Aımaqtar • 14 Maýsym, 2020

Qaraǵandy ákimi: Bári bastyq bolsa, qara jumysty kim isteıdi?

557 ret kórsetildi

Bir ǵana Qaraǵandynyń ózinde eki myńnan astam bos jumys oryny bar eken. Ásirese, qurylys salasyna qajetti elektrshiler, montajshylar, qaptaýysh materıaldarmen jumys isteıtin sheberler jáne qara jumysshylar suranysqa ıe kórinedi, dep habarlaıdy Egemen.kz qala ákimi Nurlan Áýbákirovtiń onlaın rejiminde ótken brıfıngtegi málimdemesine silteme jasaı otyryp.

Budan bólek kenshiler astanasynda medısına men keńse qyzmetkerleri úshin de bos jumys oryndary bar eken. Al, jumyspen qamtý ortalyǵynyń bazasynda áli kúnge deıin 1 281  adam jumyssyz retinde tirkelip tur.

"Bizde bos jumys oryndary jeterlik, eńbekaqy mólsheri 85 myń teńgeden bastalady. Jurttyń kóbi birden birden dırektor nemese bas dáriger bolǵysy kele me, áıteýir qarapaıym jumysqa adam kúshi jetispeı jatyr. Bári birdeı bastyq bolsa, qara jumysty kim isteıdi?", dep qynjylys bildirdi qala ákimi.

Degenmen, bul máseleni sheshý úshin halyqty jumyspen qamtý ortalyǵy negizinde kadrlardy irikteý ortalyǵy jumys isteıdi. Ol jerde mamandar onlaın rejiminde jumyspen qamtý máseleleri boıynsha túsindirý jumystaryn júrgizedi. "Jumyspen qamtýdyń jol kartasy" baǵdarlamasy boıynsha qosymsha bos jumys oryndary ashyldy. Qazir 2700 jumys orny bar. Merdiger uıymdarǵa joldardy, úılerdiń qasbetterin, abattandyrý alańdary men oıyn alańdaryn jóndeýmen aınalysatyn jumysshylar qajet.

Bıyl "Jumyspen qamtýdyń jol kartasy" baǵdarlamasy aıasynda Qaraǵandyda abattandyrý jumystaryna 9,6 mlrd teńge bólindi. Bul qarajatqa 421 aýla, 46 aýlaishilik joldar jóndeledi, 119 trotýarǵa tas tóselip, 269 oıyn jáne sport alańdary ornatylady. Sondaı-aq, bıýdjettiń arqasynda 212 kópqabatty úıdiń qasbetteri men shatyrlary retke keltiriledi. Bir sózben aıtqanda, qazirgi ýaqytta kenshiler astanasynda jóndeý jáne qurylys jumystary erekshe qarqynmen júrgizilip jatyr.

Brıfıng barysynda qala ákimi turǵyndardy aıaqtalǵan jáne alda bolatyn jóndeý jumystaryna qurmetpen jáne janashyrlyqpen qaraýǵa shaqyrdy.

"Men osy qalada týdym, osynda óstim, sol sebepti qalamyzdyń ádemi bolǵanyn, gúldengenin qalaımyn. Meniń oıymsha, biz qalamyzda jasalyp jatqan isterge qatysymyz baryn maqtan tutýymyz kerek", - degen Nurlan Áýbákirov, eger jóndelgen jerlerdi buzyp jatqan bireýler bolsa, olar týraly jasyrmaı aıtý kerektigin ótindi.

"Buzaqylardyń kim ekenin bilýimiz kerek. Qala úshin jasalyp jatqan isterge muqııat qarap, janashyrlyq tanytýymyz kerek. Munyń bári bıýdjettiń aqshasyna, sizder men bizderdiń salyǵymyzǵa istelinip jatqan sharaýlar", - dep qorytty sózin qala ákimi.

Sońǵy jańalyqtar

Uqsas jańalyqtar