Aýyldaǵy áleýmettik az qamtylǵan 4 otbasy baspanaly boldy. Turǵyndarǵa Nálibaevtar áýleti úı salyp bergen. Tórt úıdiń qurylysyna jalpy sommasy 30 mln teńge jumsalypty. Qonys toılaryn toılap, qýanyshtary qoıyndaryna syımaǵan otbasylardyń qaıyrymdy áýletke aıtar alǵysy sheksiz. Baspanaly bolǵandardyń biri – 4 balanyń anasy Nurbaqyt Dármenova. Osy ýaqytqa deıin páter jaǵalap, ár úıdiń shańyraǵynda kúneltip kelgen kópbalaly ananyń bar tapqan taıanǵany balalarynyń tamaǵynan artylmaıdy. Otaǵasynan erterekte aıyrylyp, azapty kúnderdi bastan keshirgen bul otbasy baspanamyz bolsa degen armandarynyń oryndalǵanyna qýanyshty. Qaıyrymdy áýlettiń otanasy Sheker Bekbolatova búginge deıin aýyldaǵy 11 az qamtamasyz etilgen otbasyǵa jáne jalǵyzilikti jandarǵa kómek qolyn sozyp keledi. Bul otbasylardyń mektepke baratyn balalarynyń oqý quraldary men kıim keshekterin túgendeýdi de ózine mindettep alǵandaı. Jomart júrek azyq-túlikke de járdemin aıaǵan emes.
«Hali múshkil jandarǵa qoldan kelgenshe qaıyrymdylyq jasap, baryńmen bólisý – ımandylyqtyń belgisi. Qandastarǵa qarymtasyz qaıyrymdylyqty udaıy jasaǵan qazaqtyń birimiz», deıdi Sheker ana. Kópke úlgi bolatyn qaıyrymdy iske aýyl turǵyndary da únemi qoldaý kórsetip keledi. Al qaıyrymdy áýlettiń ıgi isteri munymen shektelmek emes.
Aýdanda aldyńǵy jyldary kommýnaldyq turǵyn úı retinde 64 azamatqa úı berildi. Onyń ishinde 13 jetim, ıaǵnı ata-anasynyń qamqorlyǵynsyz qalǵan balalar bar. Sondaı-aq 9 kópbalaly otbasy baspanaly bolǵan-dy. Bıyl 3 otbasyǵa kommýnaldyq turǵyn úı berý kózdelýde. Sondaı-aq turǵyn úı-kommýnaldyq damýdyń 2020-2025 jyldarǵa arnalǵan «Nurly jer» memlekettik baǵdarlamasy aıasynda satyp alý quqyǵynsyz 7 otbasyna turǵyn úı satyp alý kózdelýde. Kelesi jyly bıýdjet qarajaty esebinen 8 otbasyǵa kommýnaldyq turǵyn úıdiń qurylysy bastalady.
Búginde oblysta az qamtylǵan otbasylar sany ótken jylmen salystyrǵanda 4 esege azaıǵan. Mamandar kómekke muqtajdardyń azaıýyn kópbalaly otbasylardyń bólek sanatqa shyǵyp, arnaıy áleýmettik járdemaqy alýymen baılanystyryp otyr. Atap aıtqanda, oblysta bıyldyń 1 tamyzyna deıin az qamtylǵan 27,5 myń otbasyǵa 7706,9 mln teńge járdemaqy, sondaı-aq kepildendirilgen áleýmettik toptama 1-6 jastaǵy 35 877 balaǵa 1104,3 mln teńge taǵaıyndalǵan. Al ataýly áleýmettik kómek alýshylardyń ishinde eńbekke qabiletti 9944-i jumyspen qamtylyp otyr. Odan bólek, tótenshe jaǵdaı kezinde sáýir-mamyr aılarynda 160,6 myń adam 2,2 mlrd teńgege azyq-túlikpen, turmystyq zattarmen qamtamasyz etildi. «Qamqorlyq» baǵdarlamasy aıasynda 1643 ómirlik qıyn jaǵdaıǵa tap bolǵan otbasy anyqtalyp, onyń ishinde 35 otbasy turǵyn úımen qamtylǵan. Sonymen qatar 1643 otbasyǵa 341,7 mln teńgege demeýshiler esebinen kómekter kórsetilgen.
Túrkistan oblysy
