Ekonomıkanyń, bank salasynyń jaı-kúıi, respýblıkalyq bıýdjettiń atqarylýy, memlekettik satyp alýdaǵy jergilikti qamtý týraly ulttyq ekonomıka mınıstri R. Dálenov, Ulttyq bank tóraǵasy E. Dosaev, qarjy mınıstri E. Jamaýbaev, ónerkásip jáne energetıka sektoryndaǵy jaǵdaı týraly ındýstrııa jáne ınfraqurylymdyq damý mınıstri B. Atamqulov pen energetıka mınıstri N. Noǵaev, agroónerkásip keshenindegi ahýal týraly aýyl sharýashylyǵy mınıstri S. Omarov, óńirlerdiń damýy týraly Almaty oblysynyń ákimi A. Batalov, Qaraǵandy oblysynyń ákimi J. Qasymbek, Soltústik Qazaqstan oblysynyń ákimi Q. Aqsaqalov baıandady.
Bıylǵy qańtar-mamyr aılarynda JIО́ 2019 jyldyń sáıkes kezeńine qaraǵanda 1,7%-ǵa tómendedi, bul pandemııadan týyndaǵan álemdegi jáne aımaqtaǵy iskerlik belsendiliktiń kúrt quldyraýyna, sondaı-aq shıkizat pen kapıtaldyń halyqaralyq naryqtaryndaǵy turlaýsyzdyqqa baılanysty.
Sonymen qatar Úkimet qabyldap jatqan sharalar men ulttyq ekonomıkada jınaqtalǵan turaqtylyq QR ekonomıkasynyń naqty sektorynyń senimdi ósý qarqynyn qamtamasyz etýge jol ashty. Taý-ken ónerkásibiniń kólemi 5,2%-ǵa, óńdeý ónerkásibi – 4,9%-ǵa, onyń ishinde mashına jasaý – 18,5%-ǵa, farmasevtıka – 21,2%-ǵa, jeńil ónerkásip – 10,8%-ǵa, qurylys materıaldaryn óndirý – 12,3%-ǵa ósti. Qurylys kólemi 5,9%-ǵa ósti, saýda balansynyń oń saldosy qamtamasyz etildi.
Aýyl sharýashylyǵy jalpy óniminiń kólemi 2,2%-ǵa ósti. Kóktemgi egis jumystary ońtaıly merzimde aıaqtaldy, olardyń qorytyndysy boıynsha egis alqaby 237,7 myń ga artyp, 22,5 mln ga qurady.
Halyqty jumyspen qamtýdy qoldaý sharalary belsendi túrde iske asyrylyp jatyr. Bıyl jumysqa ornalasýǵa járdemdesý boıynsha keshendi sharalarmen QR 1,22 mln azamaty qamtylady.
Karantın rejımin kezeń-kezeńmen jeńildetý aıasynda qyzmet kórsetý sektoryndaǵy iskerlik belsendilik serpindi túrde qalpyna keltirilip jatyr. Máselen, mamyr aıynda sáýirmen salystyrǵanda saýda (+28,3%), kólik sektorynda (+20,7%) jáne halyqqa qyzmet kórsetý (+28,8%) salasynda aıtarlyqtaı ósim baıqaldy.
Osy jyldyń bes aıynyń qorytyndysy boıynsha negizgi kapıtalǵa salynǵan ınvestısııalar kólemi ótken jyldyń sáıkes kezeńimen salystyrǵanda 0,1%-ǵa ósti. Sonymen qatar mamyr aıynda bıylǵy sáýir aıymen salystyrǵanda bul kórsetkish 32%-ǵa artty. Oǵan qosa negizgi kapıtalǵa salynǵan jeke ınvestısııalar kóleminiń ósimi 25,7%-dy qurady.
"Bizdiń mindetimiz – qysqa merzimde ekonomıkanyń daǵdarysqa deıingi damý qarqynyn qalpyna keltirý. Buǵan ekonomıkany qoldaý jáne osy jyldyń sońyna deıin ekonomıkalyq ósimdi qalpyna keltirý jónindegi keshendi jospardy iske asyrý boıynsha biz qabyldaǵan shuǵyl sharalar yqpal etýi tıis", — dedi A. Mamın.
Negizgi kórsetkishter boıynsha áleýmettik-ekonomıkalyq damýdyń ozyq ósý qarqyny Qaraǵandy, Soltústik Qazaqstan, Almaty jáne Qostanaı oblystarynda qamtamasyz etilgen, ortasha respýblıkalyq mánderge Batys Qazaqstan, Jambyl, Aqmola, Túrkistan, Aqtóbe, Shyǵys Qazaqstan, Pavlodar oblystarynda, Nur-Sultan jáne Almaty qalalarynda qol jetkizildi, keıbir kórsetkishter boıynsha respýblıkalyq deńgeıden tómen óńirler — Atyraý, Qyzylorda, Mańǵystaý oblystary, sondaı-aq Shymkent qalasy.
Úkimet basshysy óńirlerdiń Ekonomıkalyq ósimdi qalpyna keltirýdiń keshendi jospary men memlekettik baǵdarlamalardy iske asyrý, otandyq óndiristi barynsha qoldaý, ınvestısııalar tartý, eksportty ilgeriletý, halyqtyń jumyspen qamtylýyn saqtaý jáne turaqty jumys oryndaryn qurý úshin barlyq sharalardy belsendi túrde qabyldaý qajettigin atap ótti.
"Qazirgi jaǵdaıda bıýdjet qarajatyn utymdy ári tıimdi jumsaý qajet. Árbir teńge ekonomıkaǵa paıda ákelýi tıis", — dedi A. Mamın.
Premer-Mınıstr jarty jyldyń qorytyndysy boıynsha ortalyq memlekettik organdar men ákimdikter jumysynyń tıimdiligi Memleket basshysy Qasym-Jomart Toqaevtyń tóraǵalyǵymen ótetin Úkimettiń keńeıtilgen otyrysynda qaralatynyn atap ótti.
