Jazda qyzmet kórsetýi kózdelgen qala syrtyndaǵy 23 saýyqtyrý lageriniń 8-i memlekettik, 15-i jekemenshik. Bıyl oblys boıynsha 1-10 synyp oqýshylarynyń jalpy sany – 416 086. Al 23 saýyqtyrý lageri 32 myńnan astam balany qabyldaı alady.
О́ńirlik kommýnıkasııalar qyzmetinde ótken brıfıngte osyndaı derekterdi keltirgen oblystyq Adamı áleýetti damytý basqarmasynyń basshysy Raqymbek Jolaev Túlkibas aýdanyndaǵy «Samal» lagerinde oblystaǵy 5 balalar úıiniń jetim jáne ata-ana qamqorlyǵynsyz qalǵan 250-ge jýyq tárbıelenýshileri jaz boıy demalatynyn málim etti. «Sondaı-aq, Maqtaaral aýdanyndaǵy tótenshe jaǵdaı oryn alǵan eldi mekenderdegi 820 oqýshy 15 kúnnen jazǵy demalysqa barady. Olar «Baldáýren-Qapshaǵaı» jáne «Baldáýren-Túrkistan» oqý-saýyqtyrý ortalyǵyna, «Saryaǵash» balalar sanatorııine, aýdandardaǵy «Baldáýren», «Qazyǵurt», «Báısheshek», «Erkejan» saýyqtyrý lagerlerine barady», - dedi Raqymbek Qýatbekuly.
Al oblystaǵy balabaqshalar tek ata-analardyń suranysy men ótinishi negizinde iske qosylady. «Bıyl oblysta 20 naýryzǵa deıin 1447 mektepke deıingi uıymdar jumys istedi. Onyń ishinde 1271 balabaqsha, 176 memlekettik shaǵyn ortalyq. Onda 1-6 jastaǵy 153 296 bala tárbıelenýde. Jalpy mektepke deıingi uıymdar úlesiniń 69%-y jekemenshik. Qaýlynyń №9 qosymshasynda mektepke deıingi uıymdarda ata-anasynyń mindetti jumysta bolýy shart jáne balalaryna qaraýshysy joq otbasylar úshin jumys isteıtin kezekshi toptardy ashý jáne kezekshi toptarmen jumys jasaý algorıtmi kórsetilgen. Sondyqtan balabaqshalarda kezekshi toptar ashylýy múmkin», - dedi basqarma basshysy.
Aıta keterligi, mektepke deıingi uıymdardaǵy qyzmetkerlerdiń eńbek jalaqysy saqtala otyryp, úılerinde qashyqtan jumystaryn jalǵastyrýda, al, keıbiri óz ótinishteri boıynsha kezekti eńbek demalysynda.
Túrkistan oblysy
