Keıingi jyldary Almatyda aǵashtardyń azaıyp ketkenine, aýasynyń lastanýyna baılanysty máseleler jıi kóterilip kelgeni málim. Osy olqylyqtyń ornyn toltyrý úshin atqarylyp jatqan jumys ta az emes syńaıly. Qalanyń Jasyl ekonomıka basqarmasynyń málimeti boıynsha byltyr #JasylAlmaty aksııasy aıasynda 135 myń jasyl jelek otyrǵyzylǵan. Kóshetter kópshilik jınalatyn aýmaqtarǵa, onyń ishinde mektepterdiń, aýrýhanalardyń aınalasyna, Bolaı taýynyń, Kóktóbeniń bókterlerine, Atakenttiń, Atletter aýyly men «Alataý» teatrynyń alańdaryna egildi.
Salystyrmaly turǵydan qarasaq, megapolıstegi eń jasyl eldi meken Medeý aýdanynda 472 myńnan astam aǵash bar eken. Al Naýryzbaı jáne Alataý aýdandarynda shamamen 202 myń jáne 179 myń aǵash ósip tur.
Jasyldandyrý boıynsha odan keıingi oryndy Túrksib aýdany ıelengen, munda aǵash sany – 431,5 myń túp. Aǵash sany boıynsha úzdik úshtikke Bostandyq aýdany da kiredi. Mamandar mundaǵy 380 myń túp aǵashty sanap shyqty. Áýezov aýdanyndaǵy aǵashtar sany 100 myńǵa kem, ıaǵnı 255 myńǵa jýyq. Jetisý aýdanynda 220 myńnan astam, al Almaly aýdanynda 213 myń aǵash bar.
Osy arada aǵashtar otyrǵyzylý kórsetkishine kópshilik oryndar ǵana iligip otyrǵanyn aıta ketelik. Bul qatarda jeke aýmaqtardaǵy, zırattardaǵy, respýblıkalyq mańyzy bar jerlerdegi jasyl jelektiń aýmaǵyna toqtalǵan joqpyz.
Búgingi tańda qalada barlyǵy 2 352 myń aǵash bar. Onyń ishinde jaqynda egilgen shaǵyn kóshetter men «aýyryp» turǵan aǵashtardan bólek, japyraǵyn keńge jaıǵan aýqymdy aǵashtardyń sany 1,8 mln. Sondyqtan aǵashtardy zııankesterden qorǵaý jáne saýyqtyrý jumystary júrýde.
«Jasyl jelekti óńdeý jumystary qorǵaýdyń bıologııalyq, qajet bolǵan jaǵdaıda hımııalyq ádisimen júrgizilýde. Aldymen 5-7 kún boıy zııankesterdiń damý fenologııasyna, taralýyna monıtorıng jasalyp, sodan keıin ǵana jumysty bastadyq», deıdi Jasyl ekonomıka basqarmasynyń ókilderi. Jasyl jelekti óńdeý túnde jasalatynyn aıta keteıik.
ALMATY
