Negizgi maqsaty - emtıhannyń ashyqtyǵyn qamtamasyz etý jáne joǵary bilim berý júıesinde sybaılas jemqorlyq kórinisteriniń aldyn alý, sondaı-aq stýdentter men oqytýshylar arasynda adaldyq qundylyǵyn keńinen nasıhattaý bolyp tabylatyn aksııa aıasynda ótken kezdesýge Departament basshysynyń birinshi orynbasary Mıras Qarǵabaı, Halyqaralyq ýnıversıtettiń vıse-prezıdenti Ámirequl Abýov jáne Akademııalyq máseleler boıynsha departament dırektory Talǵat Nııazov, sondaı-aq «Túrkistan - Adaldyq alańy» jobalyq keńsesiniń menedjeri Erulan Tuńǵyshbaev qatysty. Kezdesýde joǵary oqý ornynyń qoǵam indetimen qarqyndy kúres júrgizý boıynsha atqaryp jatqan jumystary ortaǵa salyndy. Ýnıversıtet boıynsha barlyq emtıhandarǵa beınebaqylaý júrgizilgen jáne sessııanyń ótý barysyna proktorıng jasaıtyn arnaıy jumys toby qurylǵan. Onlaın emtıhandar moodle (dot.ayu.edu.kz) platformasynda jáne Zoom, Webex Meetings, Microsoft Teams qosymshalary arqyly ótýde. Sondaı-aq kezdesýde Parasattylyq ortalyǵy men arnaıy bekitilgen mamandar onlaın emtıhannyń ótý barysyn jiti qadaǵalap otyrǵany aıtyldy. Al Mıras Asqarbaıuly sybaılas jemqorlyqtyń aldyn alý boıynsha qoıylǵan senim jáshigindegi stýdent pikirlerin nazarǵa alý qajettigine toqtalyp, bilim berý oshaǵy - el erteńiniń berik irgetasyn qalyptastyrýda aıryqsha mańyzǵa ıe, sondyqtan jastar adal bilimmen azyqtanýy tıis ekenin aıtty.
Jıyndy qorytyndylaǵan Ámirequl Abýov Agenttiktiń bastamasymen Halyqaralyq ýnıversıtette qolǵa alynǵan birqatar jobanyń nátıjesine toqtalyp, sybaılas jemqorlyqsyz mádenıetti qalyptastyrýda stýdent jastardyń belsendiligi joǵary ekenin jetkizdi.
