Qazirgi tańda Qazaqstan Úkimeti Astanadaǵy sý qorlary problemasyn sheshý maqsatynda quny 500 mlrd. teńge turatyn Ertisten Esilge deıin jańa kanal tartý jónindegi jobanyń mán-jaıyn talqylap, qarastyrý ústinde. Bul týraly keshe Parlament Májilisindegi «úkimet saǵaty» barysynda Qorshaǵan ortany qorǵaý mınıstri Nurlan Qapparov málimdedi.
Qazirgi tańda Qazaqstan Úkimeti Astanadaǵy sý qorlary problemasyn sheshý maqsatynda quny 500 mlrd. teńge turatyn Ertisten Esilge deıin jańa kanal tartý jónindegi jobanyń mán-jaıyn talqylap, qarastyrý ústinde. Bul týraly keshe Parlament Májilisindegi «úkimet saǵaty» barysynda Qorshaǵan ortany qorǵaý mınıstri Nurlan Qapparov málimdedi.
«Taıaýda biz Úkimette sonaý keńes zamanynyń ózinde-aq jasalyp qoıylǵan jańa jobany taldaı bastadyq. Bul joba Ertisten Esilge deıin Astana arqyly jańa kanal qazýdy qarastyrady. Eger biz osy arnany salatyn bolsaq, jylyna 1 mlrd. tekshe metrge deıin sý alyp, mundaǵy sýdyń kólemin kúrt arttyrar edik», – dep atap ótti mınıstr.
Onyń sózine qaraǵanda, jobanyń arqasynda kóptegen máselelerdiń túıini birden sheshilgeli tur.
«Birinshiden, jańa kanaldyń Astanaǵa deıingi boıynda 3 kól, elordadan shyqqannan keıin taǵy 1 kól salynady. Astanaǵa deıingi 3 kóldi Teńiz, Aqjar jáne Sofy sý qoımalary retinde salýǵa bolady», – dep túsindirdi muny vedomstvo basshysy.
Astanadan 30 shaqyrym jerde ornalasatyn Sofy sý qoımasynyń syıymdylyǵy 2 mlrd. tekshe metr sýdy quramaqshy.
«2 mlrd. tekshe metr sý degenimiz ne? Munyń, túptep kelgende, barlyq 3 kólindegi sýdyń syıymdylyǵy 300 mln. tekshe metrge jetpeıtin Shortandy-Býrabaı kýrortty aımaǵyn saqtap qalý úshin Astana mańynan jasalǵan jańa rekreaksııalyq alqap bolýy ábden múmkin», – dep anyqtaı tústi N.Qapparov budan ári.
Mınıstrdiń aıtýynsha, munsha kólemdegi sý 30 eldi mekendi sýmen qamtamasyz etýge molynan jetetin bolady. Sonymen birge, Astanadan keıin, Aqmola oblysynyń aýmaǵynda Buzylyq sý qoımasyn da salý josparlanyp otyr. Munyń syrtynda burynnan bar Sergeev jáne Petropavl sý qoımalaryna túsetin sýdyń kólemin eki esege ulǵaıtý kózdelýde.
«Osy kezde kanal boıyndaǵy sýarmaly egistik alqaptardyń aýqymyn 100 myń gektarǵa deıin jetkizýge bolady, – dedi Qapparov. – Al bul jobanyń quny onshalyqty arzanǵa túseıin dep turǵan joq. Onyń aldyn ala esep boıynsha quny 500 mlrd. teńgeni quraıdy».
Qazirgi tańda sonymen qatar, Astana qalasy ákimdigi daıyndaǵan Sátbaev kanalynan elordaǵa deıin eki tarmaq tartatyn taǵy bir joba qaralyp jatyr. Mınıstrliktiń málimeti boıynsha, kanal jylyna 170 mln. tekshe metr shamasynda sý berýi tıis.
Sultan BOZAIǴYR.
