Aýdan ákimdiginiń málimetinshe, bıyl «Aýyl – el besigi» baǵdarlamasy boıynsha mundaǵy sý qubyry kúrdeli jóndeýden ótip, 107 úıge aýyz sý jetkizilipti.
Sý qubyry qurylysynyń qaıta qalypqa kelýine respýblıkalyq bıýdjetten 118,8 mıllıon teńge, oblystyq bıýdjetten 13,2 mıllıon teńge bólinipti.
Árıne turǵyndar qýanyshty. Memlekettik baǵdarlamalar shaǵyn aýyldarǵa da jete bastady. Avtobazalyqtarǵa da az qarajat bólingen joq. Bul árıne quptarlyq jaǵdaı. Biraq osy aýyldyń aty qulaqqa ersileý estilmeı me?
Ońtústikke baryp, soltústikke qonys aýdarýshylarǵa «Avtobazaǵa kóship kelińizder» desek qazaqtyǵynyń qaımaǵy buzylmaǵan aǵaıyndar túsinbeı qalýy múmkin ǵoı.
Sondaı-aq Avtobazaǵa «jalǵasqan» Bashmachnoe, Veselaıa Rosha, Lesnoı, Mıhaılov, Novomır, Ozernyı, Irtyshsk sekildi aýyldyq aýmaq ataýlary da ózgertýge suranyp turǵany talassyz. Jergilikti bıliktiń osy tóńirekte oılanǵandary jón shyǵar.
Pavlodar oblysy,
Jelezın aýdany
