Elimizdegi epıdemıologııalyq jaǵdaı týraly densaýlyq saqtaý mınıstriniń mindetin atqarýshy L. Aqtaeva, veterınarlyq jáne epızootııalyq ahýal týraly aýyl sharýashylyǵy mınıstri S. Omarov, bıologııalyq qaýipsizdik salasyndaǵy ǵylymı-zertteý qyzmeti týraly bilim jáne ǵylym mınıstri A. Aımaǵambetov, jeke qorǵaný quraldaryn óndirý týraly ındýstrııa jáne ınfraqurylymdyq damý mınıstri B. Atamqulov, óńirlerdegi ahýal týraly Atyraý oblysynyń ákimi M. Dosmuhambetov, Pavlodar oblysynyń ákimi Á. Sqaqov baıandady.
Bıyl ótken jyldyń sáıkes kezeńimen salystyrǵanda juqpaly aýrýlardyń 57 túri boıynsha naýqastaný deńgeıi tómendedi, onyń ishinde menıngıtpen aýyrý 3,5 ese, qyzylshamen syrqattaný 2,8 ese, salmonellezben aýyrý 2,1 ese tómendedi. Bes aıdyń ishinde 1,4 mln adamǵa juqpaly aýrýlarǵa qarsy profılaktıkalyq ekpe jasaldy, bul egilýge tıis adamdardyń 92%-yn quraıdy.
Al koronavırýs ınfeksııasyna qatysty jaǵdaı kúrdeli deńgeıde qalyp otyr. Sońǵy eki aptada barlyq derlik óńirde naýqastar sany kóbeıdi. Munyń negizgi sebebi — adamdardyń sanıtarlyq talaptardy oryndamaýy men baqylaýdyń nasharlyǵy.
Úkimet basshysy Memleket basshysynyń tapsyrmasy boıynsha Vedomstvoaralyq komıssııanyń sheshimimen aldaǵy demalys kúnderi birqatar iri qalalar men turǵyndarynyń sany 50 myńnan asatyn barlyq óńirlerdiń eldi mekenderde qosymsha shekteý sharalary engizildi.
"Bul sheshim jergilikti jerlerde naqty oryndalýy tıis. Ákimdikter sanıtarlyq normalar men qoǵamdyq oryndarda áleýmettik araqashyqtyqtyń qatań saqtalýyna erekshe nazar aýdarýy tıis. Densaýlyq saqtaý mınıstrligine óńirlerdiń ákimdikterimen birlesip, koronavırýs ınfeksııasynyń taralýyna qarsy kúres boıynsha jańa sharalar keshenin daıyndaýdy tapsyramyn. Árbir óńirdegi jaǵdaıdy eskere otyryp, iske asyrylyp jatqan sharalardy túzetý boıynsha jedel sharalar qabyldansyn", — dedi A. Mamın.
Premer-Mınıstr jeke qorǵaný quraldarynyń otandyq óndirisin ulǵaıtý jáne olardyń halyq úshin qoljetimdi bolýyn qamtamasyz etý sharalaryn qabyldaýdy, jasandy tynys alý apparattary men jeke qorǵanysh quraldarynyń jetkilikti qoryn qalyptastyrýdy, olardyń memlekettik materıaldyq rezervte bolýyn qamtamasyz etýdi tapsyrdy.
Ákimdikterge iri kásiporyndardyń óz jumyskerlerin jeke qorǵanysh quraldarymen qamtamasyz etý máselesin pysyqtaý, Aýyl sharýashylyǵy mınıstrligine ártúrli ınfeksııalardyń taralýyna jol bermeý úshin profılaktıkalyq sanıtarlyq-veterınarlyq is-sharalardyń oryndalýyn qatań baqylaý tapsyryldy.
Úkimet basshysy halyqty jyl saıynǵy ımmýnızasııalaý josparyn oryndaýdy jáne koronavırýs ınfeksııasyna qatysty qazirgi jaǵdaıdy eskere otyryp, is-qımyl algorıtmin jandandyrýdy tapsyrdy.
