Atalǵan fabrıkada kúli az, joǵary sapaly kómir baıytylatyn bolady. Investorlardyń jospary boıynsha óndiristik nysan 2021 jylǵa qaraı iske qosylýǵa tıis eken.
Jalpy quny 12 mlrd teńge bolatyn jobany júzege asyrý maqsatynda kásipkerler úshin «Qazaqstannyń damý banki» AQ tarapynan jeti jyl merzimge dep 9 mlrd 24 mln teńge mólsherinde nesıe jelisi ashylypty. Iаǵnı qaryz qarajaty kompanııaǵa Qazaqstan Respýblıkasynyń ındýstrııalyq-ınnovasııalyq damýynyń 2015-2019 jyldarǵa arnalǵan memlekettik baǵdarlamasy aıasynda usynylǵan. Qalǵan 3 mlrd teńge shamasyndaǵy qarjyny ınvestorlar qurylysqa óz janynan salady.
Jańadan boı kóteretin kásiporyn sapaly kómir óndirip qoımaı, qorshaǵan ortaǵa zııan keltirmeıtin nysan retinde jaqsy atqa ıe bolmaqshy. Mysaly, fabrıkadaǵy baıytý úderisi sý tundyratyn basseınder úshin sonsha kóp aýmaqty qajet etpeıtin jabyq bólmede iske asyrylady. Avtomatty jáne elektrondy jańa tehnologııalar arqyly óndiristiń barlyq kezeńderin kásiporynnyń basqarý ortalyǵynan operator baqylaıtyn bolady. Jobanyń búgingi kúnde qorshaǵan ortaǵa áserdi baǵalaý memlekettik ekologııalyq saraptamasynan ótkenin de aıta ketken jón.
Brıfıngte Qaz Carbon JShS-nyń aksıoneri Erlan Nyǵmatýlın kómirdi baıytý úshin ylǵaldy baıytý tehnologııasynyń qoldanylatynyn málim etti. Iаǵnı ol paıdaly qazbalardy shıkizattyń jalpy taý-ken massasynan barynsha ajyratyp alýǵa múmkindik beredi.
– Baıytýdyń barlyq rásimi hımııalyq reagentterdi qoldanbaı jabyq sıklde ótedi. Bul qorshaǵan ortaǵa áser etýdiń tazalyǵyna alyp keledi jáne jalpy jobanyń ekologııalyq oń áserin edáýir arttyrady. Baıytý fabrıkasyndaǵy óndiristik úderisterdi avtomattandyrýdyń joǵary deńgeıi daıyn ónimniń sapasy men tehnologııasynyń saqtalýyn baqylaýǵa múmkindik beredi. Fabrıkanyń qýattylyǵy saǵatyna 300 tonna nemese jylyna 1 800 000 tonna bolady, – dedi ol.
Shıkizat retinde Qaraǵandy óńiriniń kómirin paıdalanatyn jańa kásiporyn daıyn ónimdi eksportqa shyǵarýdy kózdeıdi. Odan bólek, Qaraǵandy ferroqorytpa zaýytynda – YDD Corporation kompanııasynda paıdalaný da josparda bar eken.
Bul jóninde Qaz Carbon JShS-nyń aksıoneri Davıd Kemertelıdze tarqatyp aıtyp berdi.
– Qazaqstanda iri ınvestısııalyq jobalardy iske asyrý boıynsha mol tájirıbemiz bar. Sondyqtan alys jáne taıaý shetel naryǵynyń, sonymen qatar ishki naryqtyń qajetin zertteı otyryp, jańa jobalardy iske asyrýdy qolǵa aldyq. Is júzinde Qazaqstanda biregeı ınvestısııalyq ahýaldyń qalyptasqanyna ǵana emes, sonymen birge qosylǵan quny joǵary ónim jasaý úshin úlken shıkizat bazasy bar ekenine kóz jetkizdik, – dep atap ótti kásipker.
Brıfıng barysynda «Qazaqstannyń damý banki» AQ Basqarma tóraǵasy Abaı Sarqulov bul jobany iske asyrý Memleket basshysynyń ınvestısııa tartý, óńdeý ónerkásibindegi eńbek ónimdiligin arttyrý jónindegi tikeleı tapsyrmalarynyń oryndalýyna ıgi áserin tıgizetinin aıtty.
Zamanaýı kásiporyn jumys isteı bastaǵanda 110 adamdy turaqty jumyspen qamtıtyn bolady. Al nysan qurylysy kezinde 500-den astam adam jumysqa tartylmaq. Al zaýyt, joǵaryda aıtqanymyzdaı, óz ónimderin eksportqa shyǵaratyn bolady. Munyń ózi elimizdiń eksporttyq áleýetin damytýǵa úles qosady degen úmitke negiz beredi.
Qarjylandyrýdyń ekinshi bóligi qazir jumys istep turǵan quıý óndirisimen aınalysatyn zaýytty jańǵyrtýǵa baǵyttalady. Al bul óz kezeginde bolat jáne shoıyn ónimderin shyǵarý boıynsha qoldanystaǵy qýattardy ulǵaıtýǵa múmkindik beredi. Eske salar bolsaq, atalǵan zaýyt 2018 jyly sheteldik ınvestorlardyń qatysýymen aýqymdy jańǵyrtýdan ótkizilgen bolatyn. Bul kásiporyn negizinen shoıyn jáne bolat ónimderin shyǵarýmen, koks jáne jartylaı koks óndirýmen aınalysady. Jyldyq jobalyq qýaty 120 myń tonna bolatyn zaýyt 900-den astam bolat jáne shoıyn ónimderin shyǵarady.
Zaýytty jańǵyrtý boıynsha ınvestorlar eki jyl ishinde 8 mlrd teńgeden astam jeke ınvestısııa salyp, 1 216 jańa jumys ornyn ashqan. Kompanııadaǵy qyzmetkerlerdiń ortasha jalaqysy 245 myń teńgeni quraıdy. Byltyr kompanııa tarapynan memleketke 2,1 mlrd teńge mólsherinde salyq tólengen. Qaz Carbon JShS-nyń jańa jobalaryn júzege asyrý aımaq ekonomıkasyn ártaraptandyrýǵa serpin beredi jáne sońǵy býyn tehnologııalarynyń transferti esebinen eńbek ónimdiligin arttyrýǵa súbeli úles qosady.
QARAǴANDY
