"Nur Otan" partııasynyń praımerız ótkizý kestesine sáıkes uıymdastyrylǵan saıası dodada "Nur Otan" partııasy Túrkistan oblystyq fılıaly tóraǵasynyń orynbasary Beısen Tájibaev quttyqtaý sóz sóılep, qatysýshylarǵa sáttilik tiledi. "Bir dáýirlerde ashyq aspan astyndaǵy amfıteatrlar kúsh saıysy ótetin oryndar bolsa, qazir kóne shaharda bul oryn oı saıystyratyn ortalyqqa aınaldy. Respýblıka boıynsha praımerızge qatysýshylardyń 1144-i Túrkistan oblysynan qatysyp otyr. Sonyń ishinde Túrkistan qalasynan 106 úmitker baq synaýǵa bel baılapty. Mundaı debattardan tartynbaý kerek. Oı túkpirindegi josparlaryńyzdy, baǵdarlamalaryńyzdy ashyq aıtyp, jurtshylyqqa tanystyrǵan jón. Sizderdi ashyq básekede tıisti talap pen men erejeni saqtaı otyryp, joǵary deńgeıde pikir talastyrady dep senemin. Elbasynyń bastamasyn qoldap, Túrkistandy damytý baǵytynda eńbek sińiredi dep esepteımin. Qasıetti Túrkistan tórinde saıası qadamdy bastap, adaldyq pen adamdyqty tý etip shyǵatyndaryńyzǵa senimdimin", – dedi Beısen Dáýletuly.
Erkin formattaǵy debatqa qatysýshylar kókeıde júrgen oılaryn aıtyp, bir-biriniń saılaýaldy baǵdarlamalary boıynsha suraqtaryn qoıdy. "Ýáde berý – ońaı. Ony oryndaý bar. Keleshekte depýtat bolǵan tulǵalar da osy amfıteatrda, el aldynda esep berse", – deıdi praımerızge qatysýshylar.
Jalpy Túrkistan oblysynda 30 qyrkúıekke deıin 200-deı jarııa pikirsaıys uıymdastyrylyp, oǵan 1100-den astam kandıdattar qatysýy kerek. Búginde 16 aýdan, qalada jarııa pikirsaıystar ótkizilýde.
