Epıdemııalyq ahýalda oń qubylys baıqalady

- Qazir naýqastardy qabyldaý úshin 3300 oryn bar. Tek sońǵy aptanyń ishinde 924 oryndyq provızorlyq gospıtal jasaqtaldy. Tutastaı alǵanda óńirdegi provızorlyq oryndar jetpis paıyzǵa ǵana tolyq. Artyq qorda 715 kerýet tur. Sonymen birge emhanalar janynan 725 oryndyq kúndizgi stasıonarlar jumys jasaıdy. Onyń bári qajetti medısınalyq qondyrǵylarmen tolyqtaı qamtylǵan. Árıne basty másele sanda emes, sapalyq kórsetkishter men túpki nátıjede ǵoı. Bul rette ótken maýsym aıynda myńǵa jýyq adam dertinen qulan taza emdelip shyqqany kóńilge ájeptáýir medeý, - dedi budan ári Ońdasyn Seıiluly.

Kelesi kezekte dári-dármektermen qamtý máselesine kóshken brıfıng ótkizýshi dárihana jelisiniń aınalymyn tolyqtyrý úshin shetelderden onyń on alty túri qosymsha satyp alynǵanyn alǵa tartty. Brıfıng kezinde dárihanalar qajetti preporattarmen kún saıyn tolyǵyp otyrǵany áıtse de suranystyń tym kóptiginen onyń tez azaıyp ketetini, sonyń saldarynan qajetti preporattar der kezinde tabylmaı qalatyny da ashyq aıtyldy. Mundaı jaǵdaıda túbegeıli sheshim qabyldaý qajettigi anyq. Oblys ákimi bul máseleniń sheshimin de soqyrǵa taıaq ustatqandaı shegelep kórsetti. Atap aıtqanda bul ınvestorlarmen ózara kelisimge sáıkes bólingen 500 mıllıon teńge qarajat bolyp otyr. Osy arqyly ókpe qabynýyna qajetti dári-dármek qory odan ári tolyqtyrylmaq.

Qazirgi jaǵdaıda atalǵan jana vırýstyq dertke qarsy dári shyǵarý múmkin emesteı is. Áıtse de Aqtóbe qalasyndaǵy "TK Farm" farmasevtıkalyq kompanııasy geparın degen vırýsqa qarsy preporat shyǵarý isin qolǵa alǵany otandyq dári ónerkásibiniń baǵa jetpes jańashyl qadamy bolary anyq. Atalǵan preporat taıaý kúnderde aýrýhýnalarǵa túsedi dep belgilengen. Sonymen birge naýqastardy tynys alý apparatymen qamtý jóninde de atqarylǵan is az emes.

O.S.Orazalın oblysta indetpen kúreste tek ınfeksıonıst dárigerler ǵana emes, sonymen birge barlyq joǵary bilimdi densaýlyq saqshylary jáne medısına ýnıversıtetiniń túlekteri tutastaı jumyldyrylǵanyn jetkizdi. Buǵan qosymsha úsh myńǵa jýyq orta býyn medısına mamandary tartylǵan. Osy arqyly aýrýhýnalar men emhanalardaǵy mamandar tapshylyǵyn joıýǵa qol jetkize aldyq dedi ol. Indetpen betpe bet kelý kezinde vırýs juqtyrǵan bir medbıke, túrli salada qyzmet jasaıtyn tórt medısınalyq qyzmetker qaıtys bolǵanyn brıfıng ıesi úlken ókinishpen tolqý sáti ústinde jetkizdi.

Oblys ákimi joǵaryda ózi aıtyp ótkendeı shuǵyl atqarylǵan keshendi is-qımyldyń nátıjesinde sońǵy aptada naýqastar sany báseńdegenin oń qubylys retinde atap ótti. Aıtalyq ótken maýsym aıynyń sońǵy aptalarynda aýrýhýnalarǵa kún saıyn 120-130 adam túsken bolsa búginde olardyń sany 70-80 adamǵa deıin azaıdy. Joǵaryda aıtyp ótkenimdeı emdeý oryndarynan dertten aıyǵyp jazylyp úılerine oralǵan aqtóbelikterdiń sany óse tústi. Máselen tek sońǵy táýiliktiń ishinde 81 adam ókpe qabynýy dertimen aýrýhýnaǵa tússe, osy dıagnoz boıynsha 161 adam jazylyp shyqqany epıdemııalyq ahýal aýqymyndaǵy oń qubylys retinde baǵalaýǵa bolady dedi oblys ákimi.

BAQ ókilderi tarapynan berilgen aýrýhýnada oryn bolmaǵandyqtan naýqasty qabyldamapty. Qabyldanǵandardyń ózi dálizderde jatady eken. Shaqyrylǵan qońyraýǵa jedel járdem kóligi kelmepti degen ýájder de estilip qalady. Buǵan ne deısiz degen saýalǵa ol. Resmı anyqtama men derek kózderi boıynsha mundaı jaǵdaılar oryn alǵan joq. Aýrýhýnalarda oryn bar. Turǵyndar arasynda osyndaı alyp qashpa sózder aıtylyp qalyp júrgenin estigen soń onyń anyq-qanyǵyna kóz jetkizý úshin provızorlyq gospıtaldarǵa arnaıy baryp naqty istiń mán-jáıimen tanysyp jaǵdaıdy óz kózimmen kórip naýqtastarmen jáne dárigerlermen kezdestim degen jaýap qaıtardy.        

Brıfıngti qorytyndylaı kele Aqtóbe oblysynyń ákimi Ońdasyn Orazalın sońǵy kezde óńirdegi epıdemııalyq ahýaldy saýyqtyrýda oń qubylys baıqalǵanymen bul jáıt bosańsýǵa esh negiz bola almaıtyny jóninde túıin jasady.

 AQTО́BE