Mysaly, ónerkásip salasynda 103,5%, qurylysta – 131,8%, ınvestısııa tartýda – 108,3%, baspana berýde – 111,8%, aýyl sharýashylyǵynda 103,3% ósim baıqalǵan.
Byltyrǵymen salystyrǵanda jergilikti bıýdjettiń túsimi 29,2%-ǵa artqan. Bul jospardaǵydan 11,6%-ǵa artyq.
О́ndiris salasynda ındeks ósiminiń naqty kólemi óńdeý sektorynyń ósýi esebinen qamtamasyz etildi. Bul jerdegi kórsetkish – 106,4%. Al taý-ken óndirisi sektorynda ol 105,7%-dy qurady.
Búginde «ArselorMıttal Temirtaý» jáne «Qazaqmys» korporasııasy» alpaýyt kásiporyndardyń turaqty jumys istep turǵanyn aıtqan jón. Álemdik naryqta mys pen bolat baǵasynyń óskeni baıqalady.
Oblys boıynsha ónerkásip óniminiń kólemi alty aı ishinde 1,360 trln teńgeni qurady. Bul qarqynnyń jyldyń sońyna deıin saqtalatynyna oblys basshylyǵy senimdi.
Investısııa salasyna kelsek, bıylǵy jarty jyldyń qorytyndysy boıynsha oblysqa 300 mlrd teńgeden astam kapıtal kelgen. Bul aldyndaǵydan 8,3%-ǵa artyq jáne munyń 85%-y – jeke ınvestısııa.
Budan bólek, shetel ınvestorlary belsendi túrde atsalysqan 44 jańa ınvestısııalyq joba iske asyrylyp jatyr. Mundaǵy soma 2 trln teńgeni qurap, 13 myń jańa jumys ornyn ashýdy kózdeıdi.
Jyldyń sońyna deıin 231 mlrd teńgeni qurap, 3,5 myń joǵary óndiristik turaqty jumys ornyn ashatyn 14 jańa joba iske qosylady. Qazirdiń ózinde onyń beseýi jumys isteı bastady.
Saran qalasyndaǵy burynǵy rezıno-tehnıkalyq ónimderi (RTI) zaýytynyń bazasynda qytaılyq álemdik kóshbasy «Yutong» kompanııasynyń qatysýymen avtobýstar men arnaıy tehnıkalar shyǵarý jobasy iske asyryla bastady. Sátin salsa, jyldyń sońyna qaraı alǵashqy avtobýs konveıerden shyǵýy tıis.
Sonymen qatar osy zaýyttyń bazasynda bıyl jylyna 3,5 mln dana avtomobıl shınalaryn shyǵaratyn joba da qolǵa alynbaq. Bul jobalardy júzege asyrý oblys ekonomıkasyn ártaraptandyrýǵa oń áserin tıgizedi jáne mashına jasaý úlesin eki esege arttyrady.
Shaǵyn jáne orta bıznes týraly aıtar bolsaq, bıylǵy jyldyń basynan beri jumys istep turǵan kásipkerlik sýbektileriniń sany 0,5%-ǵa ósip, 88400 birlikti qurady. Bul salada búginde oblystyń ekonomıkalyq turǵyda belsendi turǵyndarynyń 35%-y qamtylǵan. Olar boıynsha ınvestısııa tartýdyń ósimi 20%-dy qurady.
Daǵdarysqa qarsy sharalar arqyly oblystyń 30 myńnan astam kásipkeri salyq, bank aldyndaǵy kredıt jáne jalǵa alý aqysy boıynsha keıin tóleý jeńildikterine ıe boldy.
Oblysta qurylys salasynda bıylǵy jartyjyldyqtyń qorytyndysy boıynsha jumys 131,8%-dy qurady. Onyń ishinde turǵyn úıdi paıdalanýǵa berý qarqyny 11,8%-ǵa artty. Bıyl byltyrǵyǵa qaraǵanda turǵyn úıdi paıdalanýǵa berý isin 42,5%-ǵa arttyrý mindeti alǵa qoıylǵan.
О́ńirde sapaly aýyz sýmen qamtamasyz etý boıynsha aýqymdy jumys júrgizilýde. Bul baǵytta turǵyndardy ortalyqtandyrylǵan aýyz sýmen jáne arnaıy tartylǵan sý qubyrymen qamtamasyz etýdiń 95 jobasyn iske asyrý qolǵa alynǵan. Munyń ózi bıyl qalalyq turǵyndardyń 98%-yn jáne aýyldyqtardyń 87%-yn ortalyqtandyrylǵan aýyz sýmen qamtamasyz etýge múmkindik beredi. Al 2021 jyly qyzmettiń mundaı túrimen qalalyqtardy jáne 2023 jylǵa qaraı aýyldyq jerlerdiń turǵyndaryn 100%-ǵa qamtamasyz etý josparda bar.
Oblys ekonomıkasy úshin avtomobıl joldarynyń mańyzy zor. Bıyl «Qaraǵandy-Balqash» jáne «Balqash-Býrylbaıtal» jol ýchaskeleri paıdalanýǵa beriledi. Munyń aldynda, ıaǵnı osy jyldyń 6 shildesinde Qaraǵandyny aınalyp ótetin «Soltústik jáne Shyǵys aınalma joly» ashyldy. Bul jobalardy Indýstrııa jáne ınfraqurylymdyq damý mınıstrligi iske asyryp jatyr.
Jol óńirdiń damýyna strategııalyq turǵyda ıgi yqpalyn tıgizetin bolady. Irgeles salalardy esepke alǵanda, bul júrgizilip jatqan jumystar 20 myńnan astam jumys ornyn ashýǵa múmkindik berdi.
Aýyl sharýashylyǵy salasy da uıatqa qaldyrmaı tur. Aýylsharýashylyq ónimderiniń naqty kólem ındeksi mal sharýashylyǵy ónimderin óndirý ósiminiń arqasynda 103,3%-dy qurady.
Alǵashqy jartyjyldyqta azyq-túlik taýarlaryna arnalǵan tutyný baǵasynyń ındeksi 103,9%-dy qurady. Onyń ishinde áleýmettik mańyzy bar azyq-túlik taýarlaryna arnalǵan baǵa ındeksi 104,5% boldy. Bul respýblıka boıynsha ortasha mánnen tómen.
Endi, tótenshe jaǵdaı kezinde tabysynan aıyrylǵan kásipkerler men turǵyndarǵa áleýmettik tólem tóleý boıynsha mynany atap ótýge bolady. Oblysta 272 myń adam 42 500 teńge mólsherinde tólem aldy. Bul ekonomıkalyq belsendi turǵyndardyń 40%-yn quraıdy. Kommýnaldyq qyzmettiń 15 myń teńgelik ótemaqysyn oblystyń 76 500 turǵyny aldy. Bul degenińiz 2 mlrd teńgeden astam qarjy. Sondaı-aq tótenshe jaǵdaı kezeńinde oblystyń 80 myń turǵyny azyq-túlik jáne turmystyq jıyntyqtar túrindegi kómekpen qamtamasyz etildi.
Elbasynyń bastamasy boıynsha «Birgemiz» qory arqyly oblystyń 40 myńnan astam turǵyny 2,2 mlrd teńge mólsherinde kómek aldy. Sonymen qatar ataýly áleýmettik kómek alatyn eńbekke jaramdy turǵyndardyń 74%-y jumysqa tartyldy.
Jalpy alǵanda, eńbek naryǵyndaǵy yqpal etý is-sharalarynyń nátıjesinde jyl sońyna deıin 43 myńnan astam adam jumyspen qamtylmaq. Sonymen birge 30 myńnan astam jańa jumys oryndary ashylady. Munyń ózi oblysta jumyssyzdar sanynyń óspeýine ıgi áserin tıgizeri sózsiz.
Qaraǵandy oblysy
