Alaıda Túpqaraǵan aýdanynda bolǵan tosyn jaıt turǵyndardy tosyltyp ári tańyrqatyp qoıdy.
Teńizge demalýǵa barǵan bes adamdy – úlkeni 1999 jyly týǵan jigit pen eń kishisi 2013 jyly týǵan balalardy ıtbalyqtar tistep alǵan.
Túpqaraǵan aýdandyq aýrýhanasynyń qabyldaý bólimine eki balany jedel medısınalyq járdem brıgadasy jetkizse, qalǵan úsheýi ózderi baryp dárigerlerge qaralady. Dárigerler balalarda sol bilek pen oń jaq bilektiń tisteýin anyqtady. Kishkentaı naýqastarǵa alǵashqy hırýrgııalyq óńdeýler men qutyrmaǵa qarsy vaksına egilgen, odan keıin olar úılerine qaıtarylǵan. Aýrýhanaǵa jatqyzý qajettiligi bolmaǵan.
Aldaǵy ýaqytta medısınalyq kómektiń qajettiligi bolsa, mekenjaıy boıynsha jalpy tájirıbelik dárigerdi úıge shaqyrtyp, ári qaraı em-dom sharalaryn alady. Al medısına qyzmetkerleri oqıǵaǵa oraı sýǵa shomylý maýsymy kezinde saqtyq sharalaryna kóbirek kóńil bólýge shaqyrýda.
Itbalyq – momyn sıpatty janýar. Kónekózder de, ekolog mamandar da olardyń adamǵa shabýyldaýyn buryn-sońdy estimegendikterin aıtady.
– Itbalyqtar adamǵa tıispeıdi, kerisinshe alystan kórgen sátte qashady. Degenmen bala kezimde úlkender «teńizge adam bar jerden túsińder, áıtpese ıtbalyq tistep alady» deıtin. Bıolog maman retinde aıtarym – ıtbalyqtar adamǵa eki jaǵdaıda shabýyl jasaýy múmkin. Birinshisi – qorqý sezimi áli qalyptaspaǵan jas ıtbalyqtar oınaý maqsatynda tisteýi múmkin, ekinshisi – qutyrma sııaqty aýrýǵa shaldyqqan janýarlar bolýy múmkin, al olarda qorqý sezimi múlde bolmaıtyny túsinikti. Sondyqtan teńizge túskende ıtbalyq kórseńiz uıaly telefonǵa sýretke túsirý syndy qyzyǵýshylyqpen oǵan jaqyndaýǵa bolmaıdy, tezirek jaǵaǵa shyǵyp, alystan baqylap, qyzyqtaǵan jón. Eger tistep alǵan jaǵdaıda der kezinde dárigerlik qyzmetke júgingen abzal. Sondaı-aq ıtbalyqtardy ashtyqtan shabýyldady deýge kelmeıdi, sebebi olar sýdaǵy balyqtarmen qorektenedi, – deıdi eko-ambassador, «Tabıǵı orta» Batys Qazaqstan úkimettik emes uıymdary óńirlik assosıasııasynyń keńes tóraǵasy Ádilbek Qozybaqov máselege oraı pikirleskenimizde.
Qaqaǵan qysta – aqpan aıynda saryshaıan shaqqan mańǵystaýlyqtar endi ıtbalyqtardyń adamǵa shabýyldaýyn túsine almaı otyr...
Mańǵystaý oblysy
