Osy oraıda Nur Otan partııasy Jas Otan jastar qanaty Aqtóbe oblystyq fılıalynyń eriktileri «Dárigerlerge myń alǵys!» aksııasy aıasynda oblystyq klınıkalyq aýrýhananyń qyzmetkerlerine jetkilikti túrde ulttyq sýsynnyń tóresi – sertıfıkattalǵan sapasy joǵary qymyz jetkizip berdi. Buǵan deıin olar mundaǵy aq halatty abzal jandarǵa qýaty kúshti, qunary mol ystyq taǵamdar ákelip bergen edi.
– Bizdiń qatarymyzda belgili bir kásippen aınalysýǵa ýaqyt taýyp, materıaldyq ıgilikti óz qoldarymen óndirip júrgender de bar. «Dárigerlerge myń alǵys!» sheńberindegi qaıyrymdylyq sharalaryna jumsalǵan qarajat negizinen sol volonterlerdiń shynaıy nıet bildirýi arqyly jınaqtaldy. Áıtse de olar bizge óz aty-jónderiniń atalmaýy jóninde talap-tilekterin jetkizdi. Ony nazarǵa almaýǵa moraldyq quqymyz joq, – dedi partııanyń jastar qanatynyń Aqtóbe oblystyq fılıalynyń keńesshisi Murat Mustafın.
Adal kóńilden bildirilgen iltıpat rızashylyq sezimine bóleıdi. Bul rette Aqtóbe medısına ortalyǵyna qoldaý kórsetýge kelgen jasotandyqtarǵa degen alǵys sezimin osy ujymnyń ınfeksıonıst-dárigeri Gúlmıra Qurmanbaı jetkizdi.
– Másele syı men qurmettiń úlken-kishisinde emes, onyń taza júrekpen jasalýynda. Pandemııamen kúres bastalǵan kezinen beri osyndaı kóńil tolqytarlyq jaǵdaılarǵa birneshe ret kýá boldyq. Sóıtip qandaı qıyn kezde de bizge qoldaý kórsetip janashyrlyq tanyta alatyndar bar ekenin sezine tústik. Munyń ózi bizge moraldyq jáne materıaldyq turǵydan úlken dem berdi. Mine, búgin aýrýhanaǵa jetekshi partııamyzdyń jas qyrandary kelip, óz yqylas-nıetterin bildirip otyr. Rahmet, aınalaıyndar, aldaryńnan aq kún týsyn!, – dedi ol.
Sondaı-aq atalǵan aksııa aıasynda Nur Otan partııasy Aqtóbe oblystyq fılıalynyń ókilderi qaladaǵy «Darý» medısınalyq saýyqtyrý ortalyǵynyń janynan ashylǵan provızorlyq bólimshede bolyp, pnevmonııadan emdelip jatqan naýqastarǵa 500 myń teńgeniń azyq-túligin jetkizdi.
AQTО́BE
