“Bıylǵy jyl mańyzdy datalarǵa toly. Bulardyń qatarynda Qazaqstan Respýblıkasynyń Konstıtýsııasy men Qazaqstan halqy Assambleıasynyń 25 jyldyǵy, Altyn Ordanyń 750 jyldyǵy, Uly Otan soǵysyndaǵy Jeńistiń 75 jyldyǵy, ál-Farabıdiń 1150 jyldyǵy, Abaı Qunanbaevtyń 175 jyldyǵy, Nyǵmet Nurmaqovtyń 125 jyldyǵy syndy mereıtoılar bar”, – dep atap ótti basqarma basshysy.
Álbette, oblystyń tynys-tirshiligine koronavırýs indetiniń ózgerister engizgeni belgili. Máselen, kóptegen is-sharalar, atap aıtqanda, chellendjder, dóńgelek ústelder, konferensııalar jáne basqa da tolyp jatqan kezdesýler men talqylaýlar qashyqtyqty saqtaı otyryp ótkizildi. Bulardyń basym kópshiligi Naýryz meıramyna, Qazaqstan halqynyń birligi kúnine, Jeńis kúnine, saıası qýǵyn-súrgin jáne asharshylyq qurbandaryn eske alý kúnine, Memlekettik rámizder kúnine oraılastyrylǵan edi. Sonymen qatar, Erlan Qusaıyn aqparattyq toptar jumysynyń da onlaın-formatqa aýystyrylǵanyn málim etti.
Qazirgi tańda oblysta “Rýhanı jańǵyrý” baǵdarlamasyn júzege asyrýǵa aıryqsha mán berilgen. Alǵa qoıylǵan mindetter de aıqyn. Mysaly, 2020 jyly júzege asyrylýy tıis jobalardyń josparyna 132 iri is-shara engizilgen. Al, aýqymdy túrde alynǵan josparda 500-den astam túrli mazmundaǵy is-sharalar qarastyrylypty. Kún tártibinde turǵan osy sharýalar týrasynda aıta kelip, Erlan Qusaıyn bıyl qolǵa alynatyn Ulytaý aýdanyndaǵy Joshy han tarıhı kesheniniń jańǵyrtylýy, Qaraǵandy qalasynda “Qasym úıin” ashý syndy birqatar ilkimdi jobanyń mańyzdylyǵyn atap ótti.
Sondaı-aq aldaǵy ýaqytta ǵalymdar men tarıhshylardyń, áleýmettanýshylardyń jáne saıasattanýshylardyń qatysýymen júrgiziletin zertteýlerge erekshe kóńil bólinetindigi aıtyldy. Jalpy, Erlan Qusaıyn atalǵan baǵdarlamanyń biriktirýshi retindegi róline basa nazar aýdarylýy kerektigin erekshe atap ótti. Bul baǵyttaǵy birqatar jobalardyń onlaın rejimde júzege asyrylatyny da aıtyldy.
Bir ǵana Qaraǵandy oblysynyń ózinde myńnan astam úkimettik emes uıym bar eken. Qazirgi tańda olar óńirdegi qoǵamdyq ómirge belsendi túrde aralasyp, jergilikti atqarýshy organdarmen tize biriktirip, mańyzdy áleýmettik máselelerdi sheshýge, jastardy rýhanı, adamgershilik jáne azamattyq qundylyqtarǵa baýlýǵa at salysýda.
“Oblys boıynsha 1300 úkimettik emes uıym tirkelgen. Olar qoǵamdyq ómirdiń túrli salalaryn qamtı otyryp, 16 baǵyt boıynsha jumys isteıdi. Memlekettik áleýmettik tapsyrys artqan. Oblys ákimdigi janynda ÚEU-men yntymaqtastyq jáne ózara is-qımyl jónindegi keńes jumys isteıdi. Otyrystardyń birinde eriktiler qozǵalysyn damytý máseleleri talqylandy. Keńes quramy bıyl jańartylyp, oǵan ÚEU-nyń 25 basshysy endi», - dedi Erlan Qusaıyn.
Brıfıng barysynda etnomádenı birlestikterdiń qoǵamdaǵy róli týraly da salıqaly áńgime qozǵaldy. Bul baǵyta Erlan Qusaıyn ishki turaqtylyqtyń damýdyń basty kepili ekendigin erekshe atap ótti.
Basqarma basshysy medıasııany damytýǵa jáne qoǵamdyq medıatorlardyń áleýetin kúsheıtýge de kóp kóńil bólinetinin habardar etti. Sonymen qatar, ol jergilikti buqaralyq aqparat quraldarynyń qyzmetine toqtaldy. Búginde olardyń sany 200-den asqan. Buǵan qosa, búgingi tańda oblysta 19 aqparattyq-nasıhat toby júıeli túrde jumys isteıdi.
Erlan Qusaıyn jýrnalıster qaýymynyń koronavırýs pandemııasy týyndatqan qıynshylyqtarǵa qaramastan tabandylyqpen jumys istep, epıdemıologııalyq jaǵdaı, qaýipsizdik sharalary jáne memlekettik qoldaý týraly aqparat aǵynyn qoljetimdi etýge tyrysqan eńbegine laıyqty baǵa berdi.
Basqarma basshysy sońǵy úsh aıdyń ózinde tikeleı efırde oblys ákimi men onyń orynbasarlary, oblystyń bas memlekettik sanıtarlyq dárigeri jáne basqarma basshylary qatysqan 46 brıfıng uıymdastyrylǵan habardar etti.
Brıfıngtiń sońynda Erlan Qusaıyn oblys turǵyndaryn sanıtarlyq-karantındik erejelerdi qatań saqtap, dárigerler men epıdemıologtardyń aqyl-keńesine yntamen qulaq túrýge shaqyrdy.
