«Aýyl – el besigi» baǵdarlamasy aıasynda Buqar jyraý aýdanyndaǵy Botaqara kentinde 320 oryndyq keshenniń qurylysy bıyl salynyp, Aqsý-Aıýly aýylynda sport mektebi ǵımaratynyń qasbeti jóndeldi.
2020 jylǵa arnalǵan «Eńbekpen qamtýdyń jol kartasy» boıynsha respýblıkalyq bıýdjet esebinen segiz sporttyq nysannyń qurylysy bastalady. Munyń ishinde Atasý jáne Nura kentterindegi júzý basseınderi bar. Sondaı-aq Qarsaqbaı aýylynda 100 oryndyq, Ulytaý aýdanynyń Jezdi kentinde jáne Aqtas eldi mekeninde 160 oryndyq sporttyq saýyqtyrý keshenderi salynatyn bolady.
Qaraǵandy syndy iri qalada bir ıppodromnyń joqtyǵy kópten beri aıtylyp kele jatqan túıtkildi máseleniń biri edi. Bıyl onyń da sheshimi tabylǵandaı. Búgingi kúnde atshabarǵa arnalǵan 50 gektar jer telimin resimdeý boıynsha jumystar júrip jatyr. Sonymen qatar oblys ortalyǵynda buqara halyqqa qajetti budan basqa da birqatar sport nysany boı kótermekshi. Mysaly, qazirgi ýaqytta qurylysynyń aıaqtalýy kelesi jylǵa dep josparlanǵan úsh myń adam syıatyn fýtbol maneji men kúres ortalyǵynyń jobalaý-smetalyq qujattamalaryna túzetýler engizilýde. Al kenshiler astanasyndaǵy 50 metrlik júzý basseıniniń qurylysyna bıýdjetten 1 mlrd teńge bólingen.
Qazirgi ýaqytta «Shahter» stadıonynda kúrdeli jóndeý jumystary qyzý júrip jatyr. Stadıonda trıbýnadaǵy oryndyqtar aýystyrylyp, ǵımarattyń qasbeti árlendiriledi. Sondaı-aq sport nysanynyń ishindegi sheshinetin oryndar, jýynatyn bólmeler jóndeýden ótkiziledi. Budan basqa, stadıonda astynan jylytylatyn jáne avtomatty sýarý júıesimen qamtamasyz etiletin kógal tóseledi. Iаǵnı jumys tolyq aıaqtalǵan soń, fýtbol alańy tórtinshi sanatqa saı jáne Qazaqstan fýtbol federasııasy men ÝEFA talaptaryna sáıkes keletin bolady.
Oblystaǵy ekinshi iri qala Jezqazǵanda eskek esý sport mektebi esý bazasynyń da jobalaý-smetalyq qujattamalary jasalyp, saraptamanyń oń qorytyndysy alyndy. Nysandy 2022 jyly paıdalanýǵa berý josparlanǵan.
Sporttaǵy qurylysqa demeýshiler de den qoıa bastady. Mysaly, jeke kásipkerlerdiń esebinen Temirtaý qalasynda dene shynyqtyrý-saýyqtyrý kesheni, Prıshahtınsk eldi mekeninde sporttyq saýyqtyrý kesheni, tennıs ortalyǵy, ústel tennısi ortalyǵy, trıatlon-park salynyp jatyr.
Oblysta bıyl birneshe basseınniń qurylysy bastaldy. Atap aıtar bolsaq, Shahtınsk qalasynda, Jańaarqa aýdanyndaǵy Atasý kentinde jáne Nura aýdanyndaǵy Nura kentinde júzý basseınderiniń qurylysy bastalyp ketti.
Qaraǵandy oblystyq dene- shynyqtyrý jáne sport basqarmasynyń basshysy Temirhan Abylaev bıylǵy jazda Qaraǵandydaǵy tennıs ortalyǵy, Qarqaraly men Temirtaýdaǵy dene shynyqtyrý-saýyqtyrý keshenderi paıdalanýǵa beriletinin aıtady. Al jyldyń sońyna taman Jańaarqa aýdanynyń Atasý kentindegi jattyǵý zaly bar jabyq júzý basseıniniń, Qarsaqbaı kentindegi 100 oryndyq deneshynyqtyrý-saýyqtyrý kesheniniń qurylysy aıaqtalmaqshy.
Búgingi kúnde atalǵan basqarma tarapynan qurylys jumystarymen aınalysyp jatqan merdigerlerge qoıylatyn talap kúsheıgen. «Biz úshin qurylystyń sapaly júrgizilgeni óte mańyzdy. Sol sebepti, dál qazirgi ýaqytta aýqymdy túrde júrip jatqan jumystardyń barysyn jiti nazarda ustaıtyn bolamyz», deıdi Temirhan Abylaev.
«Sport salasyndaǵy qolǵa alynǵan jobalardyń júzege asýy oblys basshylyǵynyń tikeleı nazarynda. Sol sebepti, jaýapkershiliktiń júgin sezine otyryp, ortaq istiń múddesi úshin jergilikti ákimdiktermen, merdigerlermen tyǵyz qarym-qatynasta jumys isteýge týra keledi», deıdi Qaraǵandy oblystyq dene shynyqtyrý jáne sport basqarmasynyń basshysy Temirhan Abylaev.
Qaraǵandy oblysy
