Bul joba kásipkerlerge bir kózden ortalyqtandyrylǵan memlekettik jáne servıstik qyzmetterdi jedel alýǵa kómektesedi. Munda nıshalyq jobalardy súıemeldeý, jeńildetilgen 1% nesıe berý, "1000 saýda orny" baǵdarlamasy boıynsha jer ýchaskelerin alý jáne qarjy sektory, taýardy jyljytý, ınvestısııa, sıfrlyq, quqyqtyq, kompetensııa jáne memlekettik qyzmet kórsetiledi. Osylaısha, kásipkerler men ınvestorlar úshin biryńǵaı hab qurylady. Sonymen qatar, munda bastaýysh kásipkerlerge «Bıznes-mektep», «Bastaý-bıznes» oqytý baǵdarlamalary boıynsha kásipkerliktiń negizi oqytylady.
Ashylý rásimine qatysqan qala ákimi Murat Áıtenov óńirdegi ekonomıkalyq jaǵdaıdy jaqsartý boıynsha qabyldanǵan antıkrızıstik sharalar óz jemisin beretinine senimdi ekenin jetkizdi. Sondaı-aq, baǵdarlamada mejelengen mıkroqarjy uıymyn quryp, jeńildetilgen nesıe, nıshalyq jobalar men "egistikten dúken sóresine deıin" jáne memlekettik baǵdarlamalardyń búkil múmkindikterin barynsha qoldanýdy aıtty.
Is-shara barysynda sóz alǵan Shymkent qalasy kásipkerler Palatasynyń dırektory Nurlan Qabıshtaev memlekettik baǵdarlamalar aıasynda kásipkerlik salasynda jyl sońyna deıin jalpy
29,5 mlrd. teńge ıgerý josparlanǵanyn atap ótti.
"Baǵdarlama aıasynda nıshalyq jobalardy iske asyrý qolǵa alynyp jatyr. Qazirgi tańda, kásiporyndarmen osy nıshalyq jobalardyń tizimin jasaqtaý ústindemiz. Búginde 80-nen astam nıshalyq jobalar jasaqtaldy. Osynyń aıasynda, biz ımport almastyrýdy qamtamasyz etip, 400 adamdy jańa jumys ornymen qamtyp, 100 jańa taýardyń túrin jáne jańa 30 kásiporyn ashýdy kózdep otyrmyz. Bul bastamany iske asyrý maqsatynda qurylyp jatqan Mıkroqarjy uıymy arqyly qarjylandyrýdy kózdep otyrmyz. Budan bólek, Mıkroqarjy uıymy "Eńbek" baǵdarlamasy aıasynda bólinip jatqan qarjylardy da ıgerýge yqpalyn tıgizedi", - dedi Nurlan Qabıshtaev.
Sonymen qatar Memleket basshysynyń tapsyrmasyna sáıkes Jambyl, Almaty jáne Túrkistan oblystarynda "Egistikten dúken sóresine deıin" pılottyq jobalary iske qosylatyn bolady. Bul rette túrkistandyq sharýalarmen óndiriletin taýarlardy ótkizý naryǵynyń birden bir núktesi Shymkent qalasy bolyp tabylmaq. Túrkistan oblysynda óndiriletin aýylsharýashylyq ónimderin Shymkent qalasynda qaıta óńdep, fasovka jáne ýpakovka jasaý arqyly tamaq ónerkásibin damytýǵa múmkindik bar. Bul óz kezeginde áleýmettik mańyzy bar taýarlardyń baǵasyn turaqtandyrýǵa, ózindik qosalqy sharýashylyqtyń (LPH) kóleńkeli ekonomıkadan shyǵýyna jáne qosymsha jumys oryndaryn ashýǵa yqpal etedi.
