Al basqarmanyń «Zeket» qory bastamasymen «El úlesi – páterge» qaıyrymdylyq sharasy jalǵasýda. Qor arqyly elimizdiń barlyq óńirlerinde turatyn muqtaj jandarǵa 235 páter tabystalǵan eken. Qaıyrymdylyq sharasy aıasynda óńirimizde 7 otbasyǵa páter berilgen.
Bas múftıdiń qolynan 235-shi bolyp, 2 bólmeli páter kiltin alǵan Hınaıat Qasyp Maıqaıyń kentinde turady.
– Adam balasy úshin baspananyń orny erekshe. Sharshaǵanda tynyǵatyn, qulshylyq jasap, duǵa etetin, bala-shaǵańmen qaýyshyp, qýanyshqa bólenetin, qonaq kútip, batasyn alatyn mekeniń. Sondyqtan osy úıdi ıgilik jolynda paıdalanýyńyzǵa tilektespin. Osy otbasyǵa qoldaý bildirip, qýanyshyn eselegen adamdarǵa Alla razy bolsyn. Jasaǵan qaıyrymdylyqtyń qaıyryn ózderińiz de kórińizder, – dedi Naýryzbaı qajy Taǵanuly.
– Bul apaıymyz ózi jalǵyz 5 balany tárbıelep ósirýde. 1992 jyly Mońǵolııadan alǵashqylardyń biri bolyp, elge oralǵan. Baspanasyz ár jerde júrip, qıyndyq kórgen ananyń páter alǵanyna bárimiz de qýanyshtymyz. Aldaǵy ýaqytta taǵy bir otbasyǵa páter syılasaq degen oıymyz bar, – deıdi kenttegi meshit ımamy Soldat Bodaýbek.
Aıtýynsha, Hınaıat Qasyptyń páter alýy bul kenttegi meshit alqa músheleriniń bastamasy jáne uıǵarymymen jasalǵan ıgilikti is. Byltyr taǵy bir jalǵyzilikti ananyń páteriniń shatyryn jóndeýge kómek jasalyp, 10 otbasyǵa kartop taratylǵan.
Al meshit aýlasynda qaıyrymdylyq jármeńkeleri ótkizilip, odan túsken qarjy «Zeket» qoryna aýdarylady, qalǵany jergilikti otbasylarǵa kómekke beriledi.
О́tken jyly Úshqulyn aýyly orta mektebiniń 4 oqýshysy qysqy jyly, qymbat, sapaly kúrteshelermen qamtamasyz etilipti.
Jalpy, «Zeket» qor-áleýmettik, qaıyrymdylyq, mádenı, bilim berý jáne qoǵamǵa paıdaly ıgi de izgi maqsattardy júzege asyrý úshin qurylǵan kommersııalyq emes uıym. Qordyń negizgi maqsaty – qasıetti Quran Kárim men paıǵambarymyz Muhammedtiń (s.ǵ.s.) súnnetimen sharıǵat úkimderine sáıkes zekettiń jınaqtalýy men taratylýyn júzege asyrý.
Al adamdar arasynda meıirimdilik, baýyrmaldyq, janashyrlyq sezimin oıatatyn qaıyrly is jasaý – bárimizge ortaq. «Jaqsylyq jasap jarys» deıdi hadıs. Meshit qyzmetkerleriniń turmysy tómen, muqtaj otbasylarǵa kómek qolyn sozǵan qaıyrymdylyq jarysy bárimizge úlgi bolsyn.
Pavlodar oblysy
