Qorapsha ishinde Qoǵamdyq densaýlyq basqarmasy tarapynan usynylǵan, koronavırýs pen pnevmonııa syrqattarynyń aldyn alýǵa, emdeýge arnalǵan dáriler men quraldar bar. Dári-dármekter qorapshasyn daıyndap, ony aýyldardaǵy áleýmettik jaǵdaıy tómen, az qamtylǵan kópbalaly otbasylarǵa taratý kózdelgen «Shıpa» jobasyn júzege asyrýǵa erikti jastar qoldaý kórsetýde. Iаǵnı Jas Turkistan eriktiler klýby men aýdandardaǵy jasotandyqtar turǵyndarǵa jetkizýde. Kópshilik dárihanalarda tapshy bolyp jatqan dári-dármek salynǵan qobdıshalar Otyrar aýdanyndaǵy áleýmettik jaǵdaıy az qamtylǵan 10 otbasyna taratyldy. Qazyǵurt aýdanynyń Rabat eldi mekenindegi 2 otbasyna da osyndaı qobdıshalar jetkizildi. Al Kentaý qalasynda «О́mir» jobasy aıasynda qalalyq máslıhat hatshysy Talǵat Balabıevtiń jáne kásipker Erlan Rústemovtiń qoldaýymen qalalyq ortalyq aýrýhanasyna 2 jasandy tynys alý apparaty tabys etildi. «Biz osyndaı qadamdar arqyly turǵyndarǵa kómek qolyn sozýdy maqsat tuttyq. Partııa fılıalyna, nurotandyq depýtattarǵa, demeýshilerge, volonter jastarǵa alǵysymyz mol», deıdi partııanyń Jas Otan jastar qanaty oblystyq fılıalynyń tóraǵasy Janserik Juman. Iá, jobalardyń maqsatynan habardar bolǵan el janashyrlary, oblystyq máslıhattaǵy Nur Otan partııasynyń fraksııa ókilderi men ózge de azamattar qoldaý kórsetip, alǵashqy kúnderi arnaıy qorǵa 10 mln teńgeden astam qarjy aýdarǵan. Bul qarjynyń bir bóligine Túrkııa jáne Qytaı elderine 50 jasandy tynys alý apparatyna tapsyrys berilip, taıaý arada óńirge jetkizilmek.
Nur Otan partııasy oblystyq fılıaly tóraǵasynyń birinshi orynbasary Beısenbaı Tájibaev bul jobalar óńirdegi jas eriktilerdi ıgi iske jumyldyryp otyrǵanyn jetkizdi. «Joba aıasyndaǵy jumystar Qoǵamdyq densaýlyq basqarmasymen de birlesip atqarylady. Bul ıgi bastamaǵa partııa ókilderi, máslıhat depýtattary qoldaý kórsetýde. Pandemııamen kúreste, muqtaj otbasylarǵa kómektesýde atalǵan jobalar tıimdiligin kórsetedi dep senemin. Osy qıyn kezeńde elge kómektesýge barsha azamattardy atsalysýǵa shaqyramyz», deıdi B.Tájibaev. Al qıyn sátte qajetti dári-dármekke qol jetkizgen turǵyndar qaıyrymdy jandarǵa sheksiz alǵystaryn aıtýda.
О́ńirde turǵyndardy qajetti dári-dármekpen qamtamasyz etý máselesi de birtindep sheshimin taýyp, jaǵdaı turaqtanyp keledi. Osy oraıda oblysqa 5 mln-ǵa jýyq dárilik preparat kelgen. Pandemııamen kúres úshin oblys bıýdjetinen qarajat bólinip, О́zbekstan elinen jetken kezekti partııanyń ishinde halyqqa eń qajet túrleri bar. Atap aıtqanda, ambroksol, levoflaksasın, amınofıllın, azıtromısın, seftrıakson, parasetamol, metranıdazol, deksametazon, eýfıllın sekildi pnevmonııa jáne koronavırýsqa qarsy preparattar ákelingen. Osynaý qajetti dári-dármektiń jartysy óńirdegi aýdan-qala aýrýhanalaryna taratylsa, jartysy ákimdiktermen memorandýmǵa otyrǵan 153 dárihanaǵa shekti baǵamen jóneltiledi.
Aıta keteıik, buǵan deıin oblys ákimdigi halyqty qajetti dárilik zattarmen qamtamasyz etý maqsatynda jergilikti bıýdjet esebinen 500 mln teńge qarajat bólgen.
Túrkistan oblysy
