Nur-Sultan qalalyq polısııa departamentiniń Esil aýdandyq polısııa basqarmasy basshysy Madııar Aıtýǵanovtyń aıtýynsha, sońǵy táýlikte Nur-Sultanda karantın tártibin buzǵan 60 jaǵdaı anyqtalǵan.
"Tártip saqshylary, epıdemıologtar, eriktiler, jergilikti atqarýshy organdardyń ókilderi karantın rejımin buzǵandardy anyqtaý boıynsha reıd júrgizýde. Sońǵy táýlikte elordada mobıldi toptar karantın tártibi buzylǵanyn anyqtady. Onyń ishinde maska taǵý jáne áleýmettik qashyqtyq saqtaý boıynsha mindetti talaptar saqtalmaǵan 42 jaǵdaı jáne tyıym salynǵan ýaqytta jumys istegen 18 kásipker anyqtaldy", – deıdi M.Aıtýǵanov.
Qalalyq polısııa departamentiniń habarlaýynsha, zań buzý týraly materıaldar Nur-Sultan qalasynyń taýarlar men kórsetilgen qyzmetterdiń sapasy men qaýipsizdigin baqylaý departamentine tapsyrylǵan. Elordada 16 monıtorıngtik mobıldi top jumys isteıdi. Olar oıyn-saýyq oryndaryna, qoǵamdyq tamaqtaný nysandaryna, saýna, monsha, attraksıondarǵa baryp, tekseris júrgizedi. Sonymen qatar, búgin elordada monıtorıngtik top Botanıkalyq baqta azamattarǵa sanıtarlyq talaptar men erejelerdi saqtaý boıynsha túsindirý jumysyn júrgizdi.
"Eger azamat erejege ádeıi baǵynbaıtyn bolsa nemese sol zań buzýshylyq boıynsha qaıta ustalsa, tıisti hattama toltyrylady. Azamattardyń kópshiligi túsindirý jumystaryn durys qabyldap jatyr. Biraq bul is-sharalar ózderiniń qaýipsizdigi úshin ótkizilip jatqanyn túsinbeıtinder de bar", - deıdi Aıtýǵanov.
Karantın rejımin saqtamaǵan jaǵdaıda jeke tulǵalarǵa 30 AEK (83 340 teńge), zańdy tulǵalarǵa 230 AEK (638 940 teńge) kóleminde aıyppul salynatyn bolady.
