Voleıboldan Qazaqstan quramasynyń múshesi, 24 jasar Sana Jarylǵasova turmysqa shyqty. Elimizdiń sulý voleıbolshy qyzdarynyń biri ózine ómirlik jar etip 26 jastaǵy Medet Anarqulovty tańdady. Bul týraly búgin Vesti.kz habarlady.
Sana Jarylǵasova – respýblıkamyzdyń birinshi astanasy bolǵan Orynbor jeriniń týmasy. Sporttaǵy alǵashqy jolyn Oraldyń «Grasııa» komandasynda bastaǵan. Sodan keıin «Ertis-Kazhrom» jáne «Almaty» komandalarynda oınady. Qazaqstan quramasy sapynda álemdik Gran-prı jarysyna qatysyp, onyń quramynda 17-oryn aldy. Al jaqynda ǵana bas komandamen birge 2014 jyly Italııada ótetin álem chempıonatyna joldama jeńip aldy.
Sana sondaı-aq Qazaqstandaǵy sulý sportshylardyń biri bolyp tabylady. Ol byltyr sportshy qyzdardyń arasynda ótken sulýlyq saısynda dzıýdoshy Marıan Ordabaevadan keıingi ekinshi oryn aldy.
Medet Anarqulov – Shymkent jeriniń týmasy. Osynda voleıbol mektebinen tálim alyp shyqqan ol sportshy retindegi jolyn týǵan qalasynyń «Qazyǵurt» komandasynan bastady. 2009 jyly «Atyraý» komandasynyń sapyna aýysty. Onyń quramynda Qazaqstan Kýbogynyń ıegeri atandy. 2011 jyly Shymkenttiń «Dınamo-Qazyǵurt» komandasyna qaıtyp oraldy. Budan bólek, sportshylyq mansabyn qazir Shymkente ýchaskelik ınspektor qyzmetimen ushtastyryp júr. Ol ishki ister organdarynda aǵa leıtenant sheninde qyzmet etedi.
Eske sala keteıik, bıylǵy jyl sportshylarymyzdyń óz juptaryn taýyp, shańyraq qurýǵa aıryqsha mán berip jatqan kezeńi boylp tur. Aıtalyq, osydan shamaly kún buryn grek-rım kúresiniń sheberi Almat Kebisbaevtyń úılený toıy ótti. Onyń aldynda ǵana aýyr atlet Kırıll Pavlov nekeli jaryn tapty. Al jyldyń odan burynǵy kezeńderinde aýyr atletter Maııa Maneza men Vıacheslav Ershov, Svetlana Podobedova men Vladımır Sedov bir-birimen juptassa, Zúlfııa Chınshanlo Qytaıda turatyn serigimen qosyldy.
Rýslan Igilik.
