Mınneapolıs shtatynyń turǵyny Djord Floıd polısııa qolynan qaza tapqannan keıin bastalǵan tolqýlar áli tynshymaı tur. Nıý-Iork, Sıetl sııaqty úlken qalalardyń qataryna Vıdor, Tehas, Harv, Morıon, Ogaıo sııaqty kishigirim qalashyqtar qosyldy. Narazylar memlekettegi násildik kemsitýshilik men ádiletsizdikke narazylyǵyn bildirýde.
Narazylyq jaı qarsylyqtarmen toqtamaı, halyqtyń úlken dúkenderdi tonaýyna ulasty. Azamattar qala ortalyǵyndaǵy dúkenderge basyp kirip, qalaǵanyn alyp shyǵýda. AQSh úkimeti muny arandatýshylar uıymdastyryp otyr deıdi. Sonymen qatar bul áreketter koronavırýs pandemııasy saldarynan qabyldanǵan jańa erejelerdi buzyp otyr. Eldegi qashyqtan jumys isteý, mektepter men ýnıversıtetterdi onlaın rejimge kóshirý sııaqty saqtyq sharalaryn yǵystyrdy.
Djordj Floıd týǵan Soltústik Karolına shtatynda marqumǵa arnalǵan memorıaldy taqta ornatylyp, taǵzym etýge kún saıyn myńdaǵan adam jınalady. Vashıngtondaǵy qarsylyqtar kúsheıe tústi. Kóshedegiler «Eldiń bas qalasyn basyp alsaq, basqa shtattardy kúıretý eshteńe emes. Budan eshkim aman qalmaıdy. Polısııa Amerıka azamattaryna ádiletsizdik kórsetpeýi kerek», dep málimdedi.
Al narazylardy tyńdaýǵa shyqqan Mınneapolıs shtatynyń meri Djeıkob Freıdti halyq «Uıat! Djeıkob, úıine qaıt» dep alańnan qýdy. 38 jastaǵy qala basshysy 2018 jyly turǵyndarǵa halyq pen polısııa arasyndaǵy qarym-qatynasty durystaımyn dep sóz bergen eken. BAQ eldegi jaǵdaıdyń qorqynyshty fılmderdegi keıipke engenin jazady.
Dúısenbide Aq úı mańyndaǵy Lafaıet alańyna jınalǵandardy polısııa rezeńke oqpen atyp, kózden jas aǵyzatyn gaz qoldanǵan bolatyn. Halyq mundaı áreketke ashýlanyp, polısııa kólikterin, úılerdi qıratýǵa kóshti. Narazylyq boıynsha sarapshy, Ulybrıtanııa ýnıversıtetiniń professory Mıshel Hamılton polısııanyń bul áreketi jaqsylyqqa aparmaıtynyn, quqyq qorǵaý organdarynyń qyzmetkeri saqtyqqa jaýap berýi kerek ekenin aıtady.
