Qaraǵandy oblysyndaǵy búgingi jaǵdaı mynadaı: "jaman tumaý" juqtyrǵan bes adam óz betinshe dem ala almaıdy, sol sebepti olar ókpeni jasandy jeldetý (О́JJ) apparattaryna qosylǵan. Mine, osy pasıentterdiń úsheýi der kezinde medısınalyq kómekke júginbeı, aýrýyn asqyndyryp alǵan eken.
"Bul naýqastar úıde emdelmekshi bolǵan. Qazir olar dárigerlerdiń táýlik boıy qadaǵalaýynda jan saqtaý bóliminde aýyr kúıde jatyr. Barlyq turǵyndardy medıkterdiń úndeýine nemquraıdy qaramaýǵa shaqyramyn. Bul óte mańyzdy ekenin este ustaý kerek. Jedel járdem shaqyrýdan qoryqpaǵan jón, kerisinshe dert saldarynan qorqý kerek", – dep eskertti Erjan Nurlybaev.
Oblysta buǵan deıin О́JJ apparatynyń 28 danasy bolypty. Qazirgi ýaqytta buǵan qosymsha 44 apparat satyp alynǵan, onyń 22-si búgingi kúnde óńirge jetkizilgen.
Basqarma basshysy oblysta KVI juqtyrǵan naýqastarǵa kómek kórsetý úshin resýrs pen jabdyqtyń jetkilikti ekenin aıtady. Mysaly, qazirgi ýaqytta koronavırýspen aýyratyn naýqastardy emdeý úshin tósek ornynyń sanyn kóbeıtý qolǵa alynǵan. Keshegi kúnniń ózinde aýrýhanalardyń biriniń bazasynda ınfeksııalyq baǵyttaǵy qosymsha 100 tósektik oryn ashylypty.
"Kelesi aptanyń basynda taǵy qosymsha tósekter qoıylady. Qaraǵandyda qazir 647 tósek ornynyń 66-sy bos tur. Kúnine biz shamamen alǵanda, KVI nyshany bar 50 adamdy aýrýhanaǵa jatqyzamyz. Jaǵdaı tolyq baqylaýda, aldyn alý sharalary qabyldanǵan. Bizdiń mindetimiz – barlyǵyn der kezinde medısınalyq kómekpen qamtamasyz etý", – deıdi Erjan Nurlybaev.
Bir qýanarlyǵy, oblysta KVI indetin anyqtaıtyn zerthanalar sany artyp keledi eken. О́tken aptada osyndaı ortalyq Jezqazǵan qalasynda ashylǵan. Osy aıda mamandandyrylǵan zerthana Temirtaýda, al tamyz aıynda Balqash qalasynda jumys isteı bastaıdy. Mundaı jaǵdaı shilde aıynyń ózinde zertteýler sanyn táýligine tórt myńǵa deıin arttyrýǵa múmkindik beretin kórinedi.
Oblysta sanıtarlyq-epıdemıologııalyq jaǵdaıǵa baılanysty stasıonarlar josparly emdeýge jatqyzýdy ishinara toqtatypty. Ońaltý ortalyqtary ınfarkt, ınsýlt aýrýlaryn jáne jaraqattan keıin kómek alýshylarǵa qyzmet kórsetý úshin jumysyn jalǵastyra beredi. Al emhanalarda ýaqytsha skrınıng jáne dıspanserleý júrgizilmeıtin bolǵan. Emhanalarǵa keletin adam sanyn azaıtý maqsatynda qaýip tobyndaǵy pasıentter úshin dári-dármekter úılerine jetkizilip beriledi.
Onlaın-brıfıngtiń sońynda oblystyń bas dárigeri Erjan Nurlybaev turǵyndardy sanıtarlyq talaptardy saqtaýǵa, óziniń jáne jaqyndarynyń densaýlyǵyna janashyrlyqpen qaraýǵa shaqyrdy.
