Vedomstvo basshysynyń aıtýynsha, 2019 jyly eksport 58 mlrd dollarǵa jetip, tutastaı syrtqy saýda aınalymy 96 mlrd dollarǵa ósken. Alaıda tótenshe jaǵdaı men karantın rejimi ulttyq ekonomıkaǵa teris áser etip, iskerlik belsendiliktiń tómendegenin sala mınıstri joqqa shyǵarmady. Aıtalyq bıylǵy 4 aıdyń qorytyndysy boıynsha IJО́ 0,2%-ǵa tómendep, taýarlar óndirisi 5,8%-ǵa ósken. Dese de qyzmetter óndirisi 4%-ǵa qysqaryp, onyń nátıjesi IJО́-niń 0,2%-ǵa quldyraýyna alyp keldi. Mamyr aıynda jyldyq ınflıasııa 6,7% deńgeıinde baıqaldy. Negizgi kapıtalǵa quıylǵan ınvestısııalardyń ósý qarqyny 0,9%-dy kórsetti. Bul byltyrǵy kórsetkishten tómen nátıje.
«Ekonomıkany qalpyna keltirý úshin jedel sharalar qolǵa alynyp, 2020 jyldyń sońyna deıin keshendi jospar qabyldandy. Birinshiden, Memleket basshysynyń tapsyrmasyna sáıkes, Úkimet ekonomıkany qoldaýǵa arnalǵan shuǵyl 2 paket ázirledi. Atap aıtqanda, shaǵyn jáne orta bıznes sýbektileri salyqtyq jáne áleýmettik tólemderden bosatylyp, onyń merzimin keıinge qaldyrý usynyldy. Mundaı jeńildikter otandyq agroónerkásiptik keshen ókilderine, saýda jáne oıyn-saýyq ortalyqtaryna, IT kompanııalarǵa, qoǵamdyq tamaqtaný, qonaqúı, týrızm sekildi basqa da qyzmet kórsetý salalaryna berildi. Shaǵyn jáne orta bıznesti jeńil nesıemen qamtý tetigi aıtarlyqtaı keńeıtildi. Bul baǵyttaǵy nesıeniń kólemi 1 trln teńgege artty. Naqty aıtsaq, «Qarapaıym zattar ekonomıkasy» baǵdarlamasyna 400 mlrd teńge jáne Ulttyq bank jelisimen 600 mlrd teńge qarastyrylǵan. «Bıznestiń jol kartasy» jáne «Qarapaıym zattar ekonomıkasy» baǵdarlamalary boıynsha qamtylatyn salalar aıtarlyqtaı keńeıtildi. Qaryz alýshylar úshin qorytyndy mólsherleme 6% deńgeıinde belgilendi», dedi R.Dálenov.
Ekonomıkany turaqtandyrýǵa baǵyttalǵan keshendi jospar naqty sharalardy qamtıtyn qoldanbaly sıpatqa ıe. Soǵan sáıkes, ónerkásipti damytý qoryn qurý kózdelip otyr. О́ńdeýshi sektordaǵy kásiporyndardy 3%-dyq jeńildik mólsherleme boıynsha nesıeleý júıesin iske qosý qarastyrylady.
R.Dálenovtiń sózine súıensek, shaǵyn jáne orta bıznesti qoldaý úshin Ulttyq bank jáne «Bıznestiń jol kartasy-2025» jelileri boıynsha qyzmet túrleri keńeıtilip, nesıeleý rásimderi jeńildedi. Sondaı-aq «Bıznestiń jol kartasy-2025» baǵdarlamasy aıasynda «mıkronesıeleý» baǵyty qurylyp, bıznesti 6%-dyq mólsherlemeden aspaıtyn sýbsıdııamen qamtý josparlanýda.
Spıker óńirlerdi damytýǵa arnalǵan «Aýyl – el besigi» jáne «Dıplommen – aýylǵa!» jobalary arqyly atqarylǵan jumystarǵa da toqtaldy. Máselen, byltyr «Aýyl – el besigi» jobasynyń kómegimen 53
aýylda 34 mlrd teńgege 520 joba júzege asyrylǵanyn aıtty. Onyń ishine aýyldaǵy joldardy, mektepterdi, aýrýhanalardy, emhanalardy salý, jaryqtandyrý, sport alańdaryn, dene shynyqtyrý-saýyqtyrý keshenderin jáne basqa da ınfraqurylymdyq nysandar salý kiredi.
«2020 jyly qarjylandyrý 3 esege, qamtylatyn aýyl sany 4 esege ósti. Iаǵnı «Aýyl – el besigi» 216 aýylda 98 mlrd teńge somasyna 920 jobany júzege asyrýǵa múmkindik beredi. Tutastaı aıtqanda, 2022 jyldyń sońyna deıin qajetti is-sharalar 3 561 aýylda júzege asyrylady», dedi mınıstr.
R.Dálenov bıznesti tıimdi júrgizýdi anyqtaıtyn Doing Business halyqaralyq reıtınginde Qazaqstannyń pozısııasy jaqsaryp kele jatqanyn aıtty. Búginde elimiz 25-orynda nyq ornalasqan. Spıker atalǵan reıtıng kásipkerlikti damytýǵa, sondaı-aq salalyq zańnamany jetildirýge septesetinin alǵa tartty. Jaǵymdy dınamıkaǵa kelisimsharttardyń oryndalýyn qamtamasyz etý (4-oryn), mınorıtarly ınvestorlardy qorǵaý (7-oryn) men kásiporyndardy tirkeýdegi (22-oryn) jetistikter áser etti. Sonymen birge halyqaralyq saýda (105-oryn), elektr jelilerine qosylý (67-oryn), tólem qabilettiligine ruqsat berý (42-oryn) baǵyttarynda tómen nátıje baıqalǵan dep naqtylady jaýapty organ basshysy.
