Osyndaı qoldaýy úshin Germanııa kompanııanyń 20 paıyzy men baqylaý keńesindegi eki orynǵa qol jetkizedi. Kompanııa basshylyǵy Germanııa men Eýropa Odaǵynyń bul qoldaýyn qabyldaǵanyn senbi kúni resmı túrde málimdedi. Onymen qosa Frankfýrt pen Mıýnhen sııaqty iri qalalardaǵy áýejaılardyń ushyp-qoný jolaqtaryn da qoldaýshylarǵa ótkizýi múmkin ekendigin habarlady. Mundaı kelisim Germanııa úkimetin kompanııanyń eń úlken úleskeri etEdi.
Sheshim qabyldanǵanymen, naqty bekitilgen joq. Qos tarap 25 maýsymda qaıta kezdesip, jalpy otyrys ótkizedi. Quramynda Belgııa, Aýstrııa, Shveısarııa áýe kompanııalary bar Lufthansa toby koronavırýs pandemııasy kezinde 1 mln eýrodaı shyǵynǵa ushyraǵan. Kompanııanyń dırektorlar keńesiniń basshysy Karl-Lıýdvıg Kleı «Bul Lufthansa úshin qıyn ári aýyr jol. Germanııanyń federaldy úkimetimen birge álemdik áýe kóligi ındýstrııasyndaǵy aldyńǵy qatardaǵy ornymyzdy saqtap qalýdy negizgi maqsatymyz retinde belgiledik», dedi. Al atqarýshy dırektor Karsten Shpor qıyn kúnderde kompanııaǵa adal qyzmet etken qyzmetkerler men basqa da úleskerlerge rızashylyǵyn bildirdi.
Buǵan deıin áýe kóliginiń alyby úkimettiń qoldaýyn qabyldamaıtynyn aıtqan bolatyn. Olar Eýroodaqtyń talaptary tym qatal bolyp, kompanııa jumysy men bedeline áser etedi dep qoryqqan-dy. Al Germanııa úkimeti kompanııa pandemııaǵa deıin jaqsy tabys tapqanyn, alaıda qazirgi jalǵyz shara osy ekenin jetkizdi. Degenmen, úkimettiń áýe kóligi sektoryna kóz tikkenin basqa qurylymdar synǵa aldy. Bul kelisimge kelý de uzaq ýaqytty talap etti. О́ıtkeni Germanııanyń Brıýsselmen kelisimi ońaıǵa soqqan joq. Kansler Angela Merkel kompanııaǵa qatysty federaldy baqylaýdy azaıtýdy suraǵan bolatyn.
