Qorshaǵan ortany qorǵaý mınıstri Nurlan Qapparov Parlament Májilisiniń depýtattaryna esep berý kezinde ekologııa máselesine qatysty ózekti máseleler men alda turǵan mindetterdi tarqatyp aıtyp berdi. Bul týraly «Aıqyn» gazeti jazdy.
Bıyl ormandy alqaptardyń keıbir bóliginde aptap ystyqtar jıi bolmaǵanymen, respýblıka boıynsha 1 myń gektarǵa jýyq ormandy jalyn sharpyǵan. Al ótken jyly elimiz aýmaǵyn qurǵaqshylyq jaılaǵanda, 5313 gektar orman órtengen eken.
Qorshaǵan ortany qorǵaý mınıstri sóz oraıynda aldaǵy merzimde taǵy 14 «aıryqsha qorǵalatyn tabıǵı aýmaq» qurý josparlanyp otyrǵandyǵyn málimdedi. Sondaı-aq qazirgi 6 tabıǵı qoryq-parkter aýdany ulǵaıtylatyn kórinedi. «Jalpy alǵanda, 2015 jylǵa deıin aıryqsha qorǵalatyn aýmaqtar aýdany 24,5 mıllıon gektarǵa deıin, al 2020 jylǵa qaraı – 27 mıllıon gektarǵa deıin jetkiziledi, bul – eldiń jalpy aýmaǵynyń 10 paıyzy» deıdi Nurlan Qapparov.
Kaspıı teńizindegi bekire balyǵynyń 4-5 jylda joıylyp ketýi múmkin. Osyǵan oraı,bekire balyǵyn aýlaýdyń shaǵyn kvotasy ázirlenip, ol Kaspıı jaǵalaı qonǵan bes elge bólinedi.-Kaspıı teńiziniń sýdaǵy bıoresýrstary boıynsha komıssııa aıasynda bekire tuqymdas balyqtardy aýlaýǵa besjaqty moratorıı engizý máselesi pysyqtalýda. Biz endi ony aýlaýǵa tyıym salamyz,- degen N.Qapparov bekire balyqtaryn saqtap qalý – eń mańyzdy ekologııalyq problemalardyń biri ekendigin nyqtady. Sondyqtan qazirgi kezde Qazaqstan Kaspııdiń ózine qarasty bóliginde bekire aýlaýǵa jol bermeý sharalaryn qabyldaýda. Munan ózge, bıýdjet esebinen elimizdegi iri sý qoımalaryna jyl saıyn osy qundy balyq túriniń 158 mıllıon shabaǵy jiberiletindigi málim boldy.
Taǵy bir nazar aýdarar jáıt, Memleket basshysy qol qoıǵan Qazaqstannyń «jasyl» ekonomıkaǵa ótý tujyrymdamasyn júzege asyrý jónindegi is-sharalar josparyna sáıkes, 2020 jylǵa deıingi Balyq sharýashylyǵyn damytý baǵdarlamasy ázirlenetin bolypty. Bul rette qazaqstandyqtardyń qazanyna jol tartatyn jáne sheteldik naryqtarǵa attanatyn bekire balyqtary arnaıy fermalarda ósiriletin kórinedi.
Danııar Túımebaı.
