QR EGTRM Ekologııa, geologııa jáne tabıǵı resýrstar komıtetiniń tóraǵasy Zulfyhar Joldasov Memleket basshysynyń stıhııalyq qoqys úıindilerin joıý týraly tapsyrmasyn oryndaýdyń mańyzdylyǵyn atap ótti. Eske salsaq, bıylǵy 10 shildede úkimettiń keńeıtilgen otyrysynda QR Prezıdenti Qasym-Jomart Toqaev óziniń sóılegen sózinde qoǵamda barǵan saıyn kúrdelenip otyrǵan ekologııalyq problemalardy sheshýdiń ózektiligin jetkizdi.
"Jyl saıyn 5 mln tonnadan asa qatty turmystyq qaldyqtar shyǵarylady. Olardy óńdeý kólemi elimiz boıynsha tek 15% ǵana. Bul jetkiliksiz. Úkimetke jedel túrde zańnamalyq baza ázirlep, "Waste to energy" tehnologııasyn engizý úshin qolaıly ınvestısııalyq jaǵdaı týǵyzý qajet, - dep málimdedi Qasym-Jomart Toqaev.
Eske salsaq, ótken aptada Ekologııa mınıstrligi ár óńirdegi stıhııalyq úıindiler týraly azamattardan aqparat jınaý úshin jedel jelini iske qosqan bolatyn. Búginde 250-den asa shaǵym kelip tústi. Shaǵymdardyń kóbi Almaty oblysyndaǵy (40 shaǵym), Almaty qalasyndaǵy (apta ishinde 18 habarlama), Aqtóbe, Aqmola jáne Shyǵys Qazaqstan oblysyndaryndaǵy qoqys úıindileri týraly. Úıilgen qoqys týraly eń kóp habar bergen Qaraǵandy (15) jáne Aqtóbe (14) oblysynyń, sondaı-aq – Almaty qalasynyń (11) turǵyndary.
Ekologııa mınıstrligi habarlaǵandaı, jyl basynan beri onyń tapsyrysy boıynsha Qazaqstannyń iri qalalary men onyń 50 shaqyrym aýmaǵyndaǵy óndiris jáne tutyný qaldyqtaryna ǵaryshtyq monıtorıng júrgizdi. Nátıjesinde, búkil el boıynsha 7000-nan astam zańsyz qoqys oryndary anyqtaldy. Ǵaryshtyq monıtorıng kezinde mınıstrlik óńirlerdegi úıindilerdi joıýdyń jańa kestesin quryp, bekitý úshin ákimdikterge joldady. Búginde bulardyń 18-i joıyldy.
