Maıkl S. Derbı
Wall Street Journal
Nıý-Iork Federaldyq rezervtik bankiniń prezıdenti Djon Ýılıams koronavırýstyń saldarynan bolǵan ekonomıkalyq qıyndyqtyń aıaqtalýy múmkin ekenin "Bloomberg" telearnasyna aıtyp berdi. Dese de alda ne bolary belgisiz bolǵandyqtan áli qıyn kúnder kútip turǵanyn jetkizdi.
Ýılıams myrza ekonomıkany qaıta qalpyna keltirý múmkin ekenine senimdi. Sebebi ulttyq banktiń qazirgi saıasaty el ekonomıkasyn jyl basyndaǵy kórsetkishke qaıta jetkizýge baǵyttalǵan.
Ashyq naryqtaǵy operasııalar jónindegi federaldyq komıtettiń vıse-tóraǵasy qyzmetin qosa atqartyn Ýılıams myrza Federaldyq rezervtik júıeniń el ekonomıkasyn qalpyna keltirýdiń barlyq qoljetimdi quraldaryn qarastyratynyn aıtty. Ol sondaı-aq Úkimet tarapynan turaqty qoldaý qazirgi sharalardyń tıimdiligin odan ári arttyrady deıdi. Daǵdaryspen kúreste Federaldyq rezervtik júıe maqsatty mólsherlemeni nólge deıin tómendetip, nesıe qunynyń biraz ýaqyt tómen bolatynyn málimdedi. Bank odan bólek oblıgasııalardy kóptep satyp ala bastaǵan jáne ekonomıkanyń iri sektorlaryna nesıe berýdi qolǵa alǵan.
Federaldyq rezervtik júıe ózge de sharalardy qarastyryp jatqan kórinedi. Olardyń biri qarjy daǵdarysynyń saldaryn basqarý jáne paıyzdyq mólsherlemelerdiń bolashaq baǵytyna qatysty tıimdi jetekshilikti qamtamasyz etý úshin quraldar jıyntyǵyn muqııat zerdeleý bolyp otyr. FRJ sondaı-aq kiristilik qısyǵyn da óz baqylaýyna almaqshy. Bul degenimiz ortalyq bank ár túrli óteý merzimine berilgen qaryzdarǵa qatysty sheshim qabyldaı alady.
"Bloomberg" telearnasyna bergen pikirinde Ýılıams myrza aldaǵy jyly ınflıasııa deńgeıi tómen bolady degen boljamymen de bólisti.
Ol sondaı-aq, kelesi aıda Ashyq naryqtaǵy operasııalar jónindegi federaldyq komıtettiń otyrysynda daǵdarystyń ekonomıkalyq saldarymen qatar, bazalyq boljamǵa da qatysty usynystar aıtylatynyna toqtaldy.
Sársenbi kúni onlaın kezdesýde Federaldyq rezervtik júıeniń basshysy Sent-Lýısa Djeıms Býllard bul ekonomıkalyq qıyndyq ári qaraı jalǵasa beretin bolsa saldary aýyr bolýy múmkin ekenin aıtty.
Býllard myrza sondaı-aq ınflıasııanyń ósýine qatysty kúmán bildirdi. Onyń boljaldy turaqtylyǵy ázirge deflıasııa jaıynda asa alańdamaýǵa sebep bola alady deıdi.
Býllard myrza Federaldyq rezervtik júıeniń sharalary men kiris qısyǵyn baqylaý sheshimine de baǵa berdi. Ol sarapshylardyń mólsherlemeler áli de uzaq ýaqyt boıy tómen bolatynyna senimdiligin alǵa tarta otyryp, Ortalyq banktiń stavkalardyń boljamyn basshylyqqa alýy úshin esh negizdiń joqtyǵyn atap ótti.
Ol óz sózinen keıin qoıylǵan suraqtardyń birine kiristilik qısyǵyn baqylaý máselesi áli de zertteýdi talap etetinin aıtyp, dál qazir bul strategııany júzege asyrýdy qısyndy dep eseptemeıtinin jetkizdi.
Daıyndaǵan
Merýert BÚRKITBAI,
"Egemen Qazaqstan"
