Almaty qalasy boıynsha «Qoǵamdyq baqylaý» qoǵamdyq bastamasynyń belsendisi Saıda Taýekelovanyń aıtýynsha, dárihanalardy teksergende, gýmanıtarlyq júkterdi jetkizýge kómekteskende jáne medısınalyq uıymdarǵa reıd barysynda quqyqtyq sıpattaǵy máseleler jıi týyndaıdy. «Árbir monıtorıngtik toptyń naqty qyzmetin belgilep, eriktilerge kýálik, jadynama men taný belgilerin berý kerek, túsken aqparatty óńdep, ony sheshim qabyldaý úshin tıisti ınstansııalarǵa berý qajet», dedi eriktiler qozǵalysynyń jetekshisi.
«Qoǵamdyq baqylaýdyń» respýblıkalyq úılestirýshisi Lıma Dıastyń pikirinshe, jumysty bir júıege qoıyp, eń bastysy dárigerlerdiń qyzmetine kedergi keltirmeı, mamandar men pasıentterdiń densaýlyǵyna qaýip tóndirmeý qajet. Eriktilerge qatań sanıtarlyq rejimdegi mekemelerge, ınfeksııalyq stasıonarlarǵa kirýine ruqsat etý kerek. Ol barlyq oblysta eriktiler qozǵalysynyń úılestirý ortalyǵy qurylǵanyn habarlady. Aýrýhanalarǵa kelgen gýmanıtarlyq júkterdi birge jetkizý boıynsha monıtorıng júrgizgenin, dári-dármektiń bar-joǵyn anyqtaý úshin dárihanalarǵa tekserý júrgizilgenin, medısınalyq uıymdarǵa barý josparlanyp otyrǵanyn aıtty.
Depýtat Irına Smırnova qoǵamdyq toptar azamattardyń densaýlyǵyn qorǵaý isine baǵa jetpes úles qosyp, dárihanalardy dári-dármekpen qamtamasyz etýde úlken qadam jasap otyr dep esepteıdi. Sondaı-aq Qostanaı oblysy Densaýlyq saqtaý basqarmasynyń ókili Ksenııa Jylqybaeva juqpaly jáne provızorlyq stasıonarlardyń medısına qyzmetkerleri qoǵamdyq baqylaý jumysynan qaýiptengenin jetkizdi. «Eriktilerdiń ıgi nıeti ınfeksııa órship turǵan qaýipti aýrýhanalarǵa baqylaýsyz saıahatqa aınalmaýy tıis», dedi ol dárigerlerdiń
atynan.
– Qoǵamdyq baqylaýdyń negizgi mindeti – aýrýhanalar men dárihanalardyń jumysyna kedergi jasaý emes, jaǵdaıǵa emosııasyz obektıvti baǵa berý, – dedi Nur-Sultan qalasy boıynsha qozǵalys belsendileriniń biri Vera Kım. – Biz úshin keri baılanystyń bolǵany, BAQ-ta, áleýmettik jelilerde jaǵdaıdy jarııalaý óte mańyzdy. Bizdiń qyzmetimiz KVI-ge shaldyqqan adamdardyń muń-muqtajyna baǵyttalǵan, olar tolyq medısınalyq kómek alady.
«Densaýlyq saqtaý mınıstrliginiń kelisimi men reglamenti bolsa, KVI-ge shaldyqqan naýqastar emdelip jatqan medısınalyq uıymdarǵa barýdy josparlaımyz. Jaqyn arada eriktilerdiń jumysyna arnalǵan memorandým – quqyqtyq baza, eriktilerge arnalǵan jadynama jáne maqsatty monıtorıngtik toptardyń reglamenti ázirlenedi. Biz Densaýlyq saqtaý mınıstrligi men jergilikti atqarýshy organdardy, atap aıtqanda Densaýlyq saqtaý basqarmasynyń qoldaýyna úmittenemiz», dedi belsendiler.
Mınıstr barlyq taraptyń pikirlerin tyńdap, «Qoǵamdyq baqylaý» múshelerinen kelip túsetin aqparatpen naqty jumys isteýdiń mańyzdylyǵyn atap ótti, bul jergilikti atqarýshy organdardyń qatysýymen júıeli máselelerdi sheshýge múmkindik beredi.
«KVI-ge qarsy birge kúresýimiz kerek. Bizdiń mindetimiz – durys densaýlyq saqtaý júıesin qurý. Jergilikti jerler salǵyrttyq tanytpaýy tıis, sonymen birge dárigerlerdi qoldap, qamqorlyq kórsetýge mindettimiz. Pasıentterge keletin bolsaq, eger zańsyz jaǵdaılar bolsa nemese kómek kórsetý standarttaryna sáıkes kelmese, onyń sebepterin anyqtaý kerek. Dárigerler men pasıentterdiń ar-namysy men abyroıy qorǵalýy tıis», dedi Densaýlyq saqtaý mınıstri.
Sondaı-aq ol eriktiler qaýipsizdik sharalary men sanıtarlyq normalardy saqtaýy qajet ekenin, mindetti túrde qatań nusqamadan ótýi tıistigin, óıtkeni ınfeksııany juqtyrý qaýpi joǵary ekenin jetkizdi. Sondyqtan stasıonarlardyń qatań talaptaryn saqtaý óte mańyzdy. Vedomstvo basshysynyń aıtýynsha, eger zań buzylsa, shaǵymdar belgili bir normalardy saqtaı otyryp rásimdelýi qajet.
«Zań buzýǵa bolmaıdy. Densaýlyq saqtaý mınıstrligi ony turaqty baqylaýda ustaıdy jáne qadaǵalaıdy», dedi mınıstr.
Eriktiler qozǵalysynyń múshesi Bıbinur Sheralıeva mınıstrge birqatar usynys aıtty. Máselen, jumysy toqtap turǵan medısınalyq jabdyqtardy qaıta bólý, sondaı-aq epıdemııa kezinde pasıentterge psıhologııalyq qoldaý kórsetý. Densaýlyq saqtaý mınıstri barlyq usynysty muqııat tyńdap, medısınalyq kómek sapasyn arttyrý jáne medısınalyq uıymdardyń jumysyn jaqsartý úshin «Qoǵamdyq baqylaý» belsendilerine jan-jaqty qoldaý kórsetýge daıyn ekendigin bildirdi.
