«Qalanyń aýmaǵynda barlyǵy 410 kamera jumys isteıdi. Jyl basynan beri beınebaqylaý kameralary 3675 jol qozǵalysy qaǵıdalaryn buzý men 1824 ózge de ákimshilik quqyq buzýshylyqtardy anyqtaýǵa septigin tıgizdi. Negizinen bul faktiler alkogoldik ishimdikterdi ishý nemese masań kúıde qoǵamdyq oryndarǵa kelý sııaqty usaq buzaqylyq. Al 82 jaǵdaıda qylmys ashyldy», - deıdi Petropavl qalasy PB Jedel basqarý ortalyǵynyń bastyǵy, polısııa podpolkovnıgi Nurlan Muhametjanov. Mysal úshin ol 11 mamyrda keshkisin Medvedev kóshesindegi úıdiń aýlasynan urlanǵan «Volkswagen Passat» avtokóligi týraly aıtty. Kólikti aıdap áketken birlesip spirttik ishimdik ishken jábirlenýshiniń 31 jastaǵy tanysy ekendigi belgili boldy. Atalǵan fakti Qylmystyq kodekstiń «Kólik quralyn quqyqqa syıymsyz ıelenip alý» baby boıynsha Sotqa deıingi tergep-tekserýlerdiń biryńǵaı tizilimine engizilgen. Qazir avtomobıl ıesine qaıtarylyp, al kúdikti kólik quralyn masań kúıde júrgizgeni úshin ózine taǵaıyndalǵan 20 táýlik ákimshilik qamaýǵa alý jazasyn ótep shyqty.
Sonymen qatar beınebaqylaý kameralary 39 urlyq pen 14 buzaqylyqty ashýǵa kómegin tıgizgen.
Patrýldik polıseılerdiń beınejetondary polıseıler men azamattardy ǵana túsirip qoımaıdy, sondaı-aq olar quqyq buzýshylyqty resimdeý kezinde aıǵaq bolyp tabylady. 14 patrýldik avtomobılde bir mezgilde 360 gradýsty túsiretin kameralar ornatylǵan. Jazylǵan jazbalardyń biri 18 mamyr kúni jol qozǵalysy erejesin óreskel buzýǵa jol bergen júrgizýshini jaýapqa tartýǵa negiz boldy.
QYZYLJAR
