Elordada ekologııalyq polısııa bóliminiń qyzmetkerleri qala syrtyna ruqsatsyz qoqys tógý faktilerin anyqtaý maqsatynda reıd júrgizýde. Qala syrtyna qurylys qaldyqtaryn shyǵaratyn kásiporyndar men qala turǵyndary ákimshilik jaýapkershilikke tartylady (55 560 teńge aıyppul).
Sóıtip, 2020 jyldyń basynan abattandyrý erejelerin buzǵan 2 myńnan astam quqyq buzýshyǵa (qurylys kompanııalary, KSK, JShS jáne t.b.) 36 mln.teńge aıyppul salyndy.
"Qazirgi ýaqytta biz ruqsat etilmegen polıgondarmen kúres júrgizýdemiz. Qazir biz jańa "Nurly jol" vokzalynyń artyndamyz. Munda úlken irgetas shuńqyry bar. Biz keıbir qurylys kompanııalary men páterlerinde jóndeý júrgizetin adamdar túnde munda zańsyz qoqys shyǵaratynyn kórip otyrmyz. Sharalar qabyldaımyz. Muny qadaǵalaıtyn ekologııalyq polısııa bar. Olar bul jumysty jaqsy atqarýda. Qurylys maýsymy bastaldy, zańsyz qoqys shyǵarý faktileri kóbeıdi. Zańǵa sáıkes olar qurylys qaldyqtaryn mamandandyrylǵan ekologııalyq polıgonǵa aparýy kerek. Ol Pavlodar tas joly boıymen Alash tas jolynda ornalasqan. Olar qurylys qaldyqtaryn óńdeıtin jerge aparýy tıis. Tazalyq mádenıetin qalyptastyrý kerek", – dedi elorda ákiminiń orynbasary Altynbek Qaısaǵalıev.
Buǵan deıin elorda ákimi Altaı Kólginov ekologııalyq polısııa men aýdan ákimderine eskertý jasap, qurylys qaldyqtarynyń zańsyz shyǵarylýyn boldyrmaýǵa jáne qurylys qaldyqtaryn shyǵarý ornyn anyqtaýǵa tapsyrma bergen bolatyn.
