«Biz bıylǵy jyly barlyǵy 56 myńnan astam adamdy jumyspen qamtýdy josparlap otyrmyz», - dedi D.Álkebaıuly jáne «Jumyspen qamtýdyń jol kartasy» memlekettik baǵdarlamasynyń aıasynda 26 myń adamdy qamtý jospary bar ekenin atap ótti.
Aıta keterligi, bos oryndarǵa ornalasý úshin jumys izdeýshilerge Jumyspen qamtý ortalyǵyna barý kerek.
«Ortalyq mamandary biliktilik boıynsha qandaı jumystyń qajet ekenin, qaı aýdannan usynylǵanyn, jumystyń yńǵaıyn jan-jaqty qarastyryp, vakansııalardy usynady. Lokasııalyq jaǵynan turǵylyqty mekenjaıy nazarǵa alynady. Ásirese,kópbalaly analarǵa qolaıly nusqalar tańdalady», - dedi D.Álkebaıuly.
Basqarma málimetterine sáıkes, aǵymdaǵy jyldyń basynan beri qaraı halyqty Jumyspen qamtý ortalyǵyna 27 myńnan astam adam jumys izdep kelgen, olardyń ishinde 13,5 myń adam eńbekpen qamtylsa, sonyń ishinde Jumyspen qamtýdyń jol kartasy aıasynda 5,5 myń adam jumysqa ornalasqan. Bul baǵyttaǵy jumys jalǵasýda jáne azamattardy jumyspen qamtýdy sátti júzege asyrýda «Eńbek» nátıjeli jumyspen qamtýdy jáne jappaı kásipkerlikti damytý baǵdarlamasynyń aıasynda kásipkerler úshin 3 yntalandyrýshy tetikter qoldanylady. Bul qoǵamdyq jumystar, áleýmettik jumys oryndary jáne jastar tájirıbesi.
Qoǵamdyq jumystarǵa jasap otyrǵan qyzmeti qala úshin ekonomıkalyq, áleýmettik jáne ekologııalyq turǵyda paıda ákeletin jumys berýshiler qatysady. Qoǵamdyq jumystarǵa qatysýshy azamattardyń eńbegin halyqty Jumyspen qamtý ortalyǵy aı saıyn jumys berýshiler bergen málimetter negizinde tóleıdi jáne ol 2 AEK (85000 teńge) quraıdy.
«Eger kásipker jumys izdeýshini qoǵamdyq jumystarǵa qabyldaıtyn bolsa, onda memleket árbir jumysqa turǵan adam úshin jyl sońyna deıin eki ret tómengi jalaqy tóleıtin bolady. Ol áleýmettik salyqtardy ustamaǵanda 85 myń teńgeni quraıdy», - dep túsindirdi N.Ábilshaıyqov. Qoǵamdyq jumystarǵa qamtylý uzaqtyǵy 12 aıǵa deıin. Áleýmettik jumys oryndary jumys berýshilermen olardyń menshik formasyna qaramastan, sondaı-aq, úıde de uıymdastyrylady. Áleýmettik jumys oryndary boıynsha qatysýshy azamattardyń eńbegi jumys berýshimen belgilengen jalaqydan 35 paıyz mólsherinde sýbsıdııa berý arqyly, biraq 1 AEK- ten aspaǵan (42500 teńge)kólemde tólenedi. «Eger siz ózińige býhgalter kómekshisi bolyp jumys izdegen adamdy alatyn bolsańyz, onyń eńbekaqysynyń 35 paıyzyn memleket óteıtin bolady», - dep qosty sózine N.Ábilshaıyqov.
Áleýmettik jumys oryndaryna osyǵan oraı biliktiligi bar azamattar jiberiledi.
Jastar tájirıbesi: barlyq menshik formasyndaǵy kásiporyndar men uıymdarda uıymdastyrylady. Jastar tájirıbesi boıynsha jumys ýaqytsha sıpatqa ıe. Eńbekaqyny tóleý respýblıkalyq nemese jergilikti bıýdjet arqyly júzege asyrylyp, 25 aılyq eseptik kórsetkish – 69 450 teńgeni (salyqty, mindetti áleýmettik aýdarymdar, paıdalanylmaǵan eńbek demalysy jáne bank qyzmetteri úshin ótemaqylardy eskere otyryp) quraıdy.
«Tehnıkalyq jáne kásibı bilim alýǵa da múmkindik jasalǵan, ony meńgerýge joǵarǵy oqý oryndaryna túse almaǵan nemese kásibı tehnıkalyq bilimdi meńgergisi kelgen mektepterdiń 9-11synyp túlekteri shaqyrylady. Osy baǵytta biz 2,5 myń jasty jumyspen qamtýdy josparlap otyrmyz», - dedi D.Álkebaıuly.
