Árbir pakette dárigerlerge arnalǵan jemis-jıdekter, táttiler men sút ónimderi salynǵan. Volonterdiń aıtýynsha, bul aksııa elimizdiń barlyq óńirinde jalǵasyn tabýda.
– Búginde Aqtaý qalasynda koronavırýs ınfeksııasyna qarsy dárigerler kún men tún demeı damylsyz eńbek etýde. Aqtaý qalasy boıynsha 6 qonaqúıge ornalastyrylǵan dárigerlerge, meıirbıkelerge kúnbe-kún oblystyq máslıhat depýtattary, kásipkerler, Jas Otan JQ belsendileri men volonterler jemis-jıdekter, sút ónimderi, túrli táttilerdi ákelip, úlestirip júrmiz. Basty maqsatymyz – dárigerlerge alǵys aıtyp, qıyn ýaqytta qoldaý bildirý. Biz bul aýrýdy birlesip jeńemiz dep senemin, – dedi fılıal tóraǵasy Naýryzbek Maǵdatov.
Jaqsy jumys jalǵasyn taýyp, arada bir kún ótkende Jas Otan belsendileri kópbeıindi provızorlyq stasıonarǵa 35 dana matras jetkizdi. Qazir Mańǵystaý oblystyq aýrýhanasy kópbeıindi provızorlyq stasıonarǵa aýystyryldy. Naýqastardyń kóptep túsýine baılanysty aýyr naýqastarǵa arnalǵan matras jetispeýshiligi baıqaldy. Osyǵan baılanysty jasotandyqtar qoldaýymen, demeýshiler kómegimen volonterler matrastardy satyp alyp, aýrýhanaǵa tabys etti.
– Biz demeýshilerdiń arqasynda 35 matras satyp alyp, kópsalaly provızorlyq stasıonarǵa jetkizdik. Buǵan deıin aýrýhana basshylyǵy matrastar men tósek-oryn tapshylyǵy týraly máseleni aıtqan bolatyn. Sondyqtan kelesi aptadan bastap tósek-oryn tigý boıynsha jańa aksııany iske qosýdy sheshtik. Birlesken kúsh-jigerimizdi paıdalanyp, qoǵamǵa úles qossaq deımiz – dedi N.Maǵdatov.
«Qazirgi jaǵdaıǵa baılanysty barsha qaıyrymdy jandar bir kisideı atsalysyp jatyr. Osydan 4-5 kún buryn oblystyq Jas Otan jastar qanatynyń tóraǵasy habarlasyp, qandaı qajetti quraldar kerek ekenin suraǵan. Reanımasııadaǵy naýqastarǵa matrastar kerek ekenin aıtyp edim. Jumyla tirlik qylsaq qıyndyqty eńserip, qaýipten tez qutylamyz. Alaıda ár adam jaýapkershilikti tereń sezinbeıinshe, qaýip seıilmeıdi. Aýrýdan saqtanýdyń jalǵyz joly – oqshaýlaný, kópshilik ortada maska taǵyp, antıseptıkti qorǵanysh retinde paıdalaný», dedi Mańǵystaý oblystyq aýrýhanasynyń bas meıirbıkesi Aıtbıbı О́tegenova.
Kómektiń úlken-kishisi joq, sondyqtan belsendi jastardyń eńbegi – úlken úles.
Mańǵystaý oblysy
