Kásipodaqtar kómekke keldi

Osy maqsatta óńirge arnaıy kelgen Qazaqstan Respýblıkasy Kásipodaqtar federasııasynyń tóraǵasy Satybaldy Dáýletalın, О́zbekstan Respýblıkasy Jızaq oblysy kásipodaqtar keńesiniń tóraǵasy Nýsýratýlla Pardaev, Túr­kis­tan oblysy ákiminiń orynbasary Sáken Qalqamanov jáne federasııanyń uıym basshylary «О́rgebas» jáne Fırdoýsı aýyldaryna baryp, sý apa­ty zardaptaryn joıý isindegi atqa­ryl­ǵan jumystardyń barysymen, «Dostyq», «Jeńis», «Jańa turmys» eldi mekenderinde salynyp jatqan turǵyn úılerdiń qurylysymen tanys­ty. Myrzakent kentinde jergilikti turǵyndarmen jáne sý apatynan zardap shekken eldi mekenderdegi jalpy orta mektepterdiń basshylarymen kezdesti.

Turǵyndarmen kezdesýde Saty­bal­dy Dáýletalın Maqtaaral aýda­nynyń turǵyndary berekeni kókten emes, qajyrly eńbekten tilegen tynymsyz eńbekqor jandar ekenin atap ótti. «Muqtaj janmen óz jylýyn bólisý dástúri qazaq halqynyń qa­nyn­da bar. Sondyqtan da, biz osyndamyz. Kásipodaqtar elmen birge, taǵdyr toń­dyr­ǵan maqtaaraldyqtarǵa jylý­men keldik. Osyndaı qajetti is-sharalardy jedel túrde qarastyryp, júzege asyrǵan Prezıdent pen Úkimetke óz rızashylyǵymdy bildirgim kele­di. О́z kezeginde, áriptesimiz – О́z­bek­stan Kásipodaqtar federasııa­symen ortaq kelisim boıynsha Maq­taaral aýdany eldi mekenderi tur­ǵyn­da­ryn qoldaý maqsatynda birlesip, 66 mln teńgeniń kómegin kórsetý tý­raly sheshim qabyldadyq. Biz tórt orta bilim beretin mektepke ın­te­rak­tıv­ti kompıýterlik sy­nyp­tardyń tolyq jabdyǵyn tap­sy­ramyz», dedi S.Dáýletalın. Sondaı-aq ol Amanjolov, Músirepov, Fırdoýsı atyn­daǵy orta bilim beretin jáne «Nurly jol» eldi mekenindegi mektep­ter­­diń dırektorlaryna 25 noýtbýk, 25 parta men 50 oryndyq, 2 prınter, bir-birden mýltımedıalyq taqta tabys etti. Sonymen qatar sý tasqynynan zardap shekken eldi mekenderdiń 100 turǵynyna fede­rasııaǵa qarasty «Kóktem», «Merki», «Mankent», «Jańaqorǵan», «Shýchınsk» shıpajaılaryna joldama berildi. Tegin joldamalar zeınetkerlerge, muǵa­lim­derge, sondaı-aq kópbalaly jáne az qamtylǵan otbasylarǵa tabys eti­ledi.

Apattan zardap shekken aýdannyń muǵalimderine Respýblıkalyq bilim jáne ǵylym qyzmetkerleri salalyq kásipodaǵy tarapynan da eleýli qoldaý kórsetilip, 365 bilim salasy kásipodaq múshesine materıaldyq kómek retinde 35 myń teńgeden berildi. Jalpy, Kásipodaqtar federasııasynyń múshelik uıymdary 50 mln teńgeniń kómegin kórsetti. О́z kezeginde О́z­bek­stan­nan «Dostyq kerýenin» bas­tap kelgen, Jızaq oblystyq kásipodaqtar keńesiniń tóraǵasy, О́zbekstan Sena­ty­nyń depýtaty Nýsýratýlla Par­daev baýyrlastyq ári kórshilik qarym-qatynas qazaq jáne ózbek halqynyń qatynastarynyń negizi bolatynyn atap ótti. «Búgin tańerteń Qazaqstan – О́zbekstan shekarasynan bizdiń «Dos­tyq kerýeni» ótti. Biz de Qazaqstan Ká­sip­odaqtar federasııasy sııaqty baýyr­­­­las halyqtyń basyna túsken osy qıyndyqta beıtarap qala almadyq jáne qazaqstandyq áriptesterimizdiń zardap shekkenderge qaıyrymdylyq kómek kórsetý aksııa­syna qosyldyq», dedi ózbekstandyq delegasııanyń basshysy. О́zbekstan kásipodaqtary jalpy somasy 16 mln teńge kóleminde gýmanıtarlyq kómek alyp kelgen. Onyń ishinde alǵashqy qajettilik ta­ýar­lary, qurylys materıaldary, tósek-oryn jabdyqtary men azyq-túlik bar.

Aýdanǵa barmas buryn Qazaqstan Kásipodaqtar federasııasynyń tó­ra­ǵa­sy Satybaldy Dáýletalın Túrkistan oblysynyń ákimi О́mir­zaq Shókeevpen kezdesken bolatyn. Kezdesý barysynda oblys ákimi Kásipodaqtar federasııasyna qıyn da kúrdeli jaǵdaıǵa tap bolǵan adamdarǵa qamqorlyq tanytyp, qoldaý kórsetkenderi úshin alǵys aıtty. Sondaı-aq taraptar ótken jyly qazanda qol qoıylǵan Memorandým aıasynda áleýmettik áriptesterdiń ózara baılanysynyń aldaǵy josparlaryn talqylady. QRKF tóraǵasynyń aqparaty boıynsha, ókinishke qaraı, res­pýblıka bo­ıynsha óndiristik jaraqat faktileriniń ósimi baıqalýda. Mysaly, jyldyń basynan bergi bes aı ishinde elimizdiń kásiporyndaryndaǵy jumys oryndarynda alynǵan jaraqattar saldarynan 552 adam zardap shekse, 65 adam qaza bolǵan. S.Dáýletalınniń dereginshe, sonyń ishinde Túrkistan oblysynda óndiriste 29 jazataıym jaǵdaı oryn alǵan, 34 adam zardap shegip, 5 adam qaza boldy. Kóp jaǵdaıda bul jazata­­ıym oqıǵalar óndiristik keńester men eńbek qaýipsizdigi jáne eńbekti qorǵaý jónindegi tehnıkalyq ınspektorlar joq kásiporyndarda oryn alǵan.

О́z kezeginde oblys ákimi kór­se­til­gen máselelerdiń ózektiligin atap ótti. Taraptar jýyq arada áleýmettik árip­tes­tik jáne áleýmettik-eńbek qaty­nas­­taryn retteý jónindegi úsh­jaq­ty komıs­sııa qaraýyna eńbek sala­syna qa­tysty barlyq ózekti máse­le­ler­di shyǵarýǵa kelisti.

Túrkistan oblysy