Almatylyq Vladımır Shestakov qaýipti vırýspen bir aıdan astam ýaqyt kúresti. Eki ókpesi birdeı qabynǵan pasıent eki aptasyn jan saqtaý bóliminde ótkizgen.
Naýqastyń qyzy Olga Chıstıakovanyń sózinshe, ákesi bıylǵy jyldyń 25-maýsymynda syrqattanǵan. Bastapqyda dárigerler ótkir respıratorlyq vırýstyq ınfeksııa juqtyrdy degen dıagnoz qoıypty. Biraq taǵaıyndalǵan emnenesh nátıje bolmaǵan soń, kompıýterlik tomografııa jasalǵan. KT nátıjesi ókpeniń 88%-dan astamy zaqymdanǵanyn rastasa, PSR-test syrqattyń COVID-19 vırýsyn juqtyrǵanyn kórsetken.
«Ákemdi birden IIM gospıtaline jatqyzdy. Biraq beti beri qaraı qoımaǵan soń, Ortalyq qalalyq klınıkalyq aýrýhanaǵa aýystyrý týraly sheshim qabyldandy. Aýrýhana dárigerleri ákemdi emdep jazamyz degen sózinde turdy. Ol óz aıaǵymen aýrýhanadan shyqty. Ortalyq qalalyq klınıkalyq aýrýhanada altyn qoldy dárigerler jumys isteıdi. Solardyń bilimi men biliktiliginiń arqasynda ákem aýyr naýqastan qulan-taza aıyqty», - dep jazdy Olga Chıstıakova Medısınalyq saqtandyrý qorynyń Qoldau 24/7 mobıldi qosymshasynda.
Emdeýshi dáriger Myńjan Meńlibekovtiń aıtýynsha, pasıent OQK aýrýhanaǵa aýyr halde túsken.
«Koronavırýs ınfeksııasyn juqtyrǵan pasıenttiń ókpesi zaqymdanyp, vırýsty pnevmonııaǵa shaldyǵady. Bul pasıenttiń ókpesi ottegi apparatyna qosqanǵa deıin 97 prosentke deıin zaqymdanyp úlgerdi. Birden tıisti dári-dármekter berdik, ottegige qosqannan keıin jaǵdaıy edáýir jaqsardy», - deıdi M.Meńlibekov.
Jyl basynda iske qosylǵan Qoldau 24/7 mobıldi qosymshasy halyq arasynda úlken suranysqa ıe bola bastaǵan. Azamattar Qoldau 24/7 arqyly shaǵym ǵana emes, emdegen dárigerler men medısına mekemesi atyna alǵystaryn da joldaı alady. Qańtar aıynan beri qosymsha arqyly 700-ge jýyq alǵys hat kelip túsken.
