Qala ákimi B. Saǵyntaev "Almaty" TA-nyń Akimat Live baǵdarlamasynyń tikeleı efırinde Medeý aýdanynda aǵashtardy zańsyz kesý faktilerine júrgizilgen tekserýdiń nátıjesi týraly habarlady.
Birneshe adam ıelik etetin aýmaqta jasyl jelekterdi zańsyz kesý anyqtalǵan. Olardyń bireýi belgili boldy jáne oǵan QR ÁQ kodeksiniń 386 baby boıynsha 117 jasyl jelekti zańsyz keskeni úshin 15 AEK (41 670 teńge) aıyppul salyndy. Sonymen qatar, abattandyrý erejelerin buzǵany úshin ol 50 AEK (138 900 teńge) kóleminde aıyppul tóleıtin boldy.
On ese ótemdik otyrǵyzý (1170 myń aǵash) belgilendi. Sonymen qatar, qoıylatyn talaptarǵa sáıkes japyraq surypty aǵashtyń bıiktigi jer betinen keminde 3 m bıik bolýy tıis. Budan ózge, eki jyl qatarynan ol aǵashtardy kútip-baptaýy qajet. О́temdik otyrǵyzý kúz mezgilinde orta mektepterdiń janyna jáne kósheler boıyna aǵash otyrǵyzýmen bastalady. Qýraǵan aǵashtardyń ornyna jańalary otyrǵyzylady.
Aǵashty zańsyz kesken adammen hattamany toltyrǵan kezde ótemdik otyrǵyzý jáne jasyl jelekke eki jyl qatarynan kútim jasaý týraly belgili bir uıymmen kepildeme jasalady jáne kepil hat beriledi.
Jasyl jelekti zańsyz kesken jer telimderiniń ıeleri anyqtalýda.
"Aǵashty zańsyz kesý jáne jasyl jelekke zııan keltiretin problemany jurtshylyqty keńinen tarta otyryp sheshetin bolamyz", dep atap ótti B.Saǵyntaev.
Aǵashtardy zańsyz keskenderdi, olardyń túbine, dińgegine zııan keltirgenderdi anyqtaıtyn "Jasyl baqylaý" jobasy qolǵa alynady jáne zańsyz áreketterge monıtorıng júrgiziledi.
