshe jaǵdaı kezindegi jumysy úshin syıaqy berildi. Osy tusta mınıstr Ashat Aımaǵambetov bul joba úshin Mınıstrlik Bilim Media Group kompanııasyna qansha qarjy tólegeni týraly saýal kópshilik kókeıinde júrgenin, alaıda memleket bıýdjetinen eshqandaı qarjy jumsalmaǵanyn atap ótti. Joba Bilim Media Group bastamasymen, kompanııa qarjysy esebinen júzege asyryldy. Mınıstrlik uıymdastyrý jumystary men ádistemelik baǵyt boıynsha qoldaý kórsetti.
Bilim Media Group kompanııasynyń dırektory Raýan Kenjehanuly:
– 6 sáýirden búginge deıin BilimLand.kz platformasyn 3,2 mıllıon adam qoldansa, portaldaǵy beınesabaqtardyń qaralymy 73,9 mıllıonnan asqan. Al jobanyń YouTube arnasy 2 jarym aıǵa tolmaıtyn ýaqytta 289 myń qoldanýshy jıyp, qaralym sany 15,3 mıllıonǵa jetken. Bul – tótenshe jaǵdaıdaǵy memleket pen bıznes seriktestiginiń úlgisi, yntymaqtastyqtyń nátıjesi. Bizge senim bildirgenderińiz úshin alǵys aıtamyz jáne elimizdegi bilim sapasyn, qoljetimdiligin arttyrý úshin jumysymyzdy ári qaraı jalǵastyra beremiz, – dedi.
