Búgin, qazannyń 8-inde Syr boıyndaǵy bas qalada onyń irgesi qalanǵanyna 195 jyl tolýyna arnalǵan basty toı bastalyp ketti. Negizinde, bul mereke 1-qazannan óris alǵan bolatyn.
Al 8-10 qazan aralyǵynda ótetin negizge toıǵa aýdandar shashýlaryn alyp kelip jatyr. Búgin saǵat 18.30-da Baıqońyr qalasynyń ónerpazdary A.Toqmaǵambetov atyndaǵy mádenıet úıinde konsert beredi. Al qazannyń 9-ynda saǵat 9 ben 9.30-da Jańaqorǵan, Jalaǵash jáne Shıeli aýdandarynyń oblys ortalyǵyna syıǵa tartqan alleıa-skverleriniń ashylý rásimi ótedi. Onyń aıasynda konsert, kórme jáne qaıyrymdylyq sharalary uıymdastyrylady.
«Búgin saǵat 17-de Ortalyq stadıonda Qazaqstan fýtbolynyń negizi qalanǵanyna 100 jyl tolýyna oraı fýtbol juldyzdarynyń jergilikti komandalarmen joldastyq kezdesýi bolady. Kórermender sondaı-aq arnaıy ázirlengen qoıylymdy, gala-konsert pen otshashýdy tamashalaıdy. Al saǵat 19-da «Jibek joly» saýda-saýyq ortalyǵynyń kınozalynda rejısser Q.Ahmetovtiń «Siz kimsiz, Ka myrza?» kórkem fılminiń tegin kórsetilimi bolady», - delingen habarlamada.
Budan ári Aral, Qazaly, Qarmaqshy, Syrdarııa aýdandarynyń ózderi úshin belgilengen oryndarda merekelik tartý jasaıtyny aıtylǵan. Atalmysh aýdandar ókilderi muny qaıyrymdylyq sharasy retinde uıymdastyryp, alleıa-skverler ashady. Osynyń qabatynda turǵyndar men qonaqtar nazaryna kórme usynady.
Merekelik kóńil-kúıdi N.Bekejanov atyndaǵy teatrda saǵat 15-te «QazGerMunaı» BK JShS-niń 20 jyldyǵyna oraı ótkiziletin respýblıkalyq aqyndar aıtysy men saǵat 19-da «Syr Ana» monýmenti mańynda Qazaqstanǵa tanymal óner juldyzdarynyń qatysýymen bolatyn «Án terbegen Qyzylorda» retrofestıvali odan ári kótere túsedi.
«Qala kúnine oraılastyrylǵan merekelik sharalar shymyldyǵy 11 qazanda Ortalyq alańda Gala-konsertpen jabylady», - dedi baspasóz qyzmetindegiler.
Darııanyń jaǵasynda bir qala bar
Aınalǵan Syr eliniń maqtanyna...
О́tken ǵasyrdyń sonaý 60-shy jyldarynyń basynda osylaı shyrqala bastaǵan án, árıne, Qyzylordaǵa arnalǵan. Ol án sondyqtan da «Qyzylorda valsi» dep atalady.
Búginde osy ánmen er jetken urpaq ta aǵa býynnyń qataryna jaqyndap qaldy. Al «Qyzylorda valsi» áli sol jasań qalpynda, jaısań shaǵynda tur. Sebebi, ony bul aımaqtyń búgingi urpaǵy tap qazir ǵana týyndap, endi ǵana jurt arasyna taralyp jatqan kezindegideı kóńilderine jaqyn, júrekterine ystyq qabyldaıdy.
Bıyl sol Qyzylordanyń irge kóterip, qonysqa aınalǵanyna týra 195 jyl tolyp otyr. Alaıda, qala búginde jasyna jas qosylǵan jasaryp, jańǵyryp keledi. Ony jasartyp ta, jańǵyrtyp ta jatqan eń aldymen onyń jandary jaz turǵyndary, ósip kele jatqan óskeleń jas urpaǵy. Álbette, sol kele jatqan býyndy jaqsy jolǵa salyp, bıikke qaraı talpyntyp otyrǵan bul óńirdiń bıligi basynda otyrǵan abzal azamattary bolsa kerek.
Qyzylorda, ásirese, bıylǵy jyldyń basynan bastap damý men órkendeýdiń, jasarý men jaınaýdyń jańa dańǵyl jolyna túskendeı. Tap qazir qala byltyrǵy jyldan beri baryp kórmegen adamǵa qatty ózgerip ketkendeı áser qaldyrady. Sonyń ishinde qalanyń kósheleri atymdarynyń jaqsy izge túsip qalǵany birden kózge urady.
«Kóshe» demekshi, Qyzylordanyń sonaý Aqmeshit zamanynan kele jatqan tar kóshelerin keńeıtip, jol boılaryna ádemi trotýarlar salý úrdisi eń aldymen oblysty Berdibek Saparbaev, qalany Baqbergen Dosmambetov basqarǵan kezden qyzý qolǵa alyndy. Sol tusta qamys qalalyq dáýirden irgesi kóterilgen shahar bir jaınap qalyp edi.
Odan keıingi qaýyrt jańarý oblys tizginin Serikbaı Nurǵısaev, qala basshylyǵyn Qojahmet Baımahanov alyp turǵan kezeńde júrgizildi. Bul ýaqyt aralyǵynda Qyzylordada shyn máninde de jańarýdyń dúrkiregen dúmpýi kerýen kerdi.
Munan keıin Aqmeshittiń aýmaǵy oblysty Muhtar Qul-Muhammed, qalany Serik Qojanııazov basqaryp turǵan barynsha qysqa ýaqyttyń ishinde adam tanymastaı bolyp ózgeriske túse bastap edi...
Mine, sol salynyp ketken sara jol, ejelgi eńseli dástúr bıyl taǵy da dúrkireı kóterildi. Buǵan oblysqa birinshi basshy bolyp Qyrymbek Kósherbaevtyń, al qalaǵa Nurlybek Nálibaevtyń kelýleri óte kúshti serpin berip otyr. Qalanyń jańarýy men jasarýy onyń keskin-kelbetiniń ózgerýinen ǵana kórinip turǵan joq, ol sonymen qatar, barlyq jerde muntazdaı tazalyqtyń qolǵa alyna bastaǵanynan da ańǵarylady.
Búgin Qyzylordada – úlken toı. Qalanyń 195 jyldyǵyn toılaý óziniń sharyqtaý shegine jetti. Ol 12 qazan kúni oblys ortalyǵynda ótetin «Altyn kúz» sabantoıymen aıaqtalady.
Rýslan Igilik.
