Mektep degen kıeli shańyraqqa bas suqpaǵan, bilim almaǵan, qońyraý syńǵyryn estimegen adam kemde-kem. Keshe ózińdi oqytqan, al búgin balańnyń, nemerelerińniń boıyna bilim nárin quıyp júrgen ustazdardyń tózimdiligine, sabyrlyǵy men shydamdylyǵyna qaıran qalmaı kórińiz.
Mektep degen kıeli shańyraqqa bas suqpaǵan, bilim almaǵan, qońyraý syńǵyryn estimegen adam kemde-kem. Keshe ózińdi oqytqan, al búgin balańnyń, nemerelerińniń boıyna bilim nárin quıyp júrgen ustazdardyń tózimdiligine, sabyrlyǵy men shydamdylyǵyna qaıran qalmaı kórińiz. «Kishkentaı kezimde anam Saryaǵash aýdanyndaǵy bir mektepke dırektor bolyp aýysyp, bes jasymnan bastap sol bilim mekemesiniń ishinde óstim,– deıdi ustaz Janar Toılybaeva. – Anammen birge mektepke baryp, bos synyptardaǵy partaǵa otyryp, bormen taqtany shımaılap, áıteýir, muǵalim men oqýshylardan kórgenimdi qaıtalap júretinmin. Menińshe muǵalim bolý armany sol kezden bastap júregime qattala berdi ǵoı deımin. Eńbek jolymdy Tólebı aýdanynda bastap, 2003 jyly Shymkenttegi №23 mektepke aýysyp kelgende jańa bir álemge tap bolǵandaı, óz mamandyǵyma degen súıispenshiligim odan saıyn arta tústi. Bul orys synyptarynda qazaq tili men ádebıeti pánderi keńinen oqytylyp jatqan kez edi. О́zge ult balalarynyń boıynda memlekettik tilge degen qurmetti arttyrýǵa, qazaq tilin súıýge, qadirleýge degen yntalaryn oıatýǵa bel býǵan kez bolatyn». №23 lıseı mektepke qabyldaýdyń tártibi óte qatal kórinedi. Beretin bilimi myqty bolǵandyqtan bolar bıyl Shymkenttegi Nazarbaev zııatkerlik mektebine bul lıseıdiń 20 oqýshysy qabyldanypty.
«Bizdiń mektepte oqýǵa qabyldaý tártibi óte qatal bolǵandyqtan shyny kerek, ata-analardyń arasynda túsinispeýshilikter de bolyp turady, –deıdi bul jóninde Janar Joraqyzy. – Biraq, tártiptiń aty – tártip. Bir jaǵy ata-analardyń týra bizdiń mektepke balalaryn oqytqysy kelip, jantalasyp jatqanyna qýanamyn da... О́ıtkeni, bul halyqtyń bizge bergen baǵasy, senimi emes pe? Bul dárejege qalaı jettik? Menińshe, eń aldymen bilikti, eńbekqor, izdengish kadrlardyń basyn toptastyra bildik. Sosyn muǵalimderden balanyń ata-anasy qarapaıym nemese úlken sheneýnik bolsyn, oqýshyǵa ádil baǵa qoıýdy talap ettim. Bul búkil ujymnyń qol jetkizgen jetistigi der edim. Elbasynyń Alǵys hatyn alǵan Evgenıı Konnıkov, Karıma Tólegenova, Tamara Semenova sekildi ustazdardyń jóni bólek. Bárin tizip shyǵý múmkin emes, biraq, keı túlekterimizdiń jetistigin aıta ketsem deımin. Osy mektepti támamdaǵan Ilııas Igisinov N.Baýman atyndaǵy Máskeý memlekettik tehnıkalyq ýnıversıtetinde bilim alyp jatsa, Nurtas Maqajanov sol oqý ornynyń magıstratýrasynda oqydy. Sondaı-aq, Aleksandr Jaýǵashov Máskeýdegi I.M.Sechenov atyndaǵy medısına akademııasyn úzdik bitirdi.
Mine, bilim oshaǵynyń jetistigi osyndaı. Búginde bul qazaq-orys mektebinde 3245 bala bilim alýda. Mektep dırektory Janar Toılybaeva bastaǵan 171 muǵalim olarǵa sapaly dáris berip, balalardyń tárbıesine de qatty kóńil bóledi. «Bilim qymbat, bilý qıyn» degen, búgingi zaman – bilimdiniń zamany. Endeshe, sol údeden shyǵý úlken paryz.
Oralhan DÁÝIT,
«Egemen Qazaqstan».
Ońtústik Qazaqstan oblysy.
