Baqylaý sharasyna fılıal qyzmetine tapsyrys berýshi "Túpqaraǵan aýdandyq turǵyn-úı sharýashylyǵy, jolaýshylar kóligi jáne avtomobıl joldary" memlekettik mekemesiniń basshysy A.Jetkizgenov, álgi joldy salýǵa jaýapty merdiger seriktestik bastyǵynyń orynbasary B.Eleshov, "Adaldyq alańy" jobalyq keńsesiniń osy aýdandaǵy arnaıy monıtorıngtik top ókili M.Shyraqbaı qatysty.
Baqylaý sharasy kezinde B.Sársenov kóshesindegi №31, №61 jáne №73 úılerdiń janyndaǵy kólik joldarynan úsh synama alyndy. Shyqqan qorytyndy - jol materıaldarynyń sapasy normatıvtik-tehnıkalyq qujattar talaptaryna sáıkes kelmeıdi.
Anyqtalǵan kemshilikter QR SJQIQA aımaqtyq departamentine, Túpqaraǵan aýdandyq TÚKSh bólimine qyzmettik hat túrinde, al hattyń kóshirmesi "Aq jol qurylys" JShS-gi men arnaıy monıtorıngtik top jetekshisine joldandy.
Sondaı-aq fılıaldyń jol ınjenerlerimen Shetpe aýyly "Jańa orpa" shaǵyn aýdanynda salynyp jatqan joldyń sapasy tekserildi.
Qazir "Jańa orpa" atty shaǵyn aýdandaǵy avtomobıl jolyna ortasha jóndeý jumystary júrip jatyr. Merdiger mekeme - "Abat" jaýapkershiligi shekteýli seriktestigi. Mańǵystaý aýdandyq TÚKSh bólimi ulttyq jol sapa ortalyǵy fılıalymen áriptestik kelisimshartta otyr.
Joldyń sapasyn baqylaý sharasyna seriktestik jáne memlekettik mekeme ókilderi A.Jumalıev pen B.Abaev, "Adaldyq alańy" jobalyq keńsesiniń arnaıy monıtorıngtik top jetekshisi S.Muńalbaev qatysty.
Sonymen, "Jańa orpa" shaǵyn aýdany №2 kóshesi boıyndaǵy asfalt joldan 6 synama alyndy. Onyń ekeýiniń ǵana sapasy normatıvtik-tehnıkalyq qujattar talaptaryna sáıkes. Qalǵany tórteýinen birqatar kemshilik anyqtaldy.
Baqylaý sharasynyń qorytyndysy quzyrly organǵa, álgi jolǵa tapsyrys berýshi memlekettik mekeme jáne merdiger mekemege qyzmettik hat túrinde joldandy. Baqylaý sharasy dál osy kúni "Ashybulaq" shaǵyn aýdanyndaǵy E.Qosbaev atyndaǵy kóshe joly men №7 orta mektep - "Kaspıı sement" zaýyty aralyǵyndaǵy trassada da júrgizildi.
Ol jerden alynǵan 7 synamaǵa zerthanalyq jaǵdaıda taldaý jasaldy. Eshqaısy da normatıvtik-tehnıkalyq qujattar talaptaryna sáıkes kelmeıdi.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.
