Túrkistan oblysy boıynsha Qazaqstan halqy assambleıasy tóraǵasynyń orynbasary Ǵanı Rysbekovtiń málimdeýinshe, qalǵan 911 adamnyń qujaty túgel bolmaýyna baılanysty tıisti kómekti almaǵan.
"Qazirgi tańda tótenshe jaǵdaıdan zardap shekkenderge beriletin qarjylaı kómekti úlestirý jumystary atqarylýda. Anyqtaý jumystary kezinde 146 azamattyń qujaty tıisti ákimdiktiń tarapynan rastaldy. Al, 62 azamattyń qujaty qaıtalansa, 4 adam basqa eldiń azamattary bolyp shyqqan. Sondaı-aq, 779 azamattyń qujaty komıssııanyń qaraýynan qaıta ótetin bolady",-dedi Ǵ.Rysbekov.
Budan bólek, kásipker Álisher Ýsmanovtyń qory esebinen topan sýdyń zardabyn kórgen 5205 otbasyǵa 1000 AQSh dollarynan berilgen. Búginde dál osyndaı kómek alýy tıis qosymsha 120 otbasy anyqtalyp otyr. Nátıjesinde 5316 otbasynyń esepshotyna 2 206 724 760,0 teńge jiberildi.
Osy sııaqty qarjylaı qoldaýlarǵa ıe bolǵan jannyń biri Fırdaýsı aýylynyń turǵyny Fınaıat Faızıev qıyndyqqa tap bolǵan azamattarǵa kómek qolyn sozǵandarǵa sheksiz alǵysyn bildirdi. "Aýylymyzdy topan sý basqan kúnnen bastap, bizge ártúrli kómek kórsetilip keledi. Mysaly, úısiz qalǵan kezde túgel aýyldy ýaqytsha evakýasııalyq ortalyqqa aparyp jaıǵastyrdy. Azyq-túlik, kıim-keshek, basqa da qajetti zattarmen qamtamasyz etti. Odan bólek, ákimdiktiń qoldaýymen aýyldy qoqystan tazartyp aldyq. Mine, búginde 17 mln teńgeniń 50 paıyzyn aýdaryp berdi. Sol qarjyǵa baspanamyzdy salyp jatyrmyz. Qalǵanyn úıdiń shatyryn jaýyp bolǵan soń aýdaryp beretin boldy. Jáne kómek retinde keıbir qurylys materıaldaryn tegin de jetkizip berýde. Osyndaı kómekke uıytqy bolyp otyrǵan Memleket basshysy men oblys ákimine jáne barsha halyqqa alǵys aıtqymyz keledi", deıdi F.Faızıev.
