Suhbat • 25 Maýsym, 2020

Nurjan Jalaýqyzy: Ár kúnim kamera aldyndaǵy qarbalasqa uqsaıdy

335 ret kórsetildi

Otandyq medıakeńistikte esimi erek atalatyn Nurjan Jalaýqyzy birqatar irgeli ujymdy basqara júrip, qazaq jýrnalıstıkasynyń damýyna qomaqty úles qosyp keledi. Almaty deıtin aıaýly shahardyń ótkeni men búginin, bary men joǵyn tarazylaıtyn «Almaty» telearnasyna basshylyqqa kelgeli beri de kóziqaraqty kórermenniń kózaıymyna aınalǵan tyń jobalardy júzege asyryp júr. Jýrnalıster qaýymynyń tól merekesi qarsańynda tájirıbeli medıamenedjermen áńgimelesken edik.

– Almaty azattyǵymyzdyń altyn arqaýy, táýelsizdigimizdiń tól besigi dep jatamyz. О́ner men mádenıettiń, rý­hanııattyń qasterli oshaǵyna ba­­lanǵan alyp shahardyń tynys-tir­shiligi búkil el turǵyndarynyń kóńil kúıine tikeleı áser etedi. Osyndaı iri qalanyń telearnasyna da úlken mindet júkteletini belgili.

– Álbette, solaı. «Almaty» tele­ar­nasyna basshylyq qyzmetke kelgenime bir jylǵa jýyqtap qalypty. О́zińiz aıtyp ótkendeı, Almaty – ult rýhanııatynyń altyn dińgegi, burynǵy astanamyz, qa­zirgi el ekonomıkasynyń kúretamyry, qarjy men iskerlik ortalyǵy. Abyz Alataýdyń baýraıynda ornalasqan mega­polıstiń ár kóshesinde shejire tunyp tur. Ulylarymyzdyń tabanynyń izi qalǵan, tarıhy tym tereńde jatqan, atynan ańyz ergen aıaýly qala. Jańashyl qala, jańalyqqa qumar qala, jasampaz qala. Elimizdiń kórikti jerlerin ta­­mashalaýǵa keletin týrıster úshin Ota­­­nymyzdyń áýe qaqpasy. Árkimniń jú­reginde óz Almatysy bar. Talaılardy baqyt qushaǵynda terbetken mundaı ǵa­jaıyp qalada ómir súrip, eńbek etýdiń ózi – bir ǵanıbet. Shyǵarmashylyq ómir jolymda maǵan osyndaı múmkindik bergen qala basshylyǵyna rızamyn ári jaýap­kershiliktiń júgi aýyr ekendigin de basa aıtqym keledi.

О́tken jyly Memleket basshysy Qasym-Jomart Toqaev qalamyzǵa arnaıy kelip Almatyny damytýǵa ar­nal­ǵan keńes ótkizdi. Shahardyń áleý­met­tik-ekonomıkalyq áleýetin art­tyrýǵa baǵyttalǵan basqosýda kóptegen mańyzdy másele saralandy. Qalanyń tarıhy, ótkeni men búgini tutas qamtylyp, jańa qadamdar jasaldy. Mine, sol jumystar qalaı atqarylyp jatyr, bilikti basshy Baqytjan Ábdiruly bastaǵan qala bıligi bul baǵytta qan­daı tyń betburystarǵa bardy? Osynyń bárin mártebeli kó­rer­menge qaz-qalpynda usynatyn bizdiń telearna. Ekonomıka, týrızm, óner, má­denıet, ádebıet, bilim-ǵylym, ekologııa, sport sekildi el órkendeýine serpin beretin negizgi salalardyń bet-beınesin boıamasyz bederleýge kúsh salamyz. Bir sózben aıtqanda, «Almaty» telearnasy – Almaty qalasynyń aınasy. Búkil armandar toǵysqan arda qalada bolǵan kez kelgen oqıǵa ózińiz aıtqandaı, tutas el turǵyndarynyń kóńil kúıine áser etedi. Osy jaǵynan keletin bolsaq, bizge qoıylatyn talap ta salmaqty. Sondyqtan Almatyda aıtylatyn sózdiń utymdy aıtylýyna, eldi yntymaq pen birlikke uıystyra bilýine basa mán beremiz. Álemde jáne elimizdiń túkpir-túkpirinde bolyp jatqan eleýli oqıǵalardy da nazardan tys qaldyrmaýǵa tyrysamyz. Bizdiń jobalarymyz Otanymyzdyń túkpir-túkpirine taralady.

– Iаǵnı, aty aımaqtyq arna bol­ǵany­men, arqalaǵan júgi, aýqymy keń deısiz ǵoı.

– Aımaqtyq dep belgili bir qalada ornalasqandyqtan aıtylatyn shyǵar. Degenmen, men bul ujymdy ulttyq deń­geıdegi memlekettik arna dep ataǵan bolar edim. О́ıtkeni bizdiń telearna – menshiktik qurylym turǵysynan qaraıtyn bolsaq, aksıonerlik qoǵam. Al qarjy kózderi turǵysynan Almaty ákimdiginiń tike­leı aqparat quraly jáne 100 pa­ıyz memlekettik tapsyrysty oryn­daý ba­ǵytynda qurylǵan telearna. Negizgi qu­­ryl­taıshymyz Almaty ákimdigine qa­­ras­ty Qoǵamdyq damý basqarmasy. Buqaralyq aqparat quraly bolǵannan keıin tek memlekettiń bıýdjetine ǵana qarap otyrmaımyz. Sol alǵan qarjyǵa sapaly ónim óndirý arqyly naryqta basqa da telearnalarmen qatarlasa eńbek etip júrgennen keıin jarnamaǵa arqa súıeımiz. Sapaly ónimder óndiriletin bolsa ǵana jarnama berýshiler ózderiniń ónimderin efırimizge ornalastyrýǵa nıet bildiredi. Sondyqtan ekinshi bir tabys kózimiz – jarnama. Alaıda bul ba­ǵytty negizgi nysanǵa alyp, jarnama qýa berý de durys emes. О́ıtkeni bizdiń bas­ty tóreshimiz kórermen. Sol kórermen qaýymnyń yqylasyna laıyq bolý úshin qyzmet etemiz. Telearnada tehnıkalyq aýqym úlken ról atqarady. Osydan jıyrma bir jyl buryn shy­myldyǵyn túrgen bizdiń arnamyzdyń tehnıkalyq áleýeti Almaty qalasynyń aýdıtorııasyna laıyqtalǵanymen, 2010 jyly iske qosylǵan «Otaý» spýtnıktik jelisine engen bolatyn. Sol arqyly basqa óńirlerge de taraı bastady. Aımaqtardaǵy ka­beldik júıelermen tikeleı baılanys ornatyp, kelisimshart arqyly taratylamyz. Byltyrǵa deıin sońǵy úsh jylda birinshi mýltıplekstegi 15 mindetti túrde taraıtyn telearnalardyń tiziminde bolǵan ekenbiz. Sol arqyly tek mıllıondar toǵysqan megapolıs turǵyndary ǵana emes, tutas el kórermenderi bizdiń arna arqyly qoǵam tynysyn tanıtyn. О́kinishke qaraı, ótken jyldyń 1 maýsymynan bastap bul tizimnen shyǵyp qaldyq. Osyǵan baılanysty tehnıkalyq taralýda azdaǵan shekteýler de joq emes. Iri megapolıstiń tynys-tirshiligin tanytatyn elektrondy BAQ-tyń elimizdiń barlyq aımaǵyndaǵy kórermenderge qol­jetimdi bolýyna mán berilse degen tilek kóńilimizdi meńdeıdi. Aldaǵy ýaqytta, bul másele nazardan tys qalmaıdy dep úmittenemiz. Eń bastysy, televızııanyń tabıǵatyn tereń túısinetin kásibı mamandardan quralǵan shyǵarmashylyq ujymymyz bar. Bıyl óziniń 21-shi tele­vızııalyq maýsymyn ashqan arnamyz teleefırde táýligine jalpy alǵanda 22 sa­ǵat boıy habar taratyp otyr.

– Arnanyń basym baǵyttaryna, eń basty jobalaryna jekeleı toqta­lyp ótseńiz.

– Kórermenge taǵylymy mol, tanym­dyq dúnıelerdi tartý etetin tańǵy habardan bastap, ár baǵdarlamanyń sapaly shyǵýyna aıryqsha mán beremiz. Byltyr shilde aıynan bastap aptasyna eki márte kórermenge tikeleı efırde jol tartatyn «AKIMAT LIVE» baǵdarlamasy jaryqqa shyqty. Alyp shahardyń 8 aýda­nynda ne istelip jatyr? Ákimdiktiń quramyna kiretin basqarmalar halyqtyń turmysyn jaqsartý úshin, qalanyń tirshiligin jandandyrý úshin qandaı qa­damdarǵa bardy? Qala ákiminiń tapsyrmasy júıeli júzege asyp jatyr ma? Turǵyndardy mazalaǵan qandaı prob­lemalar bar? Mine, osy sa­ýal­dardyń jaýabyn aıqyndaıtyn joba az ýaqyt ishinde kópshiliktiń yqylasyna bólenip úlgerdi. Baǵdarlamaǵa kelip túsetin qońyraýlar arqyly keri baılanysty baǵamdap otyramyz. Máselen, keıde Almatynyń problemasyn talqyǵa salyp jatqan kezde basqa da óńirlerden azamattar habarlasyp, ózin mazalaǵan saýaldaryn ortaǵa salady. Biz olarǵa da durys baǵyt-baǵdar berýge tyrysa­myz. Ásirese álem jurtshylyǵyn ábigerge sal­­­­ǵan indetke baılanysty jarııalanǵan tótenshe jaǵdaı kezinde áleýmettik tó­lemderdi qalaı alamyz, qaıda baramyz degen sekildi kóptegen suraqqa jaýap berdik. Efır tizginshilerin de sol baǵyt­ta daıarlap, stýdııa qonaǵynan kó­rer­men­­niń janaıqaıyna naqty jaýap alýǵa qam­shylaımyz.

Qoǵamdyq-áleýmettik taqyryptardy ózek etken «Sheshimi bar» – «Est reshenıe» baǵdarlamalary tirshilik jolynda kúrmeýi kóp kúrdeli jaıttarǵa tap bolǵan san taraý taǵdyr ıelerin jigerlendirip, olarǵa jol kórsetetin joba. Máselen, jumysqa qalaı ornalasýǵa bolady nemese qosymsha kásipti qalaı ıgerýge bolady degen saýaldarǵa osy joba arqyly kórermenderimiz naqty keıipkerlerdiń ómirlik tájirıbeleri arqyly jaýap aldy. «Baqytty otbasy» ortalyǵynyń mamandary áleýmettik qıyndyqqa tap bolǵan otbasylarǵa qamqorlyq qolyn sozdy. Qoly ashyq kásipkerlerimiz bir jyldyń ishinde osy joba arqyly ǵana 4 otbasyna 4 turǵyn úıdiń kiltin tabys etti. «Shynaıy Aqberenmen» jáne «Chestno s Sergeem Ponamarevym» dep atalatyn jańa baǵdarlamalarda qalaǵa qatysy bar belgili tulǵalardy sóıletip, súbeli suhbat júrgizemiz. «О́mir ıirimi» jobasynda adamgershilik asyl qasıetterdi, adamı qundylyqtardy dáripteımiz. Almatynyń tarıhynan syr shertetin arnaıy jobamyzda qalanyń ótkeni, tulǵalary týraly tyń derekter taýyp, kórermenge usynamyz. Jańalyqtar qyzmetiniń jumysyn jańasha sıpatta úılestirýge kúsh saldyq. Ásem shaharymyzdyń 2050 jylǵa deıingi strategııalyq baǵ­dar­lamasy qabyldanǵany belgili. San­dyq tehnologııalar saltanat qurǵan Alma­tynyń aqyldy qala retindegi damý jos­paryn udaıy turǵyndar nazaryna salyp otyramyz.

Baqytjan Ábdiruly shahar tizginin ustaǵan alǵashqy kúnnen bastap «Shet­siz qala» qaǵıdatyn ustanyp «Jańa Al­maty» konsepsııasyn usyndy, aldaǵy da­mýy­myzdy aıqyndap kórsetti. Kún saıyn aýmaǵy artyp kele jatqan megapolıs turǵyndarynyń jaıly ómir súrýi – basty nazarda. Iаǵnı ortalyqtan shetkeri ornalasqan aýdandardyń tur­ǵyndary úshin barlyq ıgilikter jasalýy qajet, olarǵa qolaıly ómir súrýge jaǵdaı jasaýymyz kerek. «Shetsiz qala» tujyrymynyń negizgi maqsaty osy. «Naýryzbaı», «Alataý» sekildi jańa aýdan­dardyń jaı-kúıi, tas qarańǵy kó­shelerdiń jaryqtandyrylýy, qalanyń qos aýdanynan Oqýshylar saraıyn salý bastamasy, sol sekildi taǵy basqa aýqym­dy jumystardyń bári de sózden góri istiń keńge qanat jaıǵanyn kórsetip otyr. Qala aýmaǵyna mıllıon aǵash egý, ekologııany jaqsartýǵa jasalǵan eleýli qadam. Turǵyndarǵa osy jumystardy nasıhattap qana qoımaı, munyń mańyzdy qadam ekenin, bárimiz atsalysa otyryp atqaratyn sharýa ekenin uǵyndyrýǵa tyrysamyz. Bul jumystardyń bárinde de eń aldymen bılik pen halyq arasyndaǵy altyn kópir ornatý ustanymyn negizge alyp kelemiz.

– Televızııa tutas ultty tárbıe­leıtin qýatty qural deıtin bolsaq, siz­derdiń shyǵarmashylyq top bul tur­ǵyda naqty qandaı jumystar atqa­ryp otyr?

– Eń aldymen myna nárseni saralap alǵanymyz jón. Dál qazirgi kezde televızııa qandaı qural? Burynǵydaı úgit-nasıhat quraly ma joq álde qoǵamdyq sanaǵa áser etetin, tárbıe tetigi me? Bul negizgi eki fýnksııa da joǵalyp ketken joq dep aıtqan bolar edim. Bir-birimen egiz óriletin osynaý qos júıe kez kelgen BAQ-tyń birden-bir negizgi baǵyty bolyp qala bermek. Qazirgi kezde telearna – árkimniń oıyn túzeıtin, boıyn túzeıtin, soǵan áser etip jol silteıtin aqparattyq derekterdiń naqty ári shynaıy kózi desek artyq bolmas. Básekelestik naryǵy saltanat qurǵan mezette, áp-sátte habar taratatyn túrli ǵalamtor jelileri paıda boldy. Áleýmettik jeliniń áleýetin tıimdi paıdalanatyn, mıllıondaǵan aýdı­to­rııa­sy bar blogerler de kóbeıdi. Osy ret­­te olardyń bári aqparatty shynaıy derekkózderden alyp otyr ma, joq álde jeke tulǵalardyń paıymynan týyndaǵan pikirlermen shektelip qalyp jatyr ma degen saýal týyndaıdy. Bireýi durys aıtady, bireýi burys aıtady. Mine, osyǵan nazar aýdarýymyz kerek. Sebebi qısynǵa kelmeıtin, bir ǵana bolymsyz aqparat búkil qoǵamdy adastyrýy múmkin.

Al BAQ-tyń jumystaǵy eń negizgi us­tanymy – jurtshylyqqa tek shynaıy aqparat jetkizý. Kóz kórip, kóńil sen­begen nárseni aıta salý, jaza salý – jýrna­lıstıkanyń tabıǵatyna jat nárse. Sońǵy kezde feık-jańalyqtar, eldiń nazaryn ózine aýdarǵysy keletin mysaldar da kóbeıe túsýde. Mundaıdan aýlaq bolý kórermenniń bizge degen senimin artty­rady. Ekinshiden, árbir telearnanyń baǵdarlamalyq saıasaty bolady. Bizdiń telearnamyz joǵaryda aıtqanymdaı, alyp shahardyń bar men joǵyn baǵamdap, atqarylyp jatqan aýqymdy jumysty halyqqa júıelep túsindirip berý bolmaq.

Saýalyńyzǵa naqtyraq oıysar bolsam, rasymen de kókjáshiktiń urpaq tár­bıesine áser etetin qýaty zor. Almaty – halqymyzdyń uly perzentteri Muh­tar Áýezov, Qanysh Sátbaev, Ahmet Ju­banov sekildi dara tulǵalardyń izi qalǵan qasıetti qala. Urpaqty ulaǵatqa shaqyratyn berik tutqa ádebıet deıtin bolsaq, injý-marjan muralardy, ǵajaıyp shyǵarmalardy kórermenniń kóńil bıigi­ne kóterýdi maqsat tutamyz. Qala ákimi­niń tapsyrmasymen ult rýhanııaty­nyń qasıetti qarashańyraǵy – Qazaqstan Jazý­shylar odaǵynyń 85 jyldyq me­­reıli belesine arnap qabyrǵaly qa­lam­­ger­lerimizdiń ómirbaıandyq beıne­­anta­logııasyn ázirledik. Bul – bola­shaq urpaqqa azyq bolatyn ómir­sheń joba. Abaı Qunanbaıulynyń 175 jyl­dyǵyna, Ál-Farabı babamyzdyń 1150 jyldyǵyna baılanysty birneshe joba daıyndadyq. Altyn Ordanyń 750 jyl­dyǵyna arnalǵan derekti fılm ázirleý ústindemiz. Jýyrda «Almatym – meniń mahabbatym» dep atalatyn mıýzıkl ja­ryqqa shyqty. Bul jobalardyń bárinde adamdy arman bıigine jeteleı jóneletin ómir jyry, kóńil syry názik sezimmen jymdasyp, óskeleń ur­paqqa rýhanı tárbıe berýdi kózdeıdi. Jeńis merekesiniń 75 jyldyǵyna ar­nal­ǵan arnaıy baǵdarlamada buryn-sońdy esh jerde aıtylmaǵan tyń máli­metterdi keltire otyryp, qasiretti qan maıdannyń janymyzǵa salǵan jarasyn, qazaq jaýyngerleriniń kózsiz erligin áserli jetkizýge tyrystyq. Oljas Sú­leımenovpen júrgizgen eksklıýzıvti suh­batta Raqymjan Qoshqarbaevpen bir­ge Reıhstagqa tý tikken Grıgorıı Bo­latovtyń erligi týraly baıandalǵan erek­she estelik arhıvimizge endi. Joba­larymyzdyń bir parasyna ǵana toqtalyp óttim. Aldymyzda úlken josparlar bar. Onyń bárin teleekrannan tamashalaýǵa bolady.

– Buǵan deıin qazaq televızııasy­nyń qarlyǵashy «Qazaqstan teleradıo korporasııasyn» basqardyńyz, sol sekildi basqa da otandyq aqpa­rat­tyq arnalarda jaýapty qyz­met­terde boldyńyz. Bir sózben aıt­qanda, osy salanyń qazanynda qaı­naǵan medıamenedjersiz. «Sizdiń paıymyńyzdaǵy qazaq televı­zııa­sy­nyń qazirgi betalysy qalaı?» degen saýaldy qoıǵym kelip otyr.

– Árbir kezeńniń úni sol tusta shyqqan gazet-jýrnaldarmen, teleónimdermen ólshenedi. Buqaralyq aqparat quraldary – dáýirdiń aınasy, aınymas tarıhy. Osy turǵydan qaraıtyn bolsaq, elimizde BAQ salasynyń damýy úshin barlyq jaǵdaı jasalyp otyr. Keler jyly táýelsizdigimizge otyz jyl tolady. Osy otyz jyl boıy Elbasy Nursultan Na­zarbaev BAQ quraldaryna erekshe yqylas tanytyp keldi. Sóz bostandyǵy, oı erkindigi týraly sonaý 2000 jyldardyń ózinde jıi aıtylatyn. Bul otandyq jýrnalıstıkanyń damýyna úlken serpin bergen jyldar boldy. Máselen, 2011 jyldyń 1 qyrkúıeginde Qazaqstan aqparattyq keńistiginiń damýynda eleýli serpilis jasaldy. О́ıtkeni oǵan deıin 100 paıyz memlekettik tilde habar taratatyn birde-bir arna bolmaǵan. Atalǵan jyldyń 4 shildesinde Elbasy meni qabyldap, korporasııanyń tizginin senip tapsyrǵanda osy ıdeıany alǵa tartqan bolatyn. Ol kisi: «Sizdiń tájirıbeńiz­di eskerip, osy jumystardy tapsyra­ıyn, soǵan daıynsyz ba?» degende men birden daıynmyn degen joqpyn, tyrysaıyn dedim. Aryq aıtyp semiz shyq degen ustanymdy alǵa ustadym. Ujym bolyp birlesip, ulttyq arnany júz paıyz qazaq tilinde habar taratatyn arnaǵa aınaldyrdyq. Aldaǵy kúzde 10 jyldyǵyn atap ótetin «Balapan» telearnasy, el sportynyń aıbaryn aspandatýǵa baǵyttalyp, Nursultan Ábishulynyń tikeleı tapsyrmasymen 2013 jyly qurylǵan «KAZSPORT» arnasy jáne taǵy basqa da otandyq teleradıoarnalar aqparattyq keńistikte óz oryndaryn shegeledi desek bolady.

Onyń ber jaǵynda kóptegen memle­kettik emes telearnalar quryldy, basylymdar jaryq kórdi. Munyń bári bizdiń memleketimizdiń aqparattyq keńistikti jan-jaqty zerttep-zerdelep, kópultty Qazaqstanymyzdyń BAQ salasynyń erkin damýyna jol ashqanyn kórsetedi. «Otaý» spýtnıktiń jelisiniń taralýy da osy jyldardyń enshisinde. Árıne kem­shilikter de joq emes. О́zbekstanmen nemese Qytaımen shekaralas jatqan aımaqtardaǵy radıotolqyndardy kór­shi elderdiń jıilikteri basyp ketip jatady. Bul bizdiń tehnıkalyq múmkin­dikterimizdiń áli de bolsa shekteýli eken­diginiń kórinisi. Tehnıka únemi damyp otyrady. Osy jańa tehnologııanyń ómirge enýiniń nátıjesinde osyndaı kemshin tustarymyzdy rettep alsaq jón bolar edi. Sondaı-aq áleýmettik jeliler ómirimizge dendep engen tusta dástúrli BAQ-tardyń mindeti odan saıyn arta túsýde. Shynaıy aqparatty shuǵyl túrde taratý – bul kásibıliktiń birden-bir ólshemi.

Bir eskerer jaıt, dúnıeniń bárin tek bıýdjetpen ólsheýge bolmaıdy. Úsh telearnaǵa basshylyq ettim. Biri – kom­­­mersııalyq, biri – ulttyq, endi biri – aı­­maqtyq. Úsheýiniń de bıýdjeti ár­túrli. Biraq barlyq jerde bir jumys. Jýrnalıstıka degenińizdiń ózi dárigerler sekildi saǵatpen sanaspaıtyn qyzmet túri ǵoı. Kún-tún demeı jumys isteıtin kezimiz bolady. Bylaısha aıtqanda, ár kúnimiz kamera aldyndaǵy qarbalasqa uqsaıdy. Kez kelgen shyǵarmashylyq jumystyń jemisi sol – qandaı da bir jobań halyqtyń kózaıymyna aınalsa kóńiliń qanaǵat taýyp, jigerlenesiń. Zamannyń ereksheligi sol – buryn joba tek efırden ótse, endi ony áleýmettik jeliler arqyly kórermenge usynasyń. Tek bizdiń telearnada ǵana emes, otandyq medıanaryqta myqty televızııalyq jobalar qalyptasty. Nıeti durys, kóńili oıaý kórermenniń bul jetistikterdi kór­meýi múmkin emes.

– Tótenshe jaǵdaı kezinde qolǵa alynǵan jobalar, telearna tarapynan arnaıy uıymdastyrylǵan is-sharalar týraly aıtyp ótseńiz?

– Beti beri qarady desek te, qaýipti indettiń qaı márege baryp jyǵylatyny áli de belgisiz. Eń alǵash indet juqtyrǵan naýqas, ókinishke qaraı, bizdiń qalamyzda tirkeldi. Telearnamyzdyń baǵdarlamalar kestesin ózgerttik te, jańalyqtar qyzme­tiniń jumysyn jedel túrde qaıta qa­radyq. Negizinde jeltoqsan aıynda indet Ýhanda paıda bola bastaǵan kezden taqyrypty zerttep, kórermendi ha­bardar ete bastaǵan bolatynbyz. Al­dyńǵy shepte júrgen dárigerlerdiń ju­­mysyn kórsetý maqsatynda birneshe derekti fılm, arnaıy beınerolıkter daıyndadyq. Eń ókinishtisi, qoǵamda áli de indettiń bar ekenine senbeıtinder bar. Solarǵa túsindirý úshin, pandemııanyń qanshalyqty qaterli ekenin dárigerlerge aıtqyzdyq. Kún saıyn eldegi jáne álem­­degi sońǵy aqparattardy jipke tizip, kórermenge usynýdy nazarda usta­dyq. CCTV-niń Ýhannan bastalǵan indet týraly, Discovery telearnasynyń álem­degi pandemııa jaıly túsirgen derek­ti fılmderin de shuǵyl túrde aýda­ryp, kórermenderdiń nazaryna usyn­­dyq. Ujymda da saqtyq sharalaryn bir­den qolǵa aldyq. Búginge deıin qyz­met­ker­lerimizdi birneshe ret PSR testi­nen ótkizdik. Myń shúkir deıin, bárimiz amanbyz.

Elimizdegi tótenshe jaǵdaı jetpis kún­ge jýyq sozylǵan kezde qala ákimi bas­qarǵan Shuǵyl shtabtyń jınalysynda da, qazirgi kezde ákimniń arnaıy tapsyrmasymen qurylǵan qalalyq vedomstvoaralyq komıssııanyń onlaın-otyrystarynda da indettiń údemeýine qatysty is-sharalar­dy halyqqa jedel túrde jetkizý úshin qyz­met etýdemiz. Basylymdaryńyzdyń múm­kindigin paıdalana otyryp, barsha oqyr­mandy qaýipsizdik talaptaryn saqtaýǵa shaqyr­ǵym keledi. Koronavırýs ázilge aınaldyratyn áńgime emes. Bárimiz bir­lese kúressek qana bul tajaldy toıtara ala­myz. Jaqyndarymyzǵa janashyr bolaıyq.

– Jýrnalıster kúni qarsańynda jas oqyrmandarymyzǵa, tilshilik tir­shilikke bet alǵan izbasarlaryńyzǵa aıtar keńesińiz, tilegińiz bar ma?

– Abaısha aıtsaq, «Túzý júrip, ty­rysqan adamdy Qudaı da qur tas­tamaıdy». Eseli eńbek, mańdaı ter muratqa jetkizedi. Buljymas qaǵıda osy. Údege saı bolsań, qataryńnan al­ǵa ozasyń. Tasty tesetin sýdyń qýaty emes, tamshynyń turaqtylyǵy. Sol sekil­di sóz ónerin janyna serik etken jan únemi oqyp, izdenip, ózin qamshylyp otyrýy kerek. Júsip Balasaǵun babamyz: «Áýeli oqyp, ony oıyńa óre bil, О́zi-aq keler sonsoń jazý óneri» demep pe edi. Saýatty, bilikti maman eshqashan tasada qalmaıdy. Jýrnalıstıka deıtin qasıetti aıdynnyń tunyǵyn laılamaımyn, kıesin ketirmeımin degen ustanym árbir bolashaq tilshiniń ómirlik kredosyna aınalýy tıis.

– Áńgimeńizge rahmet.

 

Áńgimelesken

Arman OKTIаBR,

«Egemen Qazaqstan»

Sońǵy jańalyqtar

Aısberg aqıqaty

Ádebıet • Keshe

Joq kitapty izdeý

Ádebıet • Keshe

Krest-kedergi...

Ádebıet • Keshe

Zaısanda mal qyrylyp jatyr

Aımaqtar • Keshe

Uqsas jańalyqtar