Naýqasqa tirshilik nárin syılap, kóńilinen kúdikti aryltyp, kózine úmit otyn jaǵatyn, qaıǵysyn azaıtyp, qýanyshyn arttyratyn da osy abzal jandar. Dárigerlerdiń damylsyz jumysyn, naýqastyń ómirin saqtap qalý jolyndaǵy ólsheýsiz eńbegin bir kisideı bilemin desem, artyq aıtqandyq bolmas. Oǵan sebep, ómirlik serigim, marqum Tóleýhan Turysbekuly da osy salada joǵary sanatty hırýrg-dáriger bolyp, qyryq jylǵa jýyq abyroıly qyzmet etti. Joldasym ár syrqattyń syryn uǵynyp, janyna tereń úńilip, jyly sózin aıamaı, meılinshe meıirimin tóge bildi. Mamandyǵyna degen mahabbatynyń, adamdarǵa degen aq adaldyǵynyń arqasynda óz ortasynda syıly, bedeldi boldy.
Álem jurtshylyǵyn álekke salyp, shartarapty sharpyǵan koronavırýs indeti bizdiń elimizdi de syrt aınalyp ótken joq. Aspanasty elinen bastaý alǵan aýrý azýyn aıǵa bilegen AQSh, Italııa, Ispanııa, Iran, Reseı sekildi medısınasy myqty degen elderdiń ózin eseńgiretip, sarsańǵa saldy. Bir mezette júzdegen, myńdaǵan adam máıitke aınaldy. El basyna kún týǵan eleń-alań shaqta etigimen sý keshkender, ıaǵnı medısına mamandary men tártip saqshylary jaǵdaıdy qalypta ustaý úshin qyzmetterin qaltqysyz atqaryp jatqandyqtaryn aıryqsha atap ótkenimiz jón. Tún balasy kirpik qaqpaı, indetpen alysyp, janyn sala jumys jasaǵandyqtyń nátıjesi bolar, adam shyǵyny azaıyp, aýrýdan aıyqqandar sany artýda. Elimizde aty jaman aýrýdyń aldyn alyp, qaýipsizdik sharalaryn qatań saqtaý maqsatynda karantın engizilip, kóptegen mekeme jumysyn toqtatty. Baıyppen baǵamdap, batyl qadamdar jasaıtyn basshymyz Qasym-Jomart Kemeluly Toqaev tabysynan aıyrylǵan jandarǵa tómengi jalaqy mólsherinde áleýmettik kómek taǵaıyndady jáne jumys júıeli júrip jatyr. Muny Prezıdentimizdiń qıyn-qystaý shaqta qanatymen sý sepken qarlyǵashtaı halyqqa kórsetken zor qoldaýy ári qamqorlyǵy dep bilemin. Sondaı-aq mindetterin múltiksiz oryndap jatqan medısına qyzmetkerlerine memleket tarapynan syıaqy retinde qomaqty soma bólindi. Bul da bolsa, basyn qaterge tikken búgingi kún batyrlarynyń baǵalanǵany, mańdaı ter men eren eńbektiń elengeni emes pe?! Shybyn janyn shúberekke túıgen árbir adamnyń amandyǵy úshin ajalmen alysyp, otbasynan jyraqtap, emhanany ekinshi úıi etken aq halattylarymyzdy qalaı ardaqtasaq ta az bolar...
«Bulyńǵyr kúnniń artynan bultty túre kún shyǵar» degendeı, keler kúnderden kúter úmitimiz mol. Bir jaǵadan bas, bir jeńnen qol shyǵaryp, birligimizdi bekem etsek, elimiz eńseni ezgen indetti eńserip, kópten kóksegen kóńildi kezderimizben qaıta qaýysharymyz haq.
18 maýsym – elimizdegi densaýlyq saqtaý salasy mamandarynyń tól merekesi. Osyndaı syndarly sátterde syr bildirmeı, unjyrǵalaryn túsirmeı, ultymyzdyń taǵdyryna uqyptylyqpen qarap, ustamdylyq tanyta uly murattardy oryndap júrgen el dárigerlerin mereıli merekelerimen shyn júrekten quttyqtaımyn. Mańdaıaldy maqtanyshtarymyzǵa myqty densaýlyq, temirdeı tózim, jumystaryna telegeı tabys tileı otyryp, qalyń eli qazaǵynyń ystyq yqylasy men sheksiz rızashylyǵyna bólensin degen nıetpen ózimniń analyq alǵysymdy bildiremin.
Ǵalııa BERTISQANOVA,
eńbek ardageri
