Eń birinshi aıaldaǵan nysan qaladaǵy №2 mýzyka mektebi boldy. Qabyrǵasy 1948 jyly qalanǵan bilim ordasynda kúrdeli jóndeý degen ómiri júrgizilmegen eken. Bul týrasynda atalǵan mekteptiń dırektory Marat Májıtov aıtyp berdi.
– Mektepte sońǵy ret aǵymdaǵy jóndeý 29 jyl buryn jasalǵan. Jylda bólinetin qarjy maıda-shúıde jumystarǵa ǵana jetýshi edi. Qazir kúrdeli jóndeý bastaldy. Bárin de jańasyna aýystyramyz. Endi bizde jańa jylý jáne elektr júıesi, santehnıka bolady. Biz úshin bul – úlken qýanysh. Jazǵy demalystan soń balalardy jańartylǵan mektep kútip alatyn bolady, – deıdi mektep basshysy qýanyshyn jasyra almaı.
Oqýshylarynyń sany 650 bala bolatyn bul mekteptiń jóndeýine bıýdjetten 78 mln teńge bólingen.
Budan keıin oblys basshysy Maıqudyq eldi mekenindegi №13 mektepke at basyn tiredi. 34 jyl buryn salynǵan mektepte kúrdeli jóndeý birinshi ret júrgizilip jatyr. Ǵımarattyń shatyry aýystyrylyp, qasbeti jańartylady. Jańa terezeler, jylý júıesi ornatylyp, elektr montajdaý jumystary júrgiziledi. Sondaı-aq, mektep aýmaǵy kórkeıtilip, jańa sharbaqpen qorshalmaq.
– Mektep – qaladaǵy belgili nysandardyń biri. Jóndeý jumysyna qomaqty qarjy bólindi. Bárin de balalar úshin jasap jatyrsyzdar, sondyqtan jumystyń sapasyn muqııat qadaǵalańyzdar. Sizderge úlken jaýapkershilik artylyp otyr. Jumys bitken soń, ózim tekseretin bolamyn, – dedi J.Qasymbek jóndeý jumystarymen aınalysyp jatqan qurylys kompanııasynyń basshysyna qarata.
Jalpy, Qaraǵandy qalasynda barlyǵy 133 bilim berý nysany bar. Bıyl bárine de jóndeý júrgiziledi. Onyń ishinde 29 mektepte kúrdeli jóndeý, al 41 bilim oshaǵynda aǵymdaǵy jóndeý jumystary qolǵa alynady. Sonymen qatar 95 mekteptiń aýlalary abattandyrylady.
Qaraǵandy qalalyq bilim bóliminiń basshysy Gúlsim Qojahmetova buryn mektep aýlalaryn abattandyrýǵa aqsha bólinbegenin jáne bilim mekemeleriniń aýmaqtaryn dırektorlar keshege deıin óz kúshterimen rettep kelgenderin aıtty. Al kúrdeli jóndeýden jyl saıyn eki mektepti ótkizýge ǵana múmkindik bolǵan.
– Bıyl jóndeý jumystaryna mol qarajat bólingenine qýanyshtymyz. Endi barlyq nysandy tolyqtaı retke keltirýge múmkindik týdy, – deıdi ol.
Oblys basshysy mektepter men balabaqshalardan basqa Maıqudyqtaǵy mádenıet úıinde, «Nurbı» aýla klýbynda jáne «Lıteıshık» stadıonynda bolyp, ondaǵy jóndeý jumystarynyń qalaı atqarylyp jatqanyn tekserdi. Qazir jurttyń salamatty ómir saltyna degen kózqarasy ózgergen. Sol sebepti de atalǵan sport nysany jergilikti turǵyndardyń jiti nazarynda. Jergilikti halyqtyń ótinishin jerge tastamaǵan oblys ákiminiń tapsyrmasynan keıin, qarjylandyrý kózi tabylyp, qazir atalǵan stadıonda jóndeý jumystary júrip jatyr. Jóndeý júrgizip jatqan «Dorstroıtrest» JShS dırektorynyń qurylys jónindegi orynbasary Maksım Vorobev jumystyń tamyz aıynda aıaqtalatynyn málimdedi. Stadıonda jasandy kógal alańy, júgirý joldary, qorshaý, jaryqtandyrý tirekteri, kıim sheshetin oryndar, dárethana, ákimshilik jáne kúzet bloktary bolady.
J.Qasymbek Maıqudyqtaǵy aýlalardy abattandyrýǵa, ol jerlerde sporttyq nysandardyń bolǵanyna aıryqsha nazar aýdarylatynyn atap ótti. О́ńir basshysy sol jerde Oktıabr aýdanynyń ákimi Meıram Kojýhovqa 150 myńǵa jýyq halyq turatyn Maıqudyq eldi mekeninde taǵy da on jańa fýtbol alańyn salýdy tapsyrdy. Sondaı-aq merdiger kompanııa ókiline stadıondaǵy jóndeý jumystaryn ýaqytynda jáne sapaly etip bitirý keregin eskertti.
Jumys saparynyń sońynda oblys ákimi «Jumyspen qamtýdyń jol kartasy» baǵdarlamasyn júzege asyrýdyń mańyzy men jaýapkershiligin taǵy bir márte eske saldy. «Barlyq jumys kestedegi merzimnen aýytqymaýy kerek. Jergilikti ákimder jumys sapasyn udaıy baqylap otyrýy tıis», dep qorytty J.Qasymbek.
QARAǴANDY
