Tól ónerimiz aıtys dese ishken asyn jerge qoıatyn jurtshylyq jeksenbi kúni elordanyń Kongress-Holl saraıyn betke aldy. «Nur Otan» partııasynyń qoldaýymen «Jádiger» qoǵamdyq qorynyń uıymdastyrýymen ótken «Kil júırikte kim júırik?» atty halyqaralyq aqyndar aıtysy Abylaı hannyń 300 jyldyq mereıtoıyna arnalyp otyr. Saıdyń tasyndaı iriktelgen segiz aqyn baryn salǵan bul saıysty ánshi Nurlan О́nerbaev júrgizdi.
Tól ónerimiz aıtys dese ishken asyn jerge qoıatyn jurtshylyq jeksenbi kúni elordanyń Kongress-Holl saraıyn betke aldy. «Nur Otan» partııasynyń qoldaýymen «Jádiger» qoǵamdyq qorynyń uıymdastyrýymen ótken «Kil júırikte kim júırik?» atty halyqaralyq aqyndar aıtysy Abylaı hannyń 300 jyldyq mereıtoıyna arnalyp otyr. Saıdyń tasyndaı iriktelgen segiz aqyn baryn salǵan bul saıysty ánshi Nurlan О́nerbaev júrgizdi.
Alaman aıtysty kirispe sózben ashqan «Nur Otan» HDP Tóraǵasynyń birinshi orynbasary Baýyrjan Baıbek aqyndarǵa sáttilik tiledi. «Keshe ǵana Kókshede bastalǵan Abylaı hannyń 300 jyldyq toıyna fraksııa depýtattarymen birlese otyryp qatysqan bolatynbyz. Búgingi aıtys bul tarıhı toıdyń jalǵasy dep bilemiz. Elbasy Nursultan Nazarbaevtyń jaqynda jarııalanǵan maqalasynda Abylaı hannyń oryndalmaǵan úsh armany týraly aıtqan edi. Elbasynyń salıqaly saıasatymen elimizdiń birligi men yntymaǵynyń arqasynda búgin biz sol babalarymyz ańsaǵan armanǵa qol jetkizip otyrmyz. «Nur Otan» – halyqtyń partııasy. Bizdiń negizgi maqsatymyz eldiń muń-muqtajyn bilip, kemshilikterdi jasyrmaı talqylap, onyń ońtaıly sheshimin taýyp, memlekettik organdarmen birlese oryndaý. Bul rette aıtys pen partııanyń tabıǵaty bir. О́ıtkeni, aıtysker aqyndar da halyqtyń sózin bılikke adal jetkizýshi. Sondyqtan da búgingi aıtys naǵyz halyq demokratııasynyń aıqyn kórinisi dep bilemiz», – dedi ol.
Aqyndardyń alǵashqy jubyn Birjan Baıtýov pen Muhtar Nııazov bastady. Qos aqynnyń tolǵamdy oılary men salmaqty pikirlerin jıylǵan jurt tamsana tyńdady. Aıbek Qalıev pen Qytaıdan kelgen qandasymyz Qanatbek Záıtollaulynyń aıtysy da ózindik sıpatymen erekshelendi. Qashanda sabyrly qalpynan tanbaıtyn Aıbektiń oı oramdary kórermenniń qoldaýyn taýyp otyrsa, Qanatbektiń de júırikter qatarynan ekenine esh kúmán keltirilmedi.
Jas aqyn Jandarbek Bulǵaqov Aınur Tursynbaevamen shyqqanda bul jekpe-jek qalaı bolar eken degen edik. Alaıda, kúshtiń teń ekeni á degennen-aq baıqalyp turdy. Bulǵaqtaǵan Bulǵaqovyńyz Aınurǵa aldyrmady dese de bolady. Ásirese, kópshilik Jandarbektiń tapqyrlyǵyna tánti boldy.
Sahna tórine kóterilgen sońǵy jup – Balǵynbek Imashev pen Sara Toqtamysova kórermenin kúlkige kómdi. Birese jezde men baldyz, birese kelin men qaınaǵa aıtysqan olar ázilge toly óleń joldarymen aıtys súıer qaýymdy bir serpiltip tastady.
Joǵary deńgeıde uıymdastyrylǵan bul sharanyń arasynda jyr-termelerge de kezek berilmeı qalǵan joq. Taldyqorǵannan arnaıy kelgen Alǵysbek Dálenniń júregin jaryp shyqqan óz termesi búkil zaldy baýrasa, jas jazba aqyndardyń da óleńderi tyńdaldy. Osy aıtysqa belgili aıtysker aqyn, marqum Orazaly Dosbosynovtyń uly Nursultan men qyzy Nuraısha qonaq bolyp qatysty. Nursultan ákesine arnaǵan óleńin oqydy. Oǵan izgi tilegin bildirgen «Nur Otan» HDP Tóraǵasynyń birinshi orynbasary Baýyrjan Baıbek aıtystan túsken 1 mıllıon teńgeni kórermender aldynda syıǵa tartty.
Sonymen, ekinshi aınalymǵa shyqqan Jandarbek Bulǵaqov, Qanatbek Záıtollauly, Aınur Tursynbaeva jáne Balǵynbek Imashev ekrandaǵy sýretti jyrlaý boıynsha saıysqa tústi.
Qazylar alqasynyń sheshimimen bas júlde – 2 mıllıon teńgeni Aınur Tursynbaeva ıelense, birinshi tuǵyrǵa Jandarbek Bulǵaqov 1,5 mıllıon teńgemen jaıǵasty. Al ekinshi orynǵa Balǵynbek Imashev kóterildi. Onyń qorjynyna 1 mıllıon teńge tústi. Qytaıdan kelgen qandasymyz Qanatbek Záıtollauly júldeli úshtikti 750 myń teńgelik sertıfıkatpen qorytyndylady.
О́zge aqyndar da quralaqan qalǵan joq. Olardyń da árqaısysyna jarty mıllıon teńge usynyldy. Qazaqstan musylmandary dinı basqarmasynyń arnaıy syılyǵy eki adamǵa – Mekkege qajylyq saparyna joldama Sara Toqtamysovaǵa tapsyrylsa, «Qazaıtys» saıty óz taıyn Balǵynbekke mingizdi.
Qazylar alqasynyń tóraǵasy, Parlament Májilisiniń depýtaty, belgili jazýshy Aldan Smaıyl qatysqan barlyq aqyndarǵa alǵysyn bildire kele, óner adamdarynyń qandaı da qurmetke laıyq ekendigin aıtty.
Ábdirahman QYDYRBEK,
«Egemen Qazaqstan».
ASTANA.
––––––––––––––––
Sýretterdi túsirgen
Erlan OMAROV.
